ՀԻՄՆԱՎՈՐՈՒՄ
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐԻ 2011 ԹՎԱԿԱՆԻ ԴԵԿՏԵՄԲԵՐԻ 30-Ի N 249-Ն ՀՐԱՄԱՆՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԵՆԹԱԿԱՌՈՒՑՎԱԾՔՆԵՐԻ ՆԱԽԱՐԱՐԻ ՀՐԱՄԱՆԻ ՆԱԽԱԳԾԻ
- Անհրաժեշտությունը – «Հայաստանի Հանրապետության էներգետիկայի և բնական պաշարների նախարարի 2011 թվականի դեկտեմբերի 30-ի N 249-Ն հրամանում փոփոխություն կատարելու մասին» ՏԿԵ նախարարի հրամանի նախագծի (այսուհետ՝ Նախագծի) ընդունումը բխում է Հայաստանի Հանրապետության կառավարության 2023 թվականի մայիսի 11-ի «Հանքարդյունաբերության ոլորտի զարգացման ռազմավարությունը և դրանից բխող գործողությունների պլանը (մինչև 2035 թվականը) հաստատելու մասին» N 730-Լ որոշման 1-ին կետի 2-րդ ենթակետով հաստատված հավելված 2-ի 2.2-րդ թիրախային ուղղության 3.2-րդ կետի 12-րդ ենթակետի պահանջից, համաձայն որի նախատեսվում է վերանայել հանքի փակման ծրագրերի պահանջները:
- Ընթացիկ իրավիճակը և խնդիրները – Ներկայումս հանքի փակման ծրագրին ներկայացվող պահանջները սահմանված են Հայաստանի Հանրապետության էներգետիկայի և բնական պաշարների նախարարի 2011 թվականի դեկտեմբերի 30-ի «Ընդերքօգտագործման իրավունք հայցելու դիմումին կից ներկայացվող բնության շրջակա միջավայրի վրա ազդեցության նախնական գնահատմանը, բնության շրջակա միջավայրի վրա ազդեցության գնահատմանը և հանքի փակման ծրագրին ներկայացվող պահանջների մասին» N 249-Ն հրամանի 3-րդ հավելվածով։ Անհրաժեշտություն է առաջացել վերանայել և թարմացնել վերոնշյալ հրամանի 3-րդ հավելվածով սահմանված պահանջները՝ դրանք համապատասխանեցնելով վերջին տարիներին միջազգային լավագույն փորձին համահունչ՝ ՀՀ օրենսդրությունում կատարված փոփոխություններին։
- Նախագծի մշակման գործընթացում ներգրավված ինստիտուտները և անձինք – Սույն նախագիծը մշակվել է ՀՀ տարածքային կառավարման և ենթակառուցվածքների նախարարության կողմից:
- Ակնկալվող արդյունքը – Հրամանի ընդունմամբ կթարմացվեն հանքի փակման ծրագրի կազմմանը ներկայացվող պահանջները, որի արդյունքում վերջինս կհամապատասխանի ՀՀ ընդերքի մասին օրենսգրքում, Շրջակա միջավայրի վրա ազդեցության գնահատման և փորձաքննության մասին օրենքում կատարված փոփոխություններին, ինչպես նաև համահունչ դարձնել Շրջակա միջավայրի նախարարի 2022 թվականի հոկտեմբերի 25-ի «Շրջակա միջավայրի վրա ազդեցության գնահատման դրույթների կիրարկման ուղեցույցները հաստատելու մասին» N 369-Ն հրամանի 1-ին կետի 3-րդ ենթակետով հաստատված «Հանքի փակման ծրագրի կազմման» ուղեցույցին։ Բարելավված և գործուն կարգավորումների պատշաճ կիրառումը կնվազեցնի հանքերի փակումից հետո շրջակա միջավայրի և մարդկանց առողջության վրա հնարավոր բացասական ազդեցությունները, կմեծացնի վերականգնված հողատարածքների երկարաժամկետ օգտագործման հնարավորությունը և կնպաստի կայուն ֆինանսական երաշխիքային համակարգի ձևավորմանը։ Խախտված տարածքների պատշաճ վերականգնման հաջողված դեպքերի միջոցով հանրության համար տեսանելի կդառնան հանքարդյունաբերության՝ շրջակա միջավայրի վրա ունեցած բացասական ազդեցությունը նվազեցնելու իրական հնարավորությունները։
- Ներկայացվող հարցի կապակցությամբ լրացուցիչ ֆինանսական միջոցների անհրաժեշտությունը և Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունները – Ներկայացված նախագծերի ընդունման կապակցությամբ պետական կամ տեղական ինքնակառավարման մարմնի բյուջեում եկամուտների և ծախսերի էական նվազեցում կամ ավելացում չի նախատեսվում:
- «Հայաստանի Հանրապետության Էներգետիկայի և բնական պաշարների նախարարի 2011 թվականի դեկտեմբերի 30-ի N 249-Ն հրամանում փոփոխություն կատարելու մասին» Տարածքային կառավարման և ենթակառուցվածքների նախարարի հրամանի ընդունման կապակցությամբ այլ նորմատիվ իրավական ակտերի ընդունման անհրաժեշտության մասին – Հրամանի ընդունումից հետո այլ նորմատիվ իրավական ակտերի ընդունման անհրաժեշտությունը բացակայում է։
- Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ - Ներկայացվող նախագծի մշակումը բխում է Հայաստանի Հանրապետության կառավարության 2023 թվականի մայիսի 11-ի «Հանքարդյունաբերության ոլորտի զարգացման ռազմավարությունը և դրանից բխող գործողությունների պլանը (մինչև 2035 թվականը) հաստատելու մասին» N 730-Լ որոշման 1-ին կետի 2-րդ ենթակետով հաստատված հավելված 2-ի 2.2-րդ թիրախային ուղղության 3.2-րդ կետի 12-րդ ենթակետի պահանջից: