«Հայաստանի Հանրապետության կառավարության 2023 թվականի նոյեմբերի 23-ի N 2017-Ն որոշման մեջ լրացումներ և փոփոխություն կատարելու մասին» ՀՀ կառավարության որոշման նախագիծ

ՏԵՂԵԿԱՆՔ-ՀԻՄՆԱՎՈՐՈՒՄ

«Հայաստանի Հանրապետության կառավարության 2023 թվականի նոյեմբերի 23-ի N 2017-Ն որոշման մեջ լրացումներ և փոփոխություն կատարելու մասին»  ՀՀ կառավարության որոշման նախագծի ընդունման

1. Անհրաժեշտությունը.

          Ներկայացված օրենսդրական նախագծի փաթեթով առաջարկվող իրավակարգավորումների անհրաժեշտությունը  պայմանավորված է.

• Հայաստանի Հանրապետության ռազմական նշանակության արտադրանքի ներմուծման և արտահանման, առևտրի միջնորդական գործունեության, տարանցիկ փոխադրման բնագավառը վերահսկող և կարգավորող իրավական ակտերի պահանջներին համապատասխանեցնելով:

2. Ընթացիկ իրավիճակը և խնդիրները.

Ներկա խմբագրությամբ Հայաստանի Հանրապետության կառավարության 2023 թվականի նոյեմբերի 23-ի № 2017-Ն որոշմամբ որպես թույլատվական փաստաթուղթ դիտարկվում են ռազմական նշանակության արտադրանքի արտահանման կամ ներմուծման լիցենզիան՝ այն ինչ Հայաստանի Հանրապետության կառավարության 2019 թվականի հոկտեմբերի 4-ի N 1408-Լ որոշմամբ նախատեսված «Մեկ կանգառ, մեկ պատուհան» համակարգում ընդգրկված են Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշմամբ նախատեսված ռազմական նշանակության արտադրանքի լիցենզիաների հիման վրա տրամադրվող ռազմական նշանակության արտադրանքի ներմուծման և արտահանման, տարանցիկ փոխադրման և առևտրի միջնորդական գործունեության եզրակացությունները՝ թույլտվությունները:

Ներկա խմբագրությամբ Հայաստանի Հանրապետության կառավարության 2023 թվականի նոյեմբերի 23-ի № 2017-Ն որոշմամբ ռազմական նշանակության արտադրանքի արտահանման կամ ներմուծման թույլատվական փաստաթղթի տրամադրման կամ մերժման ժամկետը սահմանված է համապատասխան հայտը գրանցելուց մեկ աշխատանքային օր:

  Ռազմական նշանակության արտադրանքի ներմուծման և արտահանման, առևտրի միջնորդական գործունեության, տարանցիկ փոխադրման լիցենզիաների հիման վրա տրամադրվող համապատասխան եզրակացությունները՝ թույլտվությունները տրամադրելու համապատասխան հայտը տեխնիկապես և ֆիզիկապես անհնար է մեկ աշխատանքային օրվա ընթաքում բավարարել կամ մերժել, քանի որ ներկայացված համապատասխան հայտը՝ համապատասխան առդիր փաստաթղթերով, ներկայացնում է միջգերատեսչական կառույցների՝ ՀՀ արտաքին գործերի նախարարության, Ներքին գործերի նախարարության, Բարձր տեխնոլոգիական արդյունաբերության նախարարության, Ազգային անվտանգության ծառայության և Պետական եկամուտների կոմիտեի համաձայնեցմանը:

Նշված մարմիններից ստացված դիրքորոշման հիման վրա ՀՀ պաշտպանության նախարարությունը որոշում է բավարարել կամ մերժել ռազմական նշանակության արտադրանքի արտահանման կամ ներմուծման, տարանցիկ փոխադրման, առևտրի միջնորդական գործունեության վերաբերյալ եզրակացություն (թույլտվություն) տրամադրելու հայտը:

3. Կարգավորման նպատակը և ակնկալվող արդյունքը.

Համապատասխանեցնել ռազմական նշանակության արտադրանքի ներմուծման և արտահանման, առևտրի միջնորդական գործունեության, տարանցիկ փոխադրման բնագավառը վերահսկող և կարգավորող Հայաստանի Հանրապետության կառավարության 2009 թվականի նոյեմբերի 12-ի № 1308-Ն որոշմամբ սահմանված պահանջներին:

4. Նախագծի մշակման գործընթացում ներգրավված ինստիտուտները

Նախագիծը մշակվել է Հայաստանի Հանրապետության պաշտպանության նախարարության կողմից:

5. Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին.

Նախագծի ընդունման կապակցությամբ ՀՀ պետական կամ տեղական ինքնակառավարման մարմնի բյուջեի ծախսերի և եկամուտների էական ավելացում կամ նվազեցում չի նախատեսվում:

6. Նախագծերի ընդունման առնչությամբ այլ իրավական ակտերի ընդունման անհրաժեշտության մասին.

Նախագծի ընդունումից հետո ենթաօրենսդրական նորմատիվ իրավական ակտերի նախագծերի մշակման և ընդունման անհրաժեշտությունը բացակայում է:

7. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

Նախագիծը չի բխում ռազմավարական հետևյալ փաստաթղթերից՝ Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ։