«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻԱԿԱՆ ՕՐԵՆՍԳՐՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ», «ԱՐԺԵԹՂԹԵՐԻ ՇՈՒԿԱՅԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ, «ՊԵՏԱԿԱՆ ԳՈՒՅՔԻ ԿԱՌԱՎԱՐՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ ՕՐԵՆՔՆԵՐԻ ՆԱԽԱԳԾԵՐ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԸ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻԱԿԱՆ ՕՐԵՆՍԳՐՔՈՒՄ  ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հոդված 1․ 1998 թվականի մայիսի 5-ի Հայաuտանի Հանրապետության քաղաքացիական օրենսգիրքը (այսուհետ՝ Օրենսգիրք) լրացնել 76.1. հոդվածով՝

«76.1. Կորպորատիվ կառավարման կանոնագիրքը

1. Կորպորատիվ կառավարման կանոնագիրքը տնտեսական ընկերակցության կամ ընկերության կառավարման արդյունավետության բարձրացման, մասնակիցների իրավունքների պաշտպանության, գործունեության թափանցիկության և հաշվետվողականության բարձրացմանն ուղղված սկզբունքներ և կանոններ պարունակող իրավական ակտ է, որը  հաստատում է Էկոնոմիկայի նախարարը:
2. Կորպորատիվ կառավարման կանոնագրքի ընդունումը և կիրառումը տնտեսական ընկերակցությունների և ընկերությունների կողմից կամավոր է, եթե այլ բան նախատեսված չէ օրենքով։
3. Կորպորատիվ կառավարման կանոնագրքի ընդունման և կիրառման վերաբերյալ որոշում ընդունելու իրավասությունը պատկանում է տնտեսական ընկերակցությունների և ընկերությունների մասնակիցների ընդհանուր ժողովին, եթե օրենքով կամ կանոնադրությամբ այլ բան նախատեսված չէ։
4. Ոչ առևտրային կազմակերպությունների կողմից Կորպորատիվ կառավարման կանոնագրքի ընդունումը և կիրառումը կարող է իրականացվել այնքանով, որքանով վերաբերելի է ոչ առևտրային կազմակերպությանը: Եթե օրենքով սահմանված դեպքում Կորպորատիվ կառավարման կանոնագրքի ընդունումը և կիրառումը տարածվում է նաև ոչ առևտրային կազմակերպության վրա, ապա դա պետք է իրականացվի այնքանով, որքանով վերաբերելի է ոչ առևտրային կազմակերպությանը: Ոչ առևտրային կազմակերպությունների կողմից Կորպորատիվ կառավարման կանոնագրքի ընդունումը և կիրառումը իրականացվում է առևտրային կազմակերպությունների համար սահմանված կանոններով այնքանով, որքանով վերաբերելի է ոչ առևտրային կազմակերպությանը:

Հոդված 2․ Եզրափակիչ մաս և անցումային դրույթներ․

1. Սույն օրենքը ուժի մեջ է մտնում պաշտոնական հրապարակումից երեք ամիս հետո:
2. Սույն օրենքի ընդունմամբ պայմանավորված ենթաօրենսդրական իրավական ակտերն ընդունվում են սույն օրենքի պաշտոնական հրապարակումից հետո՝ երեք ամսվա ընթացքում:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԸ

«ԱՐԺԵԹՂԹԵՐԻ ՇՈՒԿԱՅԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հոդված 1. «Արժեթղթերի շուկայի մասին» 2007 թվականի հոկտեմբերի 11-ի ՀՕ-195-Ն օրենքի 8-րդ հոդվածը լրացնել 4.1. մասով՝

«4.1. Ազդագիրը պետք է պարունակի հավաստում թողարկողի կողմից Հայաստանի Հանրապետության քաղաքացիական օրենսգրքի 76.1. հոդվածով սահմանված  Կորպորատիվ կառավարման կանոնագրքի ընդունման և կիրառման մասին, որը իրականացվում է «հետևիր կամ բացատրիր» սկզբունքով: «Հետևիր կամ բացատրիր» սկզբունքը ենթադրում է, որ թողարկողը որպես կանոն հետևում է Կորպորատիվ կառավարման կանոնագրքի պահանջներին, իսկ այն պահանջները, որոնք չեն կիրառվում թողարկողի կողմից պետք է պատշաճ ներկայացված և բացատրված լինեն ազդագրում: Օտարերկրյա թողարկողը կարող է հավաստել իր երկրում ընդունված կորպորատիվ կառավարման սկզբունքների ընդունումը և կիրառումը, իսկ դրանց բացակայության դեպքում՝ Հայաստանի Հանրապետության քաղաքացիական օրենսգրքի 76.1. հոդվածով սահմանված Կորպորատիվ կառավարման կանոնագրքի ընդունումը և կիրառումը:»։

Հոդված 2․ Եզրափակիչ մաս․

1. Սույն օրենքը ուժի մեջ է մտնում պաշտոնական հրապարակումից երեք ամիս հետո:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԸ

«ՊԵՏԱԿԱՆ ԳՈՒՅՔԻ ԿԱՌԱՎԱՐՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. «Պետական գույքի կառավարման մասին» 2014 թվականի նոյեմբերի 20-ի ՀՕ-158-Ն օրենքի (այսուհետ՝ Օրենք) 6-րդ հոդվածի 1-ին մասը լրացնել 23-րդ կետով.

«23) հաստատում է 50 և ավելի տոկոս պետական մասնակցությամբ առևտրային կազմակերպություններում Կորպորատիվ կառավարման կանոնագրքի ընդունման և կիրառման կարգը և ժամկետները:»:

Հոդված 2. Օրենքի 7-րդ հոդվածի 1-ին մասի 20-րդ կետի «այդ թվում» բառերից հետո լրացնել «Կորպորատիվ կառավարման կանոնագրքի ընդունման և կիրառման, ինչպես նաև» բառերով:

Հոդված 3․ Եզրափակիչ մաս և անցումային դրույթներ․

1. Սույն օրենքը ուժի մեջ է մտնում պաշտոնական հրապարակումից երեք ամիս հետո:
2. Սույն օրենքի ընդունմամբ պայմանավորված ենթաօրենսդրական իրավական ակտերն ընդունվում են սույն օրենքի պաշտոնական հրապարակումից հետո՝ երեք ամսվա ընթացքում: