ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՕԳՈՍՏՈՍԻ 15-Ի N 1301-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

ՀԻՄՆԱՎՈՐՈՒՄ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՕԳՈՍՏՈՍԻ 15-Ի N 1301-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Ընթացիկ իրավիճակը և իրավական ակտի ընդունման անհրաժեշտությունը

Առողջության համապարփակ ապահովագրության ներդրման գործընթացի ապահովման շրջանակներում ՀՀ կառավարության 2025 թվականի դեկտեմբերի 25-ի N 1953-Ա որոշմամբ ստեղծվել է առողջության ապահովման պետական հիմնադրամ (այսուհետ` Հիմնադրամ)` վերապահելով առողջապահության ոլորտում կառավարման բարեփոխումների հայեցակարգային փաստաթղթերով նախանշվող միջոցառումներին համապատասխան գործառույթներ, ինչը էականորեն նպաստում է առողջապահական համակարգում կառավարման (այդ թվում՝ ֆինանսական) արդյունավետության բարձրացմանը, պետական պատվերի շրջանակներում բուժօգնություն և սպասարկում ստացող քաղաքացիներին սպասարկման որակի բարձրացմանը:

Հիմնադրամի ստեղծմամբ անհրաժեշտ է դադարեցնել Առողջապահության նախարարության կազմում գործող պետական առողջապահական գործակալության գործունեությունը:

Ներկայումս ՊԱԳ կանոնադրությունը հաստատված է ՀՀ կառավարության 15.08.2002թ. N 1301-Ն որոշմամբ, որը ևս անհրաժեշտ է ուժը կորցրած ճանաչել, քանի որ Հիմնադրամի ստեղծման մասին կառավարության որոշմամբ հաստատվելու է նաև վերջինիս կանոնադրությունը: Միաժամանակ, անհրաժեշտ է նախատեսել Հայաստանի Հանրապետության առողջապահության նախարարության պետական առողջապահական գործակալության գործունեության դադարեցման աշխատանքները կազմակերպող հանձնաժողով ստեղծելու և Առողջության ապահովման պետական հիմնադրամի հետ հանձնման-ընդունման աշխատանքներ իրականացնելու մասին դրույթներ` համապատասխան ժամկետներով, ինչը թույլ կտա ապահովել ՊԱԳ լիազորությունների, փաստաթղթերի և գույքի սահուն փոխանցումը Հիմնադրամին` ապահովելով գործառույթների իրականացման անընդհատությունը:

2. Առաջարկվող կարգավորման բնույթը

Նախագծով առաջարկվում է դադարեցնել պետական առողջապահական գործակալության գործունեությունը:

Հաշվի առնելով, որ նկարագրվող փոփոխությունները կատարվում են Առողջության ապահովման պետական հիմնադրամի ստեղծման գործընթացին զուգահեռ, նախագծերով նախատեսվում է որպես դրանց ուժի մեջ մտնելու ժամկետ սահմանել Առողջապահության նախարարության ՊԱԳ գործունեության դադարեցման աշխատանքները կազմակերպող հանձնաժողովի կողմից ՊԱԳ և Առողջության ապահովման պետական հիմնադրամի միջև հանձնման-ընդունման աշխատանքներն ավարտելու վերաբերյալ համապատասխան ակտի ստորագրման օրվան հաջորդող օրը:

3. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է ՀՀ առողջապահության նախարարության կողմից։

4. Ակնկալվող արդյունքը

Նախագծի ընդունմամբ կապահովվի Առողջության ապահովման պետական հիմնադրամի ստեղծման գործընթացի սահուն իրականացումը, ինչպես նաև առողջապահության նախարարության առանձին գործառույթների անխափան իրականացումը:

5. Տեղեկատվություն լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին

ՊԱԳ-ի գործունեության դադարեցմամբ պայմանավորված առաջարկվում է վերջինիս ֆինանսավորման համար պետական բյուջեով նախատեսված գումարների նվազեցում չկատարել` հաշվի առնելով այն հանգամանքը, որ դադարեցման արդյունքում դեռևս նախատեսվում են ծախսեր, մասնավորապես կարճաժամկետ ռեզերվում գտնվողների վարձատրման, ինչպես նաև վերջնահաշվարկների համար: Ներկայումս նշված ծախսերը հնարավոր չէ կանխատեսել, քանի որ հստակեցված չեն: Առաջարկվում է նվազեցումները իրականացնել ՊԱԳ-ի գործունեության դադարեցմամբ պայմանավորված բոլոր գործողությունները իրականացնելուց հետո: Բացի այդ Առողջապահության նախարարությանը տրամադրվող 6 նոր հաստիքների համար աշխատավարձի և դրան հավասարեցված այլ վճարների մասով տարեկան ծախսը կազմում է 30,1 մլն դրամ:

6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050 թ., Կառավարության 2021-2026թթ. ծրագիր, ոլորտային և/կամ այլ ռազմավարություններ

1. «Հայաստանի վերափոխման ռազմավարություն 2050» փաստաթղթի հետ, որի 4-րդ մեգանպատակը վերաբերում է առողջ և ապահով քաղաքացուն, ժողովրդին: 4-րդ մեգանպատակի 4.1-րդ կետով սահմանված նպատակի, այն է՝ Կյանքի որակի և երկարակյացության բարձր մակարդակ, 4.3 կետով սահմանած նպատակի, այն է՝ Մոր և մանկան առողջության պահպանման որակի բարձր մակարդակ, 4.4-րդ կետով սահմանված նպատակի, այն է՝ Հիվանդությունների տարածվածության եւ մահացության ցածր մակարդակ, հասնելու համար անհրաժեշտ է ամբողջովին վերանայել առողջապահության և դրա ֆինանսավորման գործող համակարգը, սոցիալական արդար մոտեցումների հիման վրա ստեղծել բոլորին հասանելի, մատչելի և որակյալ առողջապահական համակարգ, դրանով իսկ ապահովելով հիվանդացության ու մահացության ցուցանիշների հետևողական և որակական բարելավումները, ինչը կբերի ֆիզիկական, հոգեկան և սոցիալական բարեկեցություն ունեցող, այն է՝ առողջ քաղաքացիների և, ըստ այդմ, առողջ հասարակության ձևավորմանը: Այս մեգանպատակի հետևողական իրականացման համար առողջապահության համակարգային փոփոխությունների իրականացումը հրամայական է, որը ՀՀ զարգացման ներկա շրջափուլում հնարավոր է ապահովել առողջության համապարփակ ապահովագրության ներդրումը սահուն իրականացնելու համար համապատասխան կարողությունների ձևավորման՝ այդ թվում առողջության ապահովման պետական հիմնադրամի ստեղծման և դրան զուգահեռ Առողջապահության նախարարությունում կառուցվածքային և հաստիքային փոփոխություններ կատարելու միջոցով:

2. Կառավարության 2021-2026 թվականների գործունեության ծրագրի կատարումն ապահովող միջոցառումների ցանկի Հավելված 1-ի «Առողջապահության նախարարություն» բաժնի Բնակչության բժշկական օգնության և սպասարկման մատչելիության և հասանելիության ապահովում» նպատակի 1.3 կետով նախատեսված՝ «Առողջության համապարփակ ապահովագրության հիմնադրամի և դրա կառավարման խորհրդի ստեղծում, վերջինիս գործունեությունը կարգավորող ենթաօրենսդրական նորմատիվ իրավական ակտերի փաթեթի մշակում, առողջության համապարփակ ապահովագրության ներդրումն ապահովող ենթաօրենսդրական ակտերի ընդունում» միջոցառման կատարման ապահովմանն է ուղղված այս նախագծի փաթեթի ներկայացումը։