ՀԻՄՆԱՎՈՐՈՒՄ
«Հայաստանի Հանրապետության կառավարության 2010 թվականի
սեպտեմբերի 9-ի N 1251-Ն որոշման մեջ լրացում կատարելու մասին»
ՀՀ կառավարության որոշման նախագծի ընդունման
1. Ընթացիկ իրավիճակը և իրավական ակտի ընդունման անհրաժեշտությունը․
Նախագծի ընդունումը պայմանավորված է Հայաստանի Հանրապետությունում տրանսպորտային միջոցների գրանցման-հաշվառման գործընթացի լավարկման, այն հանրային պահանջարկին և տեխնոլոգիական զարգացումներին համապատասխանեցնելու անհրաժեշտությամբ։
Այսպես, ՀՀ ՆԳՆ-ն տրանսպորտային միջոցների գրանցման-հաշվառման բնագավառում հանդիսանում է շարժական գույքի կադաստր վարող լիազոր մարմին և այդ գործընթացում հավաքագրում է տրանսպորտային միջոցների հաշվառման տվյալները (այդ թվում՝ տեխնիկական, այն է՝ շարժիչի հզորությունը) սեփականատիրոջ կամ հաշվառող անձի կողմից ներկայացված տվյալների և տեղեկությունների հիման վրա՝ չունենալով տրանսպորտային միջոցի շարժիչի հզորությունը որոշելու լիազորություն։
ՀՀ կառավարության 2010 թվականի սեպտեմբերի 9-ի թիվ 1251-Ն որոշմամբ հաստատված N 4-րդ և N 5‑րդ հավելվածների 1-ին կետերի 5-րդ ենթակետերի համաձայն՝ տրանսպորտային միջոցը գրանցելու կամ միաժամանակ տրանսպորտային միջոցը գրանցելու և հաշվառելու դեպքում, ի թիվս այլ փաստաթղթերի, հաշվառման ստորաբաժանում է ներկայացվում տրանսպորտային միջոցն արտադրող գործարանի ներկայացուցչության կամ տրանսպորտային միջոցների տեխնիկական զննություն անցկացնող կազմակերպության կողմից տրված տեղեկանքը, եթե առանց տեխնիկական միջոցների կամ սարքավորումների հնարավոր չէ տեսնել կամ պարզել տրանսպորտային միջոցի շարժիչի հզորությունը։ Իսկ այն դեպքում, երբ տրանսպորտային միջոցի թափքի և (կամ) ամրաշրջանակի վրա փակցված նույնականացման պիտակների վրա նշված է լինում տրանսպորտային միջոցի շարժիչի հզորությունը, ապա հիմք է ընդունվում այդ տվյալը։
Ներկայումս ՀՀ-ում հաշվառվող էլեկտրամոբիլի էլեկտրաշարժիչի հզորության պարզումը դարձել է խնդրահարույց, քանի որ ՀՀ ներմուծվող էլեկտրամոբիլների զգալի մասի թափքի և (կամ) ամրաշրջանակի վրա կա՛մ առհասարակ բացակայում է նույնականացման պիտակը, կա՛մ փակցված լինելու դեպքում՝ բացակայում է էլեկտրաշարժիչի հզորության մասին նշումը, կա՛մ էլեկտրաշարժիչի հզորության մասին առկա է լինում երկու արժեք՝ առավելագույն և նվազագույն հզորության։
Նկարագրված իրավիճակը խնդրահարույց է դարձել էլեկտրամոբիլի էլեկտրաշարժիչի հզորությունը պարզելու տեսանկյունից, քանի որ փոխադրամիջոցի գույքահարկի տարեկան վճարման մատչելիության տեսանկյունից հաշվառողների համար ցանկալի է ունենալ շարժիչի հզորության փոքր ցուցանիշի գրառում։
Միաժամանակ, ՀՀ-ն լինելով ԵՏՄ լիիրավ անդամ, միացել է նաև «Տրանսպորտային միջոցի անձնագրի (տրանսպորտային միջոցի ամրաշրջանակի անձնագրի) և ինքնագնաց մեքենայի ու տեխնիկայի այլ տեսակների անձնագրի միասնական ձևերի ներդրման և էլեկտրոնային անձնագրերի համակարգերի կազմակերպման մասին» 2014 թվականի օգոստոսի 15-ի համաձայնագրին։
Եվրասիական տնտեսական հանձնաժողովի կոլեգիայի 2015 թվականի թիվ 122 որոշման (այսուհետ՝ Որոշում) 3.3-րդ կետի համաձայն՝ Հայաստանի Հանրապետության, Բելառուսի Հանրապետության, Ղազախստանի Հանրապետության և Ղրղզստանի Հանրապետության լիազորված մարմիններին՝ մինչև 2021 մարտի 31-ը տրանսպորտային միջոցների ազատ (անարգել) շրջանառության նպատակով ապահովել տրանսպորտային միջոցների նկատմամբ գրանցման գործողությունների կատարման հնարավորությունը՝ էլեկտրոնային անձնագրերի և (կամ) էլեկտրոնային անձնագրերից քաղվածքների հիման վրա, որոնք հաստատված են պատրաստող կազմակերպության, ադմինիստրատորի կամ ազգային օպերատորի կնիքով:
Որոշման կարգով հաստատված հավելված N 3-ի ցանկի 7-րդ կետի 30-րդ ենթակետի համաձայն՝ տրանսպորտային միջոցի էլեկտրոնային անձնագրում նշվում է էլեկտրամոբիլի էլեկտրաշարժիչը (մակնիշը, տիպը)՝ աշխատանքային լարումը, 30 րոպեանոց առավելագույն հզորությունը, ինչը միանգամայն տարբերվում է ՀՀ կառավարության 2010 թվականի թիվ 1251‑Ն որոշմամբ հաստատված 4-րդ և 5‑րդ հավելվածների 1-ին կետերի 5-րդ ենթակետերի պահանջներով որոշվող շարժիչի հզորության արժեքից, քանի որ չի հանդիսանում օբյեկտիվ արժեք։
2․ Առաջարկվող կարգավորման բնույթը․
Նախագծով առաջարկվում է նախատեսել այնպիսի կարգավորում, որը կարտացոլի էլեկտրամոբիլի շարժիչի հզորության օբեյեկտիվ չափը, քանի որ այն կվերցվի արդեն իսկ ձևավորված էլեկտրոնային անձնագիր ունեցող նույն մոդելի և հավաքածուն ունեցող տրանսպորտային միջոցի՝ ԵՏՄ համակարգում առկա տվյալից, իսկ նման տվյալի բացակայության դեպքում՝ իրավասու կազմակերպության կողմից ձևակերպված էլեկտրոնային անձնագրից, իսկ դրա անհնարինության դեպքում՝ տրանսպորտային միջոցն արտադրող գործարանի ներկայացուցչության կողմից տրված տեղեկանքում նշված արժեքից։
3. Նախագծի մշակման գործընթացում ներգրավված ինստիտուտները և անձինք․
Նախագիծը մշակվել է ՀՀ ներքին գործերի նախարարության կողմից:
4. Կապը ռազմավարական փաստաթղթերի հետ․
Նախագծի ընդունումը չի բխում ռազմավարական ծրագրերից։
5. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները․
Նախագծի ընդունումը լրացուցիչ ֆինանսական միջոցների հատկացման, ինչպես նաև՝ պետական բյուջեի եկամուտներում և ծախսերում փոփոխություններ կատարելու անհրաժեշտություն չի առաջացնելու։
6. Ակնկալվող արդյունքը․
Նախագծի ընդունմամբ ակնկալվում է ՀՀ-ում ապահովել պետական հաշվառման ենթակա էլեկտրամոբիլների շարժիչի հզորության որոշման օբյեկտիվությունը և ԵՏՄ իրավական ակտերով սահմանված սկզբունքների կատարման ապահովումը։
ՀՀ ներքին գործերի նախարարություն
