ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐԻ 2024 ԹՎԱԿԱՆԻ ՄԱՅԻՍԻ 7-Ի N 42-Ն ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«Հայաստանի Հանրապետության կրթության, գիտության, մշակույթի և սպորտի նախարարի 2023 թվականի մարտի 30-ի N 24-Ն հրամանում փոփոխություններ կատարելու մասին» և «Հայաստանի Հանրապետության կրթության, գիտության, մշակույթի և սպորտի նախարարի 2024 թվականի մայիսի 7-ի N 42-Ն հրամանում փոփոխություններ կատարելու մասին» Հայաստանի Հանրապետության կրթության, գիտության, մշակույթի և սպորտի նախարարի հրամանների նախագծերի

1. Իրավական ակտի անհրաժեշտությունը (նպատակը)

Հայաստանի Հանրապետության կրթության, գիտության, մշակույթի և սպորտի նախարարի հրամանների նախագծերի ընդունումը բխում է ՀՀ Տավուշի մարզի հանրակրթական ուսումնական հաստատություններում Հանրակրթության պետական նոր չափորոշչի ներդրման շրջանակում 9-րդ դասարանի «Հայաստանի աշխարհագրություն» առարկայի չափորոշչի բարելավման,  ծրագրի և չափորոշչի ծավալի վերանայման անհրաժեշտությամբ:

2. Կարգավորման հարաբերությունների ներկա վիճակը և առկա խնդիրները, առաջարկվող լուծումները

Դեռևս 2021 թվականից ՀՀ Տավուշի մարզում մեկնարկած  Հանրակրթության պետական նոր չափորոշչի՝ փուլային եղանակով ներդրման գործընթացն  իրականացվեց՝ յուրաքանչյուր փուլից առաջ նախորդ ժամանակահատվածում առարկայական չափորոշիչներում և ծրագրերում ի հայտ եկած խնդիրները մասնագիտական խմբի ուսումնասիրության արդյունքում լրամշակելու և վերանայելու,  հաջորդ ուսումնական տարում նոր դասարաններում վերանայված ծրագրերը ներդնելու   տրամաբանությամբ:

ՀՀ բոլոր դպրոցների 1-ին, 4-րդ, 9-րդ և 11-րդ դասարաններում չափորոշչի ներդրմանն ընդառաջ 2024-2025 ուսումնական տարում Տավուշի մարզի հանրակրթական ուսումնական հաստատություններում արդեն իսկ գործարկված առարկայական չափորոշիչների և ծրագրերի վերանայման անհրաժեշտություն առաջացավ:

Մասնավորապես, 7-8-րդ, 10-12-րդ դասարանների «Աշխարհագրություն» առարկայի և 9-րդ դասարանների «Հայաստանի աշխարհագրություն» առարկաների չափորոշիչներում, հետևաբար, նաև ծրագրերում (այս փուլում վերանայվում է 9-րդ դասարանի «Հայաստանի աշխարհագրություն» առարկայի գործող ծրագիրը) առկա են ծրագրային վերջնարդյունքներին, դրանք ներկայացնող առանձին բովանդակային բաղադրիչների սովորողներին համեմատաբար բարդ պահանջներ ներկայացնող բաղադրիչներ, որոնք վերբերվում են հատկապես ՀՀ բնությանը և տնտեսությանը։ Այդ  վերջնարդյունքները և դրանք ներկայացնող բովանդակային բաղադրիչները, վերանայվել, միավորվել և պարզեցվել  են, ինչն առարկայական չափորոշչի և ծրագրային նյութերի բեռնաթափման, ի հայտ եկած խնդիրների շտկման հիմքում է ընկած: 

3. Իրավական ակտի կիրառման դեպքում ակնկալվող արդյունքը

Վերանայված, ծավալային առումով բեռնաթափված առարկայական չափորոշչով և ծրագրով կապահովվի ստեղծվող դասագրքերին ներկայացվող պահանջների ապահովումը՝ հնարավորություն ընձեռելով դասավանդողներին և սովորողներին ուսումնառության ընթացքում գործածել Հայկական լեռնաշխարհի, Հայաստանի Հանրապետության բնությանը, բնակչությանը և տնտեսությանը առնչվող բարելավված և իրատեսական ծավալով և գործնական ուղղվածության շեշտադրումներով ծրագիր։ Ծրագիրը առավել համակարգված եղանակով հնարավորություն է տալիս սովորողների գիտելիքների, հմտությունների շարունակական զարգացման, Հայաստանի աշխարհագրության միջոցով բնական և հասարակական տարբեր երևույթների և գործընթացների նկատմամբ դիրքորոշման և արժեքային աշխարհընկալումների ձևավորման ուղղություններով մշակել ուսումնական նյութեր։ Այս ամենը դրական ազդեցություն կունենա տվյալ առարկայի դասավանդման և սովորողների կողմից ծրագրային նյութի յուրացման վրա՝ սահմանված առավել չափելի վերջնարդյունքների  ապահովման առումով:

4․ Իրավական ակտի մշակման գործընթացում ներգրավված ինստիտուտները, անձինք

ՀՀ կրթության, գիտության, մշակույթի և սպորտի նախարարություն:

5․ Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին

Նախագծի ընդունմամբ լրացուցիչ ֆինանսական միջոցների անհրաժեշտություն և պետական բյուջեի եկամուտներում և ծախսերում փոփոխություն չի նախատեսվում: