ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՐԱԳ ԱՐՁԱԳԱՆՔՄԱՆ ԲԺՇԿԱԿԱՆ ԽՈՒՄԲ ՍՏԵՂԾԵԼՈՒ, ԴՐԱ ԿԱՌՈՒՑՎԱԾՔԸ, ԿԱԶՄԸ, ՔԱՆԱԿԸ, ԳՈՐԾՈՒՆԵՈՒԹՅԱՆ ՀԱՄԱՐ ԱՆՀՐԱԺԵՇՏ ՄԻՋՈՑՆԵՐԻ ՑԱՆԿԸ, ԻՆՉՊԵՍ ՆԱԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԴՈՒՐՍ ՄԻՋԱԶԳԱՅԻՆ ՄԱՐԴԱՍԻՐԱԿԱՆ ԱՌԱՔԵԼՈՒԹՅՈՒՆՆԵՐԻՆ ՆԵՐԳՐԱՎՎԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

___________ 2025 թվական                   N ________-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՐԱԳ ԱՐՁԱԳԱՆՔՄԱՆ ԲԺՇԿԱԿԱՆ ԽՈՒՄԲ ՍՏԵՂԾԵԼՈՒ, ԴՐԱ ԿԱՌՈՒՑՎԱԾՔԸ, ԿԱԶՄԸ, ՔԱՆԱԿԸ, ԳՈՐԾՈՒՆԵՈՒԹՅԱՆ ՀԱՄԱՐ ԱՆՀՐԱԺԵՇՏ ՄԻՋՈՑՆԵՐԻ ՑԱՆԿԸ, ԻՆՉՊԵՍ ՆԱԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԴՈՒՐՍ ՄԻՋԱԶԳԱՅԻՆ ՄԱՐԴԱՍԻՐԱԿԱՆ ԱՌԱՔԵԼՈՒԹՅՈՒՆՆԵՐԻՆ ՆԵՐԳՐԱՎՎԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Բնակչության բժշկական օգնության և սպասարկման մասին» օրենքի 42.3-րդ հոդվածի 3-րդ մասի` Հայաստանի Հանրապետության կառավարությունը որոշում է.

1. Հայաստանի Հանրապետության առողջապահության նախարարության «Սուրբ Գրիգոր Լուսավորիչ բժշկական կենտրոն» փակ բաժնետիրական ընկերության (այսուհետ` բժշկական կենտրոն) հենքի վրա` բժշկական կենտրոնի բուժաշխատողների և Հայաստանի Հանրապետության ներքին գործերի նախարարության փրկարար ծառայության մասնագետների ներգրավմամբ ստեղծել Հայաստանի Հանրապետության Արագ արձագանքման բժշկական խումբ:

2. Սահմանել`

1) Հայաստանի Հանրապետության Արագ արձագանքման բժշկական խմբի կառուցվածքը, կազմը և քանակը` համաձայն հավելված 1-ի.

2) Հայաստանի Հանրապետության Արագ արձագանքման բժշկական խմբի գործունեության համար անհրաժեշտ միջոցների ցանկը` համաձայն հավելված 2-ի.

3) Հայաստանի Հանրապետության Արագ արձագանքման բժշկական խմբին Հայաստանի Հանրապետության տարածքից դուրս միջազգային մարդասիրական առաքելություններին ներգրավվելու կարգը` համաձայն հավելված 3-ի:

3. Թույլատրել Հայաստանի Հանրապետության առողջապահության նախարարությանն ունենալ Հայաստանի Հանրապետության պետական բյուջեից Հայաստանի Հանրապետության առողջապահության նախարարությանը հատկացվող միջոցների հաշվին 50.000 ԱՄՆ դոլարի չափով բանկային քարտային հաշվի չափաքանակ (բանկային վճարային քարտով)` Հայաստանի Հանրապետության տարածքից դուրս միջազգային մարդասիրական առաքելությունների ընթացքում տուժածներին բժշկական օգնություն և սպասարկում տրամադրելու համար արագ արձագանքում իրականացնելու նպատակով:

4. Հայաստանի Հանրապետության արագ արձագանքման բժշկական խմբի (այսուհետ` ՀՀ ԱԱԲԽ) գործունեության իրավական հիմքերն են Հայաստանի Հանրապետության Սահմանադրությունը, միջազգային պայմանագրերը, «Բնակչության բժշկական օգնության և սպասարկման մասին» օրենքը և այլ օրենքներ, օրենսդրական և ենթաօրենսդրական այլ ակտերը: ՀՀ ԱԱԲԽ-ն միջազգային մարդասիրական առաքելությունների ընթացքում առաջնորդվում է նաև Առողջապահության համաշխարհային կազմակերպության ուղեցույցերով, ինչպես նաև իր կողմից միջազգային լավագույն փորձի հիման վրա մշակված ստանդարտ գործելակարգերով (SOP):

5. Հայաստանի Հանրապետության առողջապահության նախարարին և Հայաստանի Հանրապետության ներքին գործերի նախարարին`

1) սույն որոշումն ուժի մեջ մտնելուց հետո երկամսյա ժամկետում համատեղ հաստատել ՀՀ ԱԱԲԽ-ի անհատական կազմը (հիմնական և պահեստային).

2) սույն որոշումն ուժի մեջ մտնելուց հետո եռամսյա ժամկետում սահմանել ՀՀ ԱԱԲԽ-ի անդամների գործառույթները.

3) ՀՀ ԱԱԲԽ-ի կազմում ընդգրկել հատուկ պատրաստություն անցած (համապատասխան դասընթացների և վարժանքների մասնակցած) անձանց:

6. Հայաստանի Հանրապետության առողջապահության նախարարին`

1) Առողջապահության համաշխարհային կազմակերպության ուղեցույցներին, չափորոշիչներին և տեխնիկական չափանիշներին համապատասխան` կազմակերպել ՀՀ ԱԱԲԽ-ի նախապատրաստումը, միջազգային հավաստագրման (դասակարգման) համար անհրաժեշտ փաստաթղթային փաթեթի կազմումը և ներկայացումը միջազգային հավաստագրման (դասակարգման).

2) իրականացնել ՀՀ ԱԱԲԽ-ի ընթացիկ աշխատանքների, այդ թվում` դասընթացների և վարժանքների պլանավորումը, կազմակերպումն ու համակարգումը.

3) իրականացնել ՀՀ ԱԱԲԽ ղեկավար կազմի (բացառությամբ նյութատեխնիկական ապահովման կազմի ղեկավարի և անվտանգության աշխատակցի) և կլինիկական կազմի (հիմնական և պահեստային) ընտրությունը.

4) ապահովել ՀՀ ԱԱԲԽ-ի գործունեության համար անհրաժեշտ միջոցների առկայությունը` Հայաստանի Հանրապետության առողջապահության նախարարությանը հատկացված միջոցների հաշվին:

7. Հայաստանի Հանրապետության ներքին գործերի նախարարին`

1) իրականացնել ՀՀ ԱԱԲԽ-ի նյութատեխնիկական ապահովման կազմի ղեկավարի, անվտանգության աշխատակցի և ՀՀ ԱԱԲԽ-ի նյութատեխնիկական ապահովման կազմի (հիմնական և պահեստային) ընտրությունը.

2) ապահովել ՀՀ ԱԱԲԽ-ի նյութատեխնիկական ապահովման կազմի մասնակցությունը ՀՀ ԱԱԲԽ-ի նախապատրաստական և ուսուցման գործընթացներին, ինչպես նաև Հայաստանի Հանրապետության առողջապահության նախարարության կողմից կազմակերպված դասընթացներին և վարժանքներին.

3) ՀՀ ԱԱԲԽ-ի դասընթացները և վարժանքներն անցկացնելու համար, ըստ անհրաժեշտության, տրամադրել համապատասխան դաշտային ուսումնական տեղամասեր Հայաստանի Հանրապետության ներքին գործերի նախարարության ուսումնավարժարաններում.

4) Հայաստանի Հանրապետության առողջապահության նախարարությանը ցուցաբերել տեսական, տեխնիկական և մեթոդական աջակցություն ՀՀ ԱԱԲԽ-ի նախապատրաստական և ուսուցման, աշխատանքների կազմակերպման, նյութատեխնիկական ապահովման գործընթացներում:

8. Կախված արտակարգ իրավիճակի բնույթից` Հայաստանի Հանրապետության առողջապահության նախարարի և Հայաստանի Հանրապետության ներքին գործերի նախարարի համատեղ հրամանով, խմբի կազմը կարող է փոփոխվել:

9. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: