«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2020 ԹՎԱԿԱՆԻ ՀՈՒԼԻՍԻ 9-Ի N 1159-Ն ՈՐՈՇՄԱՆ ՄԵՋ ԼՐԱՑՈՒՄ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԾԱԳԻԾ

Համաձայն «Քաղաքական ապաստանի մասին» ՀՀ օրենքի՝ ՀՀ ՆԳՆ հանդիսանում է լիազոր մարմինը, որը ընդունում և ուսումնասիրում է քաղաքական ապաստանի տրամադրման վերաբերյալ դիմումները։ Չնայած նրան, որ քաղաքական ապաստանի տրամադրման վերաբերյալ վերջնական որոշումը կայացնում է ՀՀ Նախագահը, ՀՀ ՆԳՆ-ի իրավասության ներքո է գտնվում դիմումի վարչական վարույթի իրականացումը, դիմումի քննարկումը և եզրակացության կազմումը։ Առաջարկում եմ 1159-Ն որոշման մեջ ավելացվող 9.1 կետը լրացնել հետևյալ բովանդակությամբ ենթակետով. «քաղաքական ապաստանի հարցերի»:

ՆԳՆ-ի ներկայիս լիազորությունները միգրացիոն ոլորտում չեն սահմանափակվում օտարերկրացիների համար մուտքի վիզաների, կացության կարգավիճակների տրամադրմամբ և արտաքսմամբ: Օրինակ, ՆԳՆ-ն պատասխանատու է ՌԴ քաղաքացիներին ՀՀ-ում մշտական բնակչի կարգավիճակ տրամադրելու համար, որը նախատեսված է 29.08.1997թ. պայմանագրով: Համարում եմ նպատակահարմար լրացնել քննարկվող նախագծի 9.1 կետը ենթակետով, որը ՆԳՆ-ին լիազորում է տալ պաշտոնական մեկնաբանություններ օտարերկրյա քաղաքացիների մուտքի, ելքի, գտնվելու և բնակության հարցերի վերաբերյալ (անհրաժեշտության դեպքում՝ ՀՀ Ազգային անվտանգության ծառայության հետ համատեղ):

ՀՀ օրենսդրությունը նախատեսում է հանրային ծառայությունների համարանիշի տրամադրումը ոչ միայն ՀՀ քաղաքացիներին, այլև օտարերկրյա քաղաքացիներին՝ օրենքով սահմանված դեպքերում: Առաջարկում եմ 1159-Ն որոշման մեջ ավելացվող 9.1 կետի 31-րդ ենթակետը բաժանել երկու առանձին ենթակետերի՝ հետևյալ բովանդակությամբ. «Հայաստանի Հանրապետության քաղաքացուն տրամադրվող անձը հաստատող փաստաթղթերի» և «Հանրային ծառայությունների համարանիշի տրամադրման»: