ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2022 ԹՎԱԿԱՆԻ ՆՈՅԵՄԲԵՐԻ 10-Ի N 1744-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

1.

Անհրաժեշտությունը

Նախագծի անհրաժեշտությունը բխում է ՀՀ կառավարության 2021 թվականի ապրիլի 8-ի N 498-Լ որոշման 2-րդ հավելվածի 1․1-ին կետում նշված դրույթներից, որով նախատեսվում էր ՀՀ աշխատանքի և սոցիալական հարցերի նախարարության (այսուհետ՝ նախարարություն) ենթակայության տակ գտնվող և համագործակցող, խնամքի ծառայություններ տրամադրող կազմակերպություններում տարեց և (կամ) հաշմանդամություն, այդ թվում՝ հոգեկան առողջության տարաբնույթ խնդիրներ ունեցող շահառուների (այսուհետ՝ շահառուների) արժանապատիվ կենսական պայմանների ապահովման համար անհրաժեշտ օրենսդրական դաշտի վերանայում։

Միաժամանակ, 2023 թվականի հունվարի 12-ի N 2 արձանագրության քաղվածքի 22-րդ կետի պահանջով պետական կառավարման համակարգի մարմինների ղեկավարները՝ յուրաքանչյուրն իր մասով պետք է ուսումնասիրեին և վեր հանեին նախկինում ընդունված և մինչ օրս գործող իրավական ակտերը՝ դրանք համապատասխանեցնելով կառավարության կողմից որդեգրված ռազմավարությանը:

Նախագծի անհրաժեշտությունը բխում է նաև «Սոցիալական աջակցության մասին» ՀՀ նոր օրենքի (այսուհետ՝ Օրենք) ընդունմամբ, մասնավորապես՝ համապատասխանում է Օրենքի 8-րդ հոդվածի 1-ին մասի 14-րդ կետի, 42-րդ հոդվածի 2-րդ մասի դրույթներին, ինչպես նաև 2025 թվականի ֆինանսական միջոցի սղությունից, որով հնարավոր չէ իրականացնել խնամքի նոր տրամադրման չափորոշիչների կիրարկումը։

2.

Ընթացիկ իրավիճակը և խնդիրները

Ներկայումս շահառուների խնամքը տրամադրվում է ՀՀ կառավարության 2007 թվականի N 730-Ն որոշման և ՀՀ աշխատանքի և սոցիալական հարցերի նախարարի 2015 թվականի N 138-Ա/1 հրամանով, և երկու իրավական ակտերն էլ զուրկ են լիազորող նորմից։ Խնդիրը լուծելու համար 2022 թվականի նոյեմբերի 10-ին ընդունվել էր սույն որոշումը, որի՝ չափորոշիչների մասով կիրարկումը, սակայն, ֆինանսական միջոցի սղությամբ պայմանավորված՝ երկրորդ տարին հետաձգվում է։

3.

Կարգավորման նպատակը և բնույթը.

Ելնելով այն հանգամանքից, որ «Սոցիալական աջակցության մասին» օրենքում սահմանվում է, որ խնամքի տրամադրման չափորոշիչները հաստատում է ՀՀ աշխատանքի և սոցիալական հարցերի նախարարը, միաժամանակ հաշվի առնելով այն հանգամանքը, որ նախատեսվում է պահպանել 2024 թվականի տարեկան ֆինանսական չափաքանակները, սույն նախագիծը նպատակ ունի ուժը կորցրած ճանաչել ՀՀ կառավարության 2022 թվականի նոյեմբերի 10-ի N 1744-Ն որոշման՝ սննդի, հագուստի, սանիտարահիգիենիկ պարագաների և սպասքի վերաբերող մասերը, և հետագայում, գործող օրենսդրության համաձայն, չափորոշիչների վերաբերյալ նախարարի հրամանի նախագիծը շրջանառել և հաստատել արդեն 2026 թվականի հունվարի 1-ից։

Դրան զուգահեռ, նախագծում առկա են որոշ բովանդակային և խմբագրական բնույթի փոփոխություններ։ Բովանդակային փոփոխություններից է տրամադրվող խնամքի ձևերի ամրագրումը, քանի որ նոր օրենքում դրանք արդեն ամրագրված չեն, ինչպես նաև աջակցության քարտի հեռացումը, քանի որ դրա լիազորությունը նոր օրենքում չկա՝ ելնելով աջակցության քարտի ոչ նպատակահարմարությունից։

4.

Նախագծի մշակման գործընթացում ներգրավված ինստիտուտները և անձինք

     Որոշման նախագիծը մշակվել է ՀՀ աշխատանքի և սոցիալական հարցերի նախարարության կողմից:

5.

Ակնկալվող արդյունքը

Նախագծի ընդունման արդյունքում ակնկալվում է կատարելագործել սոցիալական պաշտպանության ոլորտի իրավական դաշտը, կարգավորել և հստակեցնել սոցիալական ծառայություններ տրամադրելու գործունեության հավաստագման հետ կապված որոշակի հարաբերություններ ։

6.

Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների վերաբերյալ

Սույն նախագծի ընդունումը Հայաստանի Հանրապետության 2024 թվականի և հետագա տարիների պետական բյուջեներում եկամուտների և ծախսերի ավելացում կամ նվազեցում, ինչպես նաև լրացուցիչ ֆինանսական միջոցների անհրաժեշտություն չի առաջացնում:

7.

«Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ»

Նախագիծը համապատասխանում է  Հայաստանի Հանրապետության կառավարության 2021 թվականի  նոյեմբերի 18  «Հայաստանի Հանրապետության կառավարության 2021-2026 թվականների գործունեության միջոցառումների ծրագիրը հաստատելու մասին» N 1902-Լ որոշմամբ հաստատված  ծրագրի 4.6՝ «Աշխատանք և սոցիալական պաշտպանության» բաժնի 25-րդ պարբերության դրույթներին, համաձայն որի նշված ժամանակահատվածում իրականացվելու է տարեցներին մատուցվող խնամքի ծառայությունների բարելավման և համայնքահեն ծառայությունների ներդրման ու զարգացման ծրագիրը՝ վերանայելով ողջ օրենսդրական դաշտը՝ ապահովելու տարեցների համար արժանապատիվ, առողջ և ակտիվ կենսակերպ, բարելավելու խնամքի որակը: