«ՀՅՈՒՐԱՆՈՑԱՅԻՆ ՏՆՏԵՍՈՒԹՅԱՆ ՕԲՅԵԿՏՆԵՐԻՆ ՈՐԱԿԱՎՈՐՈՒՄ ՏՐԱՄԱԴՐՈՂ ԶԲՈՍԱՇՐՋԱՅԻՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ԱՆՁԱՆՑ ՄԻԱՎՈՐՄԱՆ ԸՆՏՐՈՒԹՅԱՆ ՉԱՓԱՆԻՇՆԵՐԸ ԵՎ ԿԱՐԳԸ ՀԱՍՏԱՏԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՀԻՄՆԱՎՈՐՈՒՄ

«ՀՅՈՒՐԱՆՈՑԱՅԻՆ ՏՆՏԵՍՈՒԹՅԱՆ ՕԲՅԵԿՏՆԵՐԻՆ ՈՐԱԿԱՎՈՐՈՒՄ ՏՐԱՄԱԴՐՈՂ ԶԲՈՍԱՇՐՋԱՅԻՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ԱՆՁԱՆՑ ՄԻԱՎՈՐՄԱՆ ԸՆՏՐՈՒԹՅԱՆ ՉԱՓԱՆԻՇՆԵՐԸ ԵՎ ԿԱՐԳԸ ՀԱՍՏԱՏԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Իրավական ակտի ընդունման անհրաժեշտությունը.
Նախագիծը ներկայացվում է ի կատարումն «Զբոսաշրջության մասին» Հայաստանի Հանրապետության օրենքի (այսուհետ՝ Օրենք) 13-րդ հոդվածի 5-րդ և 8-րդ մասերի։
Նախագծի անհրաժեշտությունն առաջացել է հյուրանոցային ծառայությունների՝ միջազգային չափանիշերին համապատասխան որակի ապահովման և որակավորման կարգերին համապատասխան ներկայացման ապահովման անհրաժեշտությունից: Սա հնարավորություն է նաև այն զբոսաշրջիկների համար, ովքեր ավելի բարձրորակ ծառայություններ են նախընտրում Հայաստանում` ստանալու համապատասխան սպասարկումը։ Բարձրակարգ հյուրանոցները նպաստում են նաև միջազգային ու ներքին շուկայում Հայաստանի դրական իմիջի ձևավորմանը: Եթե հյուրանոցներն իրենց տրված կարգին համապատասխան պայմաններ ուենան, ապա ազդեցությունը տուրիստական հոսքերի վրա ակնհայտ կլինի։
Հաշվի առնելով, որ միջազգային ստանդարտներին համապատասխան ծառայությունների համար չափանիշների ներդրումը ենթադրում է նաև որոշակի միջազգային կառույցներին անդամության հաստատում, արդյունքում՝ որոշակի ֆինանսական ծախս՝ ներկա փուլում նպատակահարմար է գտնվել որևէ զբոսաշրջային ծառայություն մատուցող անձանց միավորման միջոցով իրականացնել հյուրանոցային տնտեսության օբյեկտների որակավորման ընթացակարգը՝ ելնելով նաև մասնավոր հատվածը ներկայացնող կառույցների գործունեության ճկունության հանգամանքից։ Միավորման միջոցով կիրականացվի թե՛ միջազգային և թե՛ Հայաստանի Հանրապետությունում ընդունված չափանիշներին համապատասխան որակավորում։
2․ Ընթացիկ իրավիճակը և խնդիրները.
«Զբոսաշրջության և զբոսաշրջային գործունեության մասին» օրենքի համաձայն մինչ 2024 թվականը հյուրանոցային տնտեսության օբյեկտները կարող էին որակավորվել ՀՀ կառավարության՝ 2004 թվականի հունիսի 10-ի «Հյուրանոցային ծառայություններ մատուցելու կարգն ու պայմանները սահմանելու, հյուրանոցային տնտեսության օբյեկտների որակավորման կարգերը և որակավորման ընթացակարգը հաստատելու մասին» N 946-Ն որոշման շրջանակում։ Հայաստանում գործող հյուրանոցային տնտեսության օբյեկտներից վերջին մի քանի տարիների ընթացքում ընդամենը 3-ն են որակավորված եղել: Հյուրանոցների զգալի մասն իրենց չափանիշներով չեն բավարարում զբոսաշրջիկների պահանջները և չեն համապատասխանում որակավորման կարգեր ստանալու համար սահմանված նորմերին՝ հատկապես բարձր կարգերի համար։
Ներկայումս չի գործում որևէ շահագրգռող մեխանիզմ հյուրանոցային ծառայություն մատուցող անձանց համար որակավորվելու և համապատասխան որակավորման կարգով ներկայանալու համար, հատկապես եթե այդ անձանց կողմից շահագործվում են միջազգային ցանցի պատկանող հյուրանոցային տնտեսության օբյեկտներ։ Ուստի, «Զբոսաշրջության մասին» օրենքով սահմանվել է, որ հյուրանոցային տնտեսության օբյեկտների որակավորման գործընթացը կիրականացվի զբոսաշրջային ծառայություն մատուցող անձանց միավորման կողմից։ Միավորման ընտրության անհնարինության դեպքում որակավորման գործընթացը կիրականացնի Զբոսաշրջության կոմիտեն։
Վերոգրյալ խնդիրները հաշվի առնելով՝ անհրաժեշտություն է առաջացել ներդնել միջազգային չափանիշներին համապատասխան որակավորման համակարգ, որի իրականացման գործընթացը վերապահվել է մասնավոր հատվածը ներկայացնող կառույցին։
3․ Առաջարկվող կարգավորման բնույթը և նպատակը
Սույն նախագծով առաջարկվում է սահմանել հյուրանոցային տնտեսության օբյեկտներին որակավորում տրամադրող զբոսաշրջային ծառայություններ մատուցող անձանց միավորման ընտրության չափանիշները և կարգը։
4․Նախագծի մշակման գործընթացում ներգրավված ինստիտուտները և անձիք.
Նախագիծը մշակվել է Հայաստանի Հանրապետության էկոնոմիկայի նախարարության զբոսաշրջության կոմիտեի կողմից միջազգային գործընկերների և մասնավոր հատվածը ներկայացնող կազմակերպությունների հետ համագործակցությամբ։
5․ Իրավական ակտի կիրառման դեպքում ակնկալվող արդյունքները
Նախագծի ընդունումը կնպաստի հյուրանոցային ծառայությունների բարձր որակի, միջազգային չափանիշների համապատասխան որակավորման կարգի և տեղեկատվության հասանելիության ապահովմանը, ինչպես նաև ոլորտի ասոցիացիաների՝ զբոսաշրջային ծառայություն մատուցող անձանց միավորումների կայացմանը և ուժեղացմանը։
6․ Այլ տեղեկություններ
Նախագծի ընդունման դեպքում պետական բյուջեում կամ տեղական ինքնակառավարման մարմինների բյուջեներում նախատեսվում են ծախսերի և եկամուտների ավելացումներ:
7․ Կապը ռազմավարական փաստաթղթերի հետ
Նախագծերը բխում են Հայաստանի վերափոխման ռազմավարություն 2050-ի 16-րդ «Ճանաչված, հարգված և հյուրընկալ Հայաստան» մեգանպատակից և «Վերափոխենք հարյուր միլիոնավոր օտարերկրացիների և նրանց առաջնորդների վերաբերմունքը Հայաստանի հանդեպ» «Զանգվածային վերափոխման իմաստը»-ից (հղում՝ https://www.primeminister.am/u_files/file/Haytararutyunner/Armenia2050_7_5.pdf, 28-րդ և 70-րդ էջեր), Հայաստանի Հանրապետության կառավարության 2021-2026 թվականների ծրագրի «2 ՏՆՏԵՍՈՒԹՅՈՒՆ» կետի «Արտաքին տնտեսական քաղաքականություն և արտահանման խթանում» բաժնի 1-ին, 4-րդ, 5-րդ, 6-րդ պարբերություններից և «2.5 Զբոսաշրջություն» բաժնից (հղում՝ https://www.arlis.am/Annexes/6/2021_N1363hav.pdf, 27-րդ, 28-րդ և 38-39-րդ էջեր) և ՀՀ կառավարության 2021թ. նոյեմբերի 18-ի «Հայաստանի Հանրապետության կառավարության 2021-2026 թվականների գործունեության միջոցառումների ծրագիրը հաստատելու մասին» N 1902-Լ որոշմամբ հաստատված հավելված 1-ի «Էկոնոմիկայի նախարարություն» բաժնի 10․2 կետ (հղում՝ https://www.arlis.am/Annexes/6/2021_N1902hav.1.pdf 231-232-րդ էջ)։