«Հայաստանի Հանրապետության հանրային ծառայությունները կարգավորող հանձնաժողովի 2017 թվականի ապրիլի 5-ի №124Ն որոշման մեջ փոփոխություն կատարելու մասին» ՀՀ հանրային ծառայությունները կարգավորող հանձնաժողովի որոշման նախագիծ

ՀԻՄՆԱՎՈՐՈՒՄ

«Հայաստանի Հանրապետության հանրային ծառայությունները կարգավորող հանձնաժողովի 2017 թվականի ապրիլի 5-ի №124Ն որոշման մեջ փոփոխություն կատարելու մասին» ՀՀ հանրային ծառայությունները կարգավորող հանձնաժողովի որոշման նախագծի վերաբերյալ

1. Ընթացիկ իրավիճակը և իրավական ակտի ընդունման անհրաժեշտությունը

ՀՀ հանրային ծառայությունները կարգավորող հանձնաժողովի 2017 թվականի ապրիլի 5-ի №124Ն որոշման 2-րդ կետի համաձայն՝ hանրային էլեկտրոնային հաղորդակցության ցանցի օպերատորների կողմից մինչև նշված որոշումն ուժի մեջ մտնելու պահը օգտագործվող «8xxx» համարները շարունակվում են օգտագործվել մինչ այդ պահը գործող սկզբունքով:

Միաժամանակ, հանձնաժողովի 2018 թվականի մարտի 21-ի №91Ա որոշմամբ սահմանվել է, որ «Տելեկոմ Արմենիա» ՓԲԸ-ն պարտավոր է մինչև 2023 թվականի հունվարի 1-ը հանձնաժողով ներկայացնել ընկերության հանրային էլեկտրոնային հաղորդակցության ցանցերի ներքին կարգավորումների նպատակով օգտագործվող «8xxx» կարճ կոդով ծառայությունների համարները հանձնաժողովի տնօրինմանը հանձնելու վերաբերյալ առաջարկ, որի կատարման շրջանակում ընկերությունը հայտնել է, որ հանձնաժողովի տնօրինմանն է հանձնում «8xxx» քառանիշ կոդի թվով 78 համար` միևնույն ժամանակ խնդրելով մնացած 59 համարները ներառել ընկերությանը տրամադրված համարների զբաղեցման թույլտվության մեջ՝ դրանց օգտագործման նպատակի ընտրության հնարավորությունը թողնելով «Տելեկոմ Արմենիա» ՓԲԸ-ին՝ հաշվի առնելով, որ ընկերությունն արդեն իսկ հանձնաժողովի տնօրինմանն է հանձնել ներքին կարգավորումների նպատակով օգտագործվող 330 համարներից 271 համար։

Հարկ է նշել, որ հանձնաժողովի վերոնշյալ իրավակարգավորումների նպատակն էր համարային ռեսուրսի արդյունավետ կառավարման և օգտագործման նկատառումներով՝ տվյալ կարճ կոդերի օգտագործման կանոնակարգումը, այդ թվում՝ բոլոր օպերատորների համար նշված կոդերի օգտագործմամբ ծառայություններ մատուցելու հավասար հնարավորության ընձեռումը, ներառյալ՝ «Տելեկոմ Արմենիա» ՓԲԸ-ի կողմից ներքին կարգավորումների նպատակով օգտագործվող համարները հանձնաժողովի տնօրինմանը հանձնելու և նշված ազատ համարային ռեսուրսն այլ օպերատորներին տրամադրելու հնարավորության ստեղծման միջոցով։  

Հաշվի առնելով վերոնշյալը և այն, որ նշված իրավակարգավորումներից բխող գործողություններն ապահովել են վերոնշյալ նպատակների իրականացումը, անհրաժեշտություն է առաջացել ուժը կորցրած ճանաչել հանձնաժողովի 2017 թվականի ապրիլի 5-ի №124Ն որոշման 2-րդ կետը։

2. Առաջարկվող կարգավորման բնույթը

          Նախագծով, առաջարկվում է 2017 թվականի ապրիլի 5-ի №124Ն որոշման 2-րդ կետը ուժը կորցրոծ ճանաչել։     

3. Նախագծի մշակման գործընթացում ներգրավված ինստիտուտները և ան­ձինք

          Որոշ­ման նախագիծը մշակել է ՀՀ հանրային ծառայությունները կարգավորող հանձնաժողովը:

4. Ակնկալվող արդյունքը

    Նախագծի ընդունման արդյունքում հնարավոր կլինի հանձնաժողովի տնօրինմանը հանձնված «8xxx» քառանիշ կոդի թվով 78 հեռախոսահամար ևս, ըստ անհրաժեշտության՝ առևտրային նպատակներով տրամադրել հեռախոսակապի օպերատորներին։