«Հաշմանդամություն ունեցող անձանց իրավունքների մասին» օրենքում լրացումներ և փոփոխություններ կատարելու մասին», «Հայաստանի Հանրապետության քաղաքացիական օրենսգրքում փոփոխություն կատարելու մասին», «Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին» և ««Անձի ֆունկցիոնալության գնահատման մասին» օրենքում լրացումներ և փոփոխություններ կատարելու մասին» օրենքների նախագծեր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը 

«ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ԻՐԱՎՈՒՆՔՆԵՐԻ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ 

Հոդված 1․ «Հաշմանդամություն ունեցող անձանց իրավունքների մասին» 2021 թվականի մայիսի 5-ի ՀՕ-194-Ն օրենքի (այսուհետ՝ Օրենք) 3-րդ հոդվածի 1-ին մասի՝ 17-րդ և 18-րդ կետերում «կողմից» բառից հետո լրացնել «կամ օրենքով չարգելված այլ աղբյուրներով» բառերը, 12․1-ին կետից հետո լրացնել նոր 12․2-րդ կետ՝ հետևայլ բովանդակությամբ․

«12․2) անկախ կյանքի կենտրոն՝ անկախ կյանքի ապահովմանն ուղղված ծառայություններ իրականացնող Աշխատանքի և սոցիալական հարցերի նախարարության ենթակայությամբ գործող  կազմակերպություններ կամ համայնքային ոչ առևտրային կազմակերպություններ կամ «Սոցիալական աջակցության մասին» օրենքի 35-րդ հոդվածի 2-րդ մասի համաձայն հավաստագրված կազմակերպություններ, որոնք ծառայությունն իրականացնում են պետական բյուջեի կամ պատվիրակման կամ օրենքով չարգելված այլ միջոցներով։»

Հոդված 2․ Օրենքի 10-րդ հոդվածի 1-ին մասի 5-րդ կետում «ծառայությունները» բառից հետո լրացնել «, հանրային ծառայությունները» բառերը, իսկ 5․1-ին կետում «․» կետադրական նշանը փոխարինել «։» կետադրական նշանով և լրացնել հետևյալ բովանդակությամբ նոր նախադասությունը.  «Եթե փոխհատուցման գումարը տրվում է օրենքով չարգելված այլ աղբյուրներով, ապա սույն կետում նշված պայմանագիրը կնքվում է եռակողմ՝ ներառելով նաև ֆինանսական փոխհատուցում տրամադրող կազմակերպություններին․»։