Հ Ի Մ Ն Ա Վ Ո Ր ՈՒ Մ
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2020 ԹՎԱԿԱՆԻ ՀՈՒԼԻՍԻ 9-Ի N 1159-Ն ՈՐՈՇՄԱՆ ՄԵՋ ԼՐԱՑՈՒՄ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ՎԵՐԱԲԵՐՅԱԼ
1․ Ընթացիկ իրավիճակը և իրավական ակտի ընդունման անհրաժեշտությունը
«Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին» 2022 թվականի դեկտեմբերի 16-ի ՀՕ-457-Ն օրենքի 1-ին հոդվածի 1-ին կետով ՀՀ արտակարգ իրավիճակների նախարարության գործունեությունը դադարեցվեց, իսկ 2-րդ կետով ստեղծվեց ՀՀ ներքին գործերի նախարարությունը (այսուհետ՝ Նախարարություն)։ Նշված օրենքի 2-րդ հոդվածի 2-րդ կետով Նախարարությանը վերապահվեց գործունեության հիմնական ոլորտները։ Միաժամանակ Ազգային ժողովի կողմից ընդունվեց «Պետական կառավարման համակարգի մարմինների մասին» օրենքում փոփոխություններ և լրացում կատարելու մասին» 2022 թվականի դեկտեմբերի 16-ի ՀՕ-458-Ն օրենքը (այսուհետ՝ Օրենք)։ Օրենքով ՀՀ ոստիկանությունը դարձավ նախարարությանը ենթակա մարմին, իսկ Միգրացիոն ծառայությունը անվանափոխվեց Միգրացիայի և քաղաքացիության ծառայության։ Օրենքի 3-րդ հոդվածի 3-րդ մասի համաձայն՝ փոփոխություն կատարվեց ՀՀ կառավարության 2018 թվականի մայիսի 22-ի «Նախարարությանը ենթակա մարմինների ենթակայությունը սահմանելու մասին» N 580-Ա որոշման մեջ, որի արդյունքում Ոստիկանությունը և Միգրացիայի և քաղաքացիության ծառայությունը դարձան Նախարարությանը ենթակա մարմիններ։
Վերոգրյալով պայմանավորված անհրաժեշտություն է առաջացել փոփոխություն կատարել ՀՀ կառավարության 2020 թվականի հուլիսի 9-ի «Օրենսդրական ակտի և Հայաստանի Հանրապետության կառավարության որոշման վերաբերյալ պաշտոնական պարզաբանում տվող պետական կառավարման համակարգի մարմինների և համապատասխան բնագավառների ցանկը սահմանելու մասին» N 1159-Ն որոշման մեջ։ Մասնավորապես՝ նշված որոշման 1-ին կետով հաստատված հավելվածից հանել ՀՀ արտակարգ իրավիճակների նախարարությունը և լրացնել Նախարարությունը, ինչպես նաև ՀՀ ոստիկանությանը վերապահված բնագավառների մասով պաշտոնական պարզաբանում ներկայացնելու իրավասությունը վերապահել Նախարարությանը։ Բացի այդ, ՀՀ տարածքային կառավարման և ենթակառուցվածքների նախարարությանը վերապահված մի շարք ոլորտներում (փախստականների և ապաստանի հարցեր, հետընդունման (ռեադմիսիայի), օտարերկրացի աշխատողի համար աշխատանքային գործունեության հիմքով կացության կարգավիճակ և այլն) պաշտոնական պարզաբանում ներկայացնելը վերապահել Նախարարությանը, քանի որ Միգրացիոն ծառայությունը անվանափոխվեց Միգրացիայի և քաղաքացիության ծառայության, և դարձավ Նախարարությանն ենթակա պետական կառավարման համակարգի մարմին։ Արդյունքում՝ Նախարարությանը և նրան ենթակա պետական կառավարման համակարգի մարմիններին օրենքով վերապահված գործունեության հիմնական ոլորտներում պարզաբանում տրամադրում է Նախարարությունը։
2․ Առաջարկվող կարգավորման բնույթը
Առաջարկվում է Հայաստանի Հանրապետության կառավարության 2020 թվականի հուլիսի 9-ի N 1159-Ն որոշման մեջ կատարել փոփոխություններ՝ հիմք ընդունելով վերոգրյալ օրենքների կարգավորումները, և որի արդյունքում Նախարարությունը կամրագրվի պաշտոնական պարզաբանում տրամադրելու պետական կառավարման համակարգի մարմինների ցանկում և կտրամադրի պաշտոնական պարզաբանումներ՝ համաձայն «Նորմատիվ իրավական ակտերի մասին» օրենքի 11-րդ գլխի։
3․ Ակնկալվող արդյունքը
Նախարարության կողմից օրենքով վերապահված գործունեության հիմնական ոլորտներում պարզաբանման տրամադրում՝ համաձայն «Նորմատիվ իրավական ակտերի մասին» օրենքի 11-րդ գլխի։
4․ Նախագծի մշակման գործընթացում ներգրավված ինստիտուտները և անձինք
Նախագիծը մշակվել է ՀՀ ներքին գործերի նախարարության կողմից։
5․ Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին
Նախագծի ընդունման կապակցությամբ չի նախատեսվում Հայաստանի Հանրապետության պետական բյուջեի եկամուտների ավելացում:
6․ Նախագծի ընդունման առնչությամբ ընդունվելիք այլ իրավական ակտերի նախագծերը կամ դրանց ընդունման անհրաժեշտության բացակայության մասին
Նախագծի ընդունմամբ այլ իրավական ակտերում փոփոխությունների և/կամ լրացումների անհրաժեշտություն չի առաջանում:
7․ «Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ»
Նախագծի ընդունումը բխում է ՀՀ Ազգային ժողովի 2021 թվականի օգոստոսի 26-ի N ԱԺՈ-002-Ն որոշմամբ հաստատված Հայաստանի Հանրապետության կառավարության (2021-2026թթ.) ծրագրի «Ոստիկանության բարեփոխումներ» 5․4-րդ գլխի յոթերորդ պարբերությունից․ «Ժողովրդավարական պետությանն ու հասարակարգին բնորոշ է ոստիկանության ոլորտի միասնական քաղաքականություն մշակող և իրականացնող, պատասխանատու գործադիր իշխանության մարմնի առկայությունը: Ըստ հաստատված ռազմավարության՝ նախատեսվում է ստեղծել ներքին գործերի նախարարություն, որը թույլ կտա նաև ապահովել ոլորտի թե՛ խորհրդարանական, թե՛ քաղաքացիական վերահսկողություն, ինչպես նաև կդառնա ոլորտի բարեփոխումների իրագործողն ու պատասխանատուն։», ինչպես նաև ՀՀ կառավարության 2021 թվականի նոյեմբերի 18-ի «Հայաստանի Հանրապետության կառավարության 2021-2026 թվականների գործունեության միջոցառումների ծրագիրը հաստատելու մասին» N 1902-Լ որոշման N 1 հավելվածի «Ներքին գործերի նախարարություն» բաժնի «Ոստիկանություն» գլխի 1-ին կետից՝ «Ներքին գործերի նախարարության ձևավորում՝ Ոստիկանության և Միգրացիոն ծառայության հիմքով»:
ՀՀ ներքին գործերի նախարարություն