ՏԵՂԵԿԱՆՔ-ՀԻՄՆԱՎՈՐՈՒՄ
«ԵՐԵՎԱՆԻ ԶԱՐԳԱՑՄԱՆ 2023 ԹՎԱԿԱՆԻ ԾՐԱԳՐԻ ԻՐԱԿԱՆԱՑՄԱՆ ՀԱՇՎԵՏՎՈՒԹՅԱՆ ՄԱՍԻՆ» ԵՐԵՎԱՆ ՔԱՂԱՔԻ ԱՎԱԳԱՆՈՒ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ
Համաձայն «Երևան քաղաքում տեղական ինքնակառավարման մասին» օրենքի 83-րդ հոդվածի 3-րդ մասի՝ Երևանի զարգացման ծրագրի իրականացման վերաբերյալ քաղաքապետը հաշվետվություն է ներկայացնում Երևան քաղաքի ավագանուն:
Երևանի զարգացման 2023 թվականի ծրագրի իրականացման հաշվետվությունը կազմվել է Երևանի քաղաքապետի 2023թ. մարտի 31-ի h. 716-Ա որոշմամբ ընդունված ձևաչափով։
Երևանի զարգացման 2023 թվականի ծրագրի իրականացման հաշվետվությունը հիմնականում բաղկացած է հետևյալ ենթաբաժիններից՝ «Ծրագրի կամ միջոցառման անվանում», «Նախատեսված աշխատանքների նկարագիր», «Աշխատանքների իրականացման գործընթաց», «Իրականացնող կազմակերպություն, կատարման ժամկետ» և «Նշումեր»։ Հաշվետվության կառուցվածքում առանձին ներկայացված են քաղաքային տնտեսության ոլորտները և Երևանի վարչական շրջանները։
Հաշվետվության մեջ մանրամասն ներկայացված են Երևանի զարգացման 2023 թվականի ծրագրով նախատեսված և իրականացված աշխատանքների վերաբերյալ ծավալային և քանակական տվյալներ։
Տրանսպորտի ոլորտում 2023 թվականին շահագործման են հանձնվել մայրաքաղաք ներկրված նոր, թվով 87 «ՄԱՆ» մակնիշի մեծ տեղատարողությամբ ավտոբուսներ, որով սպասարկվում է թվով 8 երթուղի: Շահագործման են հանձնվել նոր, թվով 150 «ԺՈՆԳ ԹՈՆԳ» մակնիշի միջին տեղատարողության ավտոբուսներ: Ընդհանուր առմամբ նշված մակնիշի ավտոբուսներով (361 հատ) սպասարկվում է թվով 31 երթուղի:
Վերգետնյա էլեկտրատրանսպորտով ուղևորների սպասարկման որակի և անվտանգության բարձրացմանն ուղղված միջոցառումների իրականացմամբ պայմանավորված՝ ձեռք են բերվել թվով 15 չինական «ՅՈՒԹՈՆԳ» մակնիշի նոր տրոլեյբուսներ:
Միասնական տոմսային համակարգի ներդրման գործընթացի շրջանակում հասարակական տրանսպորտի շարժակազմերը և մետրոպոլիտենի անցարգելները համալրվել են վալիդատորներով և գործարկվել է էլեկտրոնային և թղթային տեսքով QR կոդ կրիչը: Աշխատանքները դեռևս շարունակվում:
Կոմունալ տնտեսության ոլորտում 2023 թվականին փաստացի փոխարինվել է 510 վերելակ, վերանորոգվել է 69754 քմ հարթ և 47922.64 քմ թեք տանիք, վերանորոգվել է բազմաբնակարան շենքերի 447 մուտք, կառուցվել և վերակառուցվել են նոր ջրագծեր: Ներկայումս շարունակվում է «ԵԱՍՄ» համայնքային հիմնարկի համար հատուկ նշանակության մեքենա մեխանիզմների ձեռքբերման գործընթացը:
Արտաքին լուսավորության ոլորտում 2023թ. ընթացքում իրականացվել է Երևան քաղաքի 2816 օբյեկտների 1792.07 կմ ընդհանուր երկարությամբ արտաքին լուսավորության ցանցի շահագործման, պահպանման և ընթացիկ նորոգման աշխատանքներ: Մասնավորապես՝ մի շարք փողոցներում, բակային տարածքներում և այգիներում իրականացվել են արդիականացման աշխատանքներ, գործող նատրիումական լուսատուները փոխարինվել են ԼԵԴ լուսատուներուվ, մոնտաժվել է 10733 հատ ԼԵԴ լուսատու, որի արդյունքում ապահովվում է ավելի որակյալ լուսավորություն և էլեկտրաէներգիայի խնայողություն: 1 ժամով ավելացվել է նաև արտաքին լուսավորության ցանցի միացման ռեժիմը:
ՄԱԿ-ի զարգացման Հայաստանյան գրասենյակի հետ համատեղ իրականացվող «Աջակցություն Հայաստանի համայնքներին կլիմայական «Խելացի» լուծումների ներդրման և իրականացման հարցում» ծրագրի շրջանակում 2023թ. ընթացքում արդիականացվել է Արցախի պողոտայի, Վաղարշյան, Հրաչյա Քոչար, Նաիրի Զարյան, Օրբելի փողոցների արտաքին լուսավորության ցանցը, գործող նատրիումական լուսատուները փոխարինվել են ԼԵԴ լուսատուներուվ, մոնտաժվել է 830 հատ ԼԵԴ լուսատու, որի արդյունքում ապահովվում է ավելի որակյալ լուսավորություն և էլեկտրաէներգիայի խնայողություն:
Վերակառուցման և զարգացման եվրոպական բանկի աջակցությամբ իրականացվող Երևանի քաղաքային լուսավորություն վարկային ծրագրերի շրջանակում 28 փողոցներից Թումանյան, Վարդանանց, Աճառյան, Խորենացի, Ամիրյան փողոցներում, Մյասնիկյան պողոտայում իրականացվել են աշխատանքներ: Աշխատանքները շարունակվում են իրականացվել:
Բնապահպանության ոլորտում իրականացվել է Երևանյան լճի և Հրազդանի կիրճի մաքրում վնասակար բուսականությունից, տարատեսակ աղբից ու թափոններից, հավաքվել և աղբավայր է տեղափոխվել է շուրջ 9900 խմ աղբ։ Աշխատանքների կատարման առաջին փուլն ավարտվել է, ընթացքի մեջ են երկրորդ փուլով նախատեսված աշխատանքները: Յուրաքանչյուր բնակչին բաժին ընկնող կանաչ մակերեսն ավելացել է 19,1145 հա-ով, որից ուրբան անտառ 16,6 հա, սիզամարգ 0,8991 հա, այգի 1,05 հա, պուրակ 0,5654 հա։ Իրականացված աշխատանքների արդյունքում Երևան քաղաքում ծաղկանոցների թիվը կրկնապատկվել է, որոշ վարչական շրջաններում եռապատկվել։ Ընդհանուր առմամբ նախագծվել է 17 ֆիտոնախագիծ, որից 2023թ. ընթացքում իրագործվել է 13-ը: 2023թ. ընթացքում ավարտվել են Արաբկիր վարչական շրջանում կանաչ տարածքների քարտեզագրման և գույքագրման աշխատանքները։
Վերամշակվող թափոնների տեսակավորման մասով հավաքագրվել է պլաստիկ մոտ 28 տոննա, ապակի մոտ 30 տոննա և ստվարաթուղթ 580 տոննա։ «Երևան, Վարշավա, Տիրանա մայրաքաղաքների համագործակցությունը վտանգավոր թափոնների կառավարման ընդհանուր մարտահրավերների շուրջ» ծրագրի շրջանակում նվիրաբերվել են շուրջ 1000 թափոնամաններ:
Վերանորոգման աշխատանքներ են իրականացվել թվով 22 կրթական, նախադպրոցական, արտադպրոցական, մարզական և մշակութային հաստատությունների շենքերում և բակային տարածքներում:
Վերանորոգվել են թվով 3 առողջապահական հիմնարկներ: Տեղադրվել են 9 գետնանցումների մոտ հաշմանդամներին հարմարեցված վերելակներ:
2023 թվականին կարևոր քայլեր են ձեռնարկվել «Կլիմայի փոփոխության ազդեցության մեղմանն ու հարմարվողականությանն ուղղված ծրագրերի» իրականացման գործընթացում: Տեղադրվել են արևային ֆոտովոլտային կայաններ Երևանի քաղաքապետարանի 2 վարչական շենքերի տանիքներին, Շենգավիթ վարչական շրջանի Եղիշե Թադևոսյան 11 հասցեում գտնվող համալիր մարզաձևերի մանկապատանեկան մարզադպրոցի տանիքին: «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԶԾ-ԿԿՀ ծրագրի շրջանակում իրականացվել է Երևան համայնքի ենթակայության 6 մանկապարտեզների տանիքների վերակառուցման աշխատանքներ:
Կարևորագույն աշխատանքներից է «Տեղական բաց կառավարման գործընկերություն» նախաձեռնության Երևանի 2023-2024թթ. գործողությունների ծրագրի իրականացումը, որի շրջանակում 2023 թվականի սեպտեմբերի 6-7-ը Էստոնիայի մայրաքաղաք Տալլինում տեղի ունեցած «Բաց կառավարման գործընկերություն» գլոբալ գագաթնաժողովում «Ոգեշնչող բարեփոխումներ» մրցանակաբաշխությանը Երևանի քաղաքապետարանն ավելի քան 100 տեղական իշխանություններից Ասիա-Խաղաղօվկիանոսյան տարածաշրջանի մասնակիցների շարքում ճանաչվեց հաղթող:
ԵՐԵՎԱՆԻ ՔԱՂԱՔԱՊԵՏ ՏԻԳՐԱՆ ԱՎԻՆՅԱՆ