ՀԻՄՆԱՎՈՐՈՒՄ
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷԼԵԿՏՐԱԷՆԵՐԳԵՏԻԿԱԿԱՆ ՀԱՂՈՐԴՄԱՆ ՑԱՆՑԱՅԻՆ ԿԱՆՈՆՆԵՐԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2017 ԹՎԱԿԱՆԻ ՄԱՅԻՍԻ 17-Ի №161Ն ՈՐՈՇՈՒՄՆ ՈԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ ՈՐՈՇՄԱՆ ՆԱԽԱԳԾԻ ՎԵՐԱԲԵՐՅԱԼ
1. Իրավական ակտի ընդունման անհրաժեշտությունը
«Հայաստանի Հանրապետության էլեկտրաէներգետիկական հաղորդման ցանցային կանոնները հաստատելու և Հայաստանի Հանրապետության հանրային ծառայությունները կարգավորող հանձնաժողովի 2017 թվականի մայիսի 17-ի №161Ն որոշումն ուժը կորցրած ճանաչելու մասին» ՀՀ հանրային ծառայությունները կարգավորող հանձնաժողովի որոշման նախագծի (այսուհետ՝ նախագիծ) ընդունումը պայմանավորված է «Էներգետիկայի մասին» Հայաստանի Հանրապետության օրենքի 17-րդ հոդվածի 1-ին մասի «զ» կետի պահանջի կատարմամբ։
2. Ընթացիկ իրավիճակը և խնդիրները
Ներկայումս էլեկտրաէներգետիկական համակարգի օպերատորը համագործակցելով էլեկտրաէներգետիկական շուկայում լիցենզավորված գործունեություն իրականացնող անձանց հետ համակարգում է էլեկտրաէներգետիկական համակարգի զարգացման պլանավորումը, էլեկտրաէներգետիկական համակարգի օպերատիվ կառավարումը, էլեկտրաէներգետիկական համակարգում կարճաժամկետ պլանավորումը և կարգավարումը, էլեկտրաէներգիայի հաղորդման ցանցին նոր հզորությունների միացումը, էլեկտրաէներգետիկական համակարգում էլեկտրաէներգիայի հաշվառման համակարգերին ներկայացվող պահանջները, էլեկտրաէներգետիկական համակարգի աշխատանքի արդյունավետության բարձրացմանն ուղղված կանոնները և ընթացակարգերը:
էլեկտրաէներգետիկական համակարգի զարգացման պլանավորումը, կառավարումը ինչպես նաև էլեկտրաէներգետիկական համակարգի օպերատոր և էլեկտրաէներգետիկական շուկայում լիցենզավորված գործունեություն իրականացնող անձանց փոխհարաբերությունները կարգավորման և կարգավարման առումով, բարելավման կարիք ունեն: Էլեկտրաէներգետիկական համակարգի օպերատորը գործնականում վերլուծելով և գնահատելով գործող ցանցային կանոնները, ինչպես նաև Հայաստանի Հանրապետության օրենքի 37-րդ հոդվածի 2-րդ կետի պահանջից ելնելով լրամշակել է Հայաստանի Հանրապետության էլեկտրաէներգետիկական հաղորդման ցանցային կանոնների նախագիծը, որը համապատասխանեցված է էլեկտրաէներգետիկական շուկայի արդի պահանջներին և կարող է ապահովել Էլեկտրաէներգետիկական համակարգի՝ էլեկտրական էներգիայի արտադրության, հաղորդման և բաշխման կայանքների կառավարմանը, հաշվառմանը և զարգացմանը, ինչպես նաև համակարգի աշխատանքի արդյունավետության բարձրացմանը:
3. Կարգավորման նպատակը և բնույթը
Նախագծի նպատակն է կանոնակարգել Էլեկտրաէներգետիկական համակարգի աշխատանքը, կարգավորել Էլեկտրաէներգետիկական համակարգում Համակարգի օպերատորի, Արտադրողների, այդ թվում՝ Որակավորված արտադրողների, Հաղորդողի, Երաշխավորված մատակարարի, Բաշխողի, Շուկայի օպերատորի, Որակավորված սպառողների և Հայտատուի գործունեությունը, սահմանել վերջիններիս իրավունքներն ու պարտականությունները, ինչը հնարավորություն կընձեռի էլեկտրաէներգետիկական համակարգի օպերատորին ապահովել Էլեկտրաէներգետիկական համակարգի հուսալի և արդյունավետ աշխատանքը, ինչպես նաև ապահովել հաղորդման համակարգի բաց, թափանցիկ և ոչ խտրական հասանելիությունն ու օգտագործումը:
4. Նախագծի մշակման գործընթացում ներգրավված ինստիտուտները և անձինք
«Էլեկտրաէներգետիկական համակարգի օպերատոր» ՓԲԸ-ն, համագործակցելով էլեկտրաէներգետիկական շուկայում գործունեության լիցենզիա ունեցող անձանց հետ, լրամշակել է Հայաստանի Հանրապետության էլեկտրաէներգետիկական հաղորդման ցանցային կանոնները և ներկայացրել է Հայաստանի Հանրապետության հանրային ծառայությունները կարգավորող հանձնաժողովի հաստատմանը, ինչպես նաև ներկայացվել է էներգետիկայի բնագավառում Հայաստանի Հանրապետության կառավարության լիազոր մարմնի համաձայնեցմանը:
5. Ակնկալվող արդյունքը
Նախագծի լրամշակման արդյունքում նախատեսվում է ապահովել Էլեկտրաէներգետիկական համակարգի հուսալի և արդյունավետ աշխատանքը, հաղորդման համակարգի բաց, թափանցիկ և ոչ խտրական հասանելիությունն ու օգտագործումը, ինչպես նաև կարգավորել էլեկտրաէներգետիկական համակարգի օպերատորի և էլեկտրաէներգետիկական շուկայում լիցենզավորված գործունեություն իրականացնող անձանց փոխհարաբերությունները: