ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՅՈՒՋԵՏԱՅԻՆ ՀԱՄԱԿԱՐԳԻ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՅՈՒՋԵՏԱՅԻՆ ՀԱՄԱԿԱՐԳԻ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀՀ ՕՐԵՆՔԻ ՆԱԽԱԳԾԻ

1. Անհրաժեշտությունը

«Հայաստանի Հանրապետության բյուջետային համակարգի մասին» օրենքում փոփոխություններ և լրացումներ կատարելու մասին» ՀՀ օրենքի (այսուհետ` Օրենք) ընդունումը պայմանավորված է բյուջետային համակարգի երկրորդ մակարդակում` համայնքների բյուջեներում ելքերի (ներառյալ ծախսերի) դասակարգումն ըստ ծրագրերի և դրանց միջոցառումների ներկայացումը (ծրագրային դասակարգում) պարտադիր դարձնելու անհրաժեշտությամբ:

1. Կապը ռազմավարական փաստաթղթերի հետ

«ՀՀ բյուջետային համակարգի մասին» ՀՀ օրենքի 3-րդ հոդվածի 2-րդ մասի համաձայն՝ պետական և համայնքների բյուջեները հիմնվում են ֆինանսական, դրամավարկային և հարկային միասնական պետական քաղաքականության վրա: Բյուջեները կազմվում և կատարվում են` ըստ բյուջեների մուտքերի և ելքերի միասնական դասակարգման (Օրենքի 37-րդ հոդվածի 1-ին մաս): 

Համաձայն ՀՀ կառավարության 2019 թվականի նոյեմբերի 28-ի N 1716-Լ  որոշմամբ հաստատված «Պետական ֆինանսների կառավարման համակարգի 2019-2023 թվականների բարեփոխումների» ռազմավարության Բաղադրիչ 24-ի` «տեղական մարմինների բյուջեների կազմման, կատարման և եռամսյակային ու տարեկան հաշվետվությունների գործընթացները հետագա կանոնակարգման կարիք ունեն»: Այս բաղադրիչով սահմանվել է նպատակ` «տեղական ինքնակառավարման մարմիններում հանրային ֆինանսների կառավարման կարողությունների բարելավում և արդյունավետության բարձրացում»:

Համայնքների բյուջեների ելքերի (ներառյալ ծախսերի) դասակարգումն ըստ ծրագրերի և դրանց միջոցառումների ներկայացումը պարտադիր դարձնելը կնպաստի համայնքային մակարդակում ծախսերի իրականացման արդյունավետության բարձրացմանը:

1. Առաջարկվող կարգավորման բնույթը և ակնկալվող արդյունքը

Առաջարկվում է համայնքների բյուջեներում ծրագրային դասակարգմամբ ելքերի (ծախսերի) ներկայացումը դարձնել պարտադիր, որը կնպաստի համայնքային ֆինանսների նպատակային, խնայողաբար և արդյունավետ օգտագործմանը: Համայնքներում ավագանու որոշմամբ կհաստատավեն նաև համայնքի բյուջեի ելքերը (ծախսերը) ըստ ծրագրերի և դրանց միջոցառումների: Ավագանու որոշմամբ կհաստատվեն նաև վերջնական արդյունքները և միջոցառումների արդյունքային ցուցանիշները:

1. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները

Նախագծի ընդունման դեպքում Հայաստանի Հանրապետության պետական և տեղական ինքնակառավարման մարմնի բյուջեներում եկամուտների, ծախսերի և դեֆիցիտի մասով փոփոխություններ կատարելու անհրաժեշտություն չի առաջանա:

1. Նախագծերի ընդունման կապակցությամբ այլ իրավական ակտերում փոփոխություններ կամ լրացումներ կատարելու անհրաժեշտության եվ բացակայության մասին

Նախագծերի ընդունման կապակցությամբ այլ իրաական ակտերում փոփոխություններ կամ լրացումներ կատարելու անհրաժեշտություն չի առաջանա:

1. Նախագծերի մշակման գործընթացում ներգրավված ինստիտուտները և անձինք

Ներկայացված նախագիծը մշակվել է ՀՀ տարածքային կառավարման և ենթակառուցվածքների նախարարության կողմից Գերմանիայի միջազգային համագործակցության ընկերության օժանդակությամբ՝ «Լավ կառավարում Հարավային Կովկասում տեղական զարգացման ծրագրի» շրջանակներում իրականացվող «Աջակցություն Հայաստանի կառավարությանը տեղական մակարդակում ծրագրային բյուջետավորման ձևաչափի վերափոխման» գործողության շրջանակներում: