«Կլիմայի մասին» Հայաստանի Հանրապետության օրենքի նախագիծ

Վերջին տարիներին, Հայաստանում նկատելի քայլեր են ձեռնարկվել ազգային և ոլորտային զարգացման քաղաքականություններում կլիմայի փոփոխության մեղմման և հարմարվողակա­նու­թյան ներդրման և շեշտադրման ուղղությամբ: Այդուհանդերձ, կլիմայական նպատակները լիարժեք ձևակերպված չեն, ինչպես նաև կլիմայի փոփոխու­թյան խնդիրներն այդ ռազմավարություններում բավարար չափով հասցեագրված չեն և ավելի շատ դիտարկվում են որպես քաղաքականության լրացուցիչ, այլ ոչ թե առանցքային բաղադրիչ, թեև կլիմայի փոփոխությանն առնչվող ոլորտների քաղաքականության շարադրանքներում գնալով ավելի շատ են ընդգծվում կլիմայի փոփոխության հետ կապված ռիսկերը և դրանց հասցեագրման կարևորությունը:

ՄԱԿ Կլիմայի փոփոխության շրջանակային կոնվենցիայի, Փարիզյան համաձայնագրի և ոլորտում ընդունված այլ միջազգային փաստաթղթերի հիման վրա, ինչպես նաև ՀՀ-ԵՄ Համապարփակ և ընդլայնված գործընկերության համաձայնագրով նախատեսված համակարգաստեղծ գործողություն­ների մասով Հայաստանի ստանձնած պարտավորություն­ների արդյու­նա­վետ իրակա­նա­ցումը ենթադրում է պետության ջանքերի համակարգված և հետևո­ղա­կան գործադրում:

Երկրի կլիմայական քաղաքականության իրականացումը ենթադրում է համապա­տաս­խան միջնաժամկետ ու երկարաժամկետ ռազմավարական պլանավորում, ինչը պետք է արտահայտվի մի շարք փաստաթղթերի՝ ինչպես նաև դրանցում սահմանված ծրագրերի ու գործողությունների պլանների ընդունման և պարբերաբար վերանայման միջոցով: Նշված փաստաթղթե­րի մի մասն արդեն ընդունված է, սակայն դրանք ունեն որոշակի կենսացիկլ և, հետևաբար, պարբերաբար վերանայման կարիք: Ակնկալվում է, որ հաջորդ շրջափու­լերում արդեն դրանք կբխեն օրենսդրորեն ամրագրված ելակետերից, երբ հստակ սահմանված կլինեն այդ փաստաթղթերի շրջանակները և դրանց ներկայացվող պահանջները, անհրաժեշտ տեղեկատվական հոսքերի կառավարման սխեմաները, մշակման, քննարկման և վերանայման ժամկետ­ներն ու պատասխանատուները, հանրային մասնակցության և հաշվետվողա­կանության ընթացակարգերը:

Օրենքի ընդունմամբ ակնկալվում է.

• Հստակ սահմանված կլիմայական նպատակներ և ոլորտային զարգացման քաղաքականություններում ներկառուցված կլիմայական նկատառումներ
• Պատշաճ սպասարկվող միջազգային հանձնառություններ
• Կլիմայական քաղաքականության ռազմավարական շրջանակ
• Հստակ սահմանված իրավասությունների և պարտականությունների շրջանակ
• Ներդրված նորարարական ֆինանսավորման մեխանիզմներ
• ՋԳ արտանետումների, ստացված աջակցության և քաղաքականության իրականացման արդյունքների հաշվառման ինստիտուցիոնալ համակարգ: