ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2021 ԹՎԱԿԱՆԻ ԱՊՐԻԼԻ 6-Ի N 347-Ա ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2021 ԹՎԱԿԱՆԻ ԱՊՐԻԼԻ 6-Ի N 347-Ա ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ՈՐՈՇՄԱՆ ՆԱԽԱԳԾԻ

1. Իրավական ակտի անհրաժեշտությունը․

Վարչապետի որոշման նախագծի (այսուհետ` նախագիծ) ընդունումը պայմանավորված է Հայաստանի Հանրապետության վարչապետի 2021 թվականի ապրիլի 6-ի թիվ 347-Ա որոշումը «Պետական կառավարման համակարգի մարմինների մասին» ՀՀ օրենքում և Հայաստանի Հանրապետության կառավարության 2018 թվականի մայիսի 22-ի N 580-Ա որոշման մեջ կատարված փոփոխություններին համապատասխանեցնելու, ինչպես նաև Հայաստանի Հանրապետությունում ՄԻԱՎ/ՁԻԱՀ-ի, տուբերկուլոզի և մալարիայի դեմ ուղղված միջոցառումները համակարգող հանձնաժողովի (այսուհետ` ՄՀՀ) կազմն առավել արդյունավետ համալրելու անհրաժեշտությամբ:

2. Ընթացիկ իրավիճակը և առկա խնդիրները․

ՄՀՀ-ն խորհրդակցական մարմին է, որը ստեղծվել է ՄԻԱՎ/ՁԻԱՀ-ի կանխարգելման ծրագրային առաջարկը նախապատրաստելու, քննարկելու, ՁԻԱՀ-ի, տուբերկուլոզի և մալարիայի դեմ պայքարի Գլոբալ հիմնադրամին (այսուհետ` Գլոբալ հիմնադրամ) առաջարկությունները ներկայացնելու, ԳՀ-ի դրամաշնորհային ծրագրի իրականացմանը աջակցելու և այլ` իր կարգավիճակից բխող նպատակներով:

Ներկայացված նախագծով նախատեսվում է որոշակի փոփոխություններ կատարել Հայաստանի Հանրապետության վարչապետի 2021 թվականի ապրիլի 6-ի N347-Ա որոշմամբ ստեղծված ՄՀՀ-ի կազմում, ինչը պայմանավորված է ՄՀՀ կառուցվածքը ՀՀ կառավարության կառուցվածքին համապատասխանեցնելու անհրաժեշտությամբ։ Մասնավորապես, գործող որոշմամբ հաստատված կազմում ընդգրկված են Հայաստանի Հանրապետության տարածքային կառավարման և ենթակառուցվածքների նախարարության միգրացիոն ծառայության մեկ ներկայացուցիչ և Հայաստանի Հանրապետության ոստիկանության պետի տեղակալը։

2022 թվականի դեկտեմբերի 16-ին «Պետական կառավարման համակարգի մարմինների մասին» ՀՀ օրենքում կատարված փոփոխության արդյունքում միգրացիոն ծառայությունը վերանվանվել է Միգրացիայի և քաղաքացիության ծառայության, իսկ ՀՀ կառավարության 2023 թվականի հունվարի 5-ին N 17-Ա որոշմամբ Հայաստանի Հանրապետության կառավարության 2018 թվականի մայիսի 22-ի N 580-Ա որոշման մեջ կատարված փոփոխության արդյունքում՝ Միգրացիայի և քաղաքացիության ծառայությունը և ոստիկանությունը սահմանվել են որպես Ներքին գործերի նախարարությանը ենթակա մարմին։ Այս կապակցությամբ անհրաժեշտություն է առաջացել ՄՀՀ-ի կազմում փոփոխել համապատասխան պետական մարմինների անվանումները:

Բացի այդ, ՄՀՀ-ի կազմում նախատեսված է ընդգրկել հասարակական կազմակերպությունների յոթ ներկայացուցիչ: Հաշվի առնելով ՄԻԱՎ/ՁԻԱՀ-ի և տուբերկուլոզի ոլորտում ակտիվ գործունեություն ծավալող միջազգային հասարակական կազմակերպությունների սակավությունը, առաջարկվում է ՄՀՀ-ի կազմում ՀԿ-ների ներկայացուցիչների թիվը սահմանել վեց: Փոխարենը առաջարկվում է ՄՀՀ-ի կազմում ընդգրկել Միավորված ազգերի կազմակերպության երեք ներկայացուցիչ երկուսի փոխարեն:

Նախատեսվում է որպես ՄԱԿ-ի երրորդ ներկայացուցիչ ընդգրկել Միգրացիայի միջազգային կազմակերպության ներկայացուցչին: Վերջինիս ներգրավվածությունը կարևորվում է հատկապես միգրանտների և տեղահանված անձանց կարիքները ՄՀՀ-ի գործառույթների շրջանակներում առավել պատշաճ դիտարկելու և լուծելու, ինչպես նաև առողջապահական մարտահրավերների կառավարման տեսանկյունից` հաշվի առնելով այնպիսի գործոններ, ինչպիսիք են միգրացիոն միտումները, սահմանային առողջապահական խնդիրները և խոցելի բնակչության շարժունակությունը: Հարկ է նշել նաև, որ Միգրացիայի միջազգային կազմակերպությունը նախկինում ներկայացված է եղել ՄՀՀ-ի կազմում, ուստի վերջինիս ներկայացուցչի ներգրավվածությունը նշանակալի դեր կունենա ՄՀՀ-ի աշխատանքներում։

3. Առաջարկվող կարգավորման բնույթը․

Ներկայացված նախագծով նախատեսվում է փոփոխություններ կատարել Հայաստանի Հանրապետության վարչապետի 2021 թվականի ապրիլի 6-ի N347-Ա որոշմամբ ստեղծված ՄՀՀ-ի կազմում: Մասնավորապես`

- ՄՀՀ-ի կազմում նշված պաշտոնատար անձանց պաշտոնները համապատասխանեցնել համապատասխան պետական մարմինների անվանումներին,

- ՀԿ-ների ներկայացուցիչների թիվը սահմանել վեց` յոթի փոխարեն,

- Միավորված ազգերի կազմակերպության ներկայացուցիչների թիվը սահմանել երեք` երկուսի փոխարեն:

4. Նախագծի մշակման գործընթացում ներգրավված ինստիտուտները և անձինք․

Նա­­խագիծը մշակվել է Հայաստանի Հանրապետության առողջապահության նախարարության և Հայաստանի Հանրապետությունում ՄԻԱՎ/ՁԻԱՀ-ի, տուբերկուլոզի և մալարիայի դեմ ուղղված միջոցառումները համակարգող հանձնաժողովի քարտուղարության կողմից:

5. Նախագծի ընդունմամբ Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունների մասին․

Նախագծի ընդունման կապակցությամբ լրացուցիչ ֆինանսական միջոցների անհրաժեշտություն չի առաջանում, պետական բյուջեի եկամուտներում և ծախսերում փոփոխություններ չեն նախատեսվում։

6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ․

Որոշման նախագիծը չի բխում որևէ ռազմավարական փաստաթղթից: