ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ԱՏԵՍՏԱՎՈՐՎԱԾ ԿԱՄ ՏԱՐԱԿԱՐԳ ՍՏԱՑԱԾ ՄԱՆԿԱՎԱՐԺԱԿԱՆ ԱՇԽԱՏՈՂՆԵՐԻ ԴՐՈՒՅՔԱՉԱՓԻ ՓՈՓՈԽՈՒԹՅԱՆ ԵՎ ՀԱՎԵԼԱՎՃԱՐԻ ՍԱՀՄԱՆՄԱՆ ԿԱՐԳԸ ԵՎ ՉԱՓԸ ՀԱՍՏԱՏԵԼՈՒ ՄԱՍԻՆ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

__          ___________ի 2024 թվականի N    -Ն

ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ԱՏԵՍՏԱՎՈՐՎԱԾ ԿԱՄ ՏԱՐԱԿԱՐԳ ՍՏԱՑԱԾ ՄԱՆԿԱՎԱՐԺԱԿԱՆ ԱՇԽԱՏՈՂՆԵՐԻ ԴՐՈՒՅՔԱՉԱՓԻ ՓՈՓՈԽՈՒԹՅԱՆ ԵՎ ՀԱՎԵԼԱՎՃԱՐԻ ՍԱՀՄԱՆՄԱՆ ԿԱՐԳԸ ԵՎ ՉԱՓԸ ՀԱՍՏԱՏԵԼՈՒ ՄԱՍԻՆ

«Մասնագիտական  կրթության և ուսուցման մասին» Հայաստանի Հանրապետության օրենքի 18-րդ հոդվածի 1-ին մասի 7-րդ կետին համապատասխան` Հայաստանի Հանրապետության կառավարությունը որոշում է.

1. Հաստատել`

1) Մասնագիտական ուսումնական հաստատությունների ատեստավորված մանկավարժական աշխատողների դրույքաչափի փոփոխության և հավելավճարի սահմանման կարգը և չափը` համաձայն N 1 հավելվածի:

2) Մասնագիտական կրթական ծրագրեր իրականացնող ուսումնական հաստատությունների տարակարգ ստացած մանկավարժական աշխատողների հավելավճարի սահմանման կարգը և չափը` համաձայն N 2 հավելվածի:

2. Միջնակարգ կրթության երրորդ մակարդակին համապատասխան առարկայական ծրագիր վարող մանկավարժը կարող է ատեստավորվել և տարակարգ ստանալ «Հանրակրթության մասին» օրենքով սահմանված ուսուցչի ատեստավորման և տարակարգի շնորհման ընթացակարգերով:
3. Սույն որոշման 1-ին կետի 1-ին ենթակետն ուժի մեջ է մտնում 2024 թվականի դեկտեմբերի 1-ից, իսկ 2-րդ ենթակետը և միջնակարգ կրթության երրորդ մակարդակին համապատասխան առարկայական ծրագիր վարող մանկավարժական աշխատողի տարակարգի հավելավճարը՝ 2025 թվականի դեկտեմբերի 1-ից:

Կ Ա Ր Գ

ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ԱՏԵՍՏԱՎՈՐՎԱԾ ՄԱՆԿԱՎԱՐԺԱԿԱՆ ԱՇԽԱՏՈՂՆԵՐԻ ԴՐՈՒՅՔԱՉԱՓԻ ՓՈՓՈԽՈՒԹՅԱՆ ԵՎ ՀԱՎԵԼԱՎՃԱՐԻ ՍԱՀՄԱՆՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է արհեստագործական և միջին մասնագիտական կրթական ծրագրեր իրականացնող պետական ուսումնական հաստատությունների ատեստավորված մանկավարժական աշխատողների դրույքաչափի փոփոխության և հավելավճարի սահմանման իրավահարաբերությունները։
2. 2024 թվականի փետրվարի 7-ի ՀՀ կրթության, գիտության, մշակույթի և սպորտի նախարարի 07-Ն հրամանի 2-րդ հավելվածով հաստատված կարգի (այսուհետ՝ Ատեստավորման կարգ) 40-րդ կետի 1-ին, 2-րդ և 3-րդ ենթակետերով սահմանված արդյունք ցուցաբերած մանկավարժական աշխատողների դրույքաչափը փոխվում է՝ սահմանվելով 200.000 դրամ՝ մեկ դրույք զբաղվածության համար, որի նկատմամբ կիրառվում է համապատասխան չափով հավելավճարը: Սույն կետով սահմանված դրույքաչափը նվազեցման ենթակա չէ:
3. Ատեստավորումն անցած մանկավարժական աշխատողներին հավելավճար սահմանվում է Ատեստավորման կարգի 40-րդ կետի 1-3 ենթակետերով սահմանված դեպքերում` 5 տարի ժամկետով, հետևյալ տրամաբանությամբ՝

1) ատեստավորման 90-100 տոկոս արդյունք ցուցաբերելու դեպքում՝ 50 % հավելավճար՝ մեկ դրույք ծանրաբեռնվածության համար.

2) ատեստավորման 80-89 տոկոս արդյունք ցուցաբերելու դեպքում՝ 40 % հավելավճար՝ մեկ դրույք ծանրաբեռնվածության համար.

3) ատեստավորման 70-79 տոկոս արդյունք ցուցաբերելու դեպքում՝ 30 % դրամ հավելավճար՝ մեկ դրույք ծանրաբեռնվածության համար.

4) հավելավճարը հաշվարկվում է միայն ատեստավորված ուղղությամբ բոլոր հաստատություններում փաստացի դասավանդվող դրույքաչափերի նկատմամբ։

4. Մեկ հաստատությունից մանկավարժական աշխատողի այլ հաստատություն տեղափոխման արդյունքում հավելավճարը պահպանվում է:
5. Ատեստավորման կարգի 40-րդ կետի 1-3-րդ ենթակետերով սահմանված արդյունքների դեպքում մանկավարժական աշխատողը կարող է իր նախաձեռնությամբ երկրորդ անգամ դիմել և մասնակցել ատեստավորման գործընթացին`

1) նախորդ արդյունքին հավասար արդյունք ցուցաբերելու դեպքում մանկավարժական աշխատողի հավելավճարի չափը պահպանվում է, որի համար սահմանվում է հնգամյա նոր ժամկետ.

2) Ատեստավորման կարգի 40-րդ կետի 2-3-րդ ենթակետերով սահմանված արդյունք ցուցաբերած արդյունքի համեմատ ավելի բարձր արդյունք ցուցաբերելու դեպքում մանկավարժական աշխատողը հավելավճար է ստանում վերջին արդյունքի հիման վրա, որի համար սահմանվում է հավելավճար ստանալու հնգամյա նոր ժամկետ.

3) նախորդ արդյունքի համեմատ ավելի ցածր արդյունք ցուցաբերելու դեպքում հավելավճարը պահպանվում է արդեն սահմանված չափով և ժամկետով։

6. Ատեստավորում անցած մանկավարժական աշխատողը ատեստավորում անցած ուղղությամբ համատեղությամբ աշխատելու դեպքում հավելավճար ստանում է և՛ հիմնական, և՛ համատեղությամբ աշխատավայրից, որոնց հանրագումարային ծանրաբեռնվածությունը չի կարող գերազանցել աշխատանքային օրենսգրքով սահմանված առավելագույն աշխատաժամանակը:
7. Սույն կարգի 3-րդ կետով սահմանված հավելավճարները ներառում են աշխատավարձից վճարվող հարկերը, սոցիալական կամ օրենքով սահմանված պարտադիր այլ վճարներ։

Կ Ա Ր Գ

ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՏԱՐԱԿԱՐԳ ՍՏԱՑԱԾ ՄԱՆԿԱՎԱՐԺԱԿԱՆ ԱՇԽԱՏՈՂՆԵՐԻ ՀԱՎԵԼԱՎՃԱՐԻ ՍԱՀՄԱՆՄԱՆ ԵՎ ՀԱՎԵԼԱՎՃԱՐԻ ՉԱՓԻ

1. Սույն կարգով սահմանվում է արհեստագործական և միջին մասնագիտական կրթական ծրագրեր իրականացնող պետական ուսումնական հաստատությունների տարակարգ ստացած դասախոսի, վարպետի և հրահանգչի (այսուհետ՝ մանկավարժ) հավելավճար սահմանելու կարգը:
2. Կրթության պետական կառավարման լիազոր մարմնի կողմից սահմանված կարգով տարակարգ ստացած մանկավարժներին ուսումնական հաստատությանը հատկացված միջոցների հաշվին սահմանվում է հավելավճար երեք տարի ժամկետով՝

1) երրորդ աստիճանի տարակարգի համար` մանկավարժական դրույքի 50 տոկոսի չափով.

2) երկրորդ աստիճանի տարակարգի համար` մանկավարժական դրույքի 30 տոկոսի չափով.

3) առաջին աստիճանի տարակարգի համար` մանկավարժական դրույքի 20 տոկոսի չափով:

3. Ատեստավորման միջոցով որակավորման տարակարգ ստացած մանկավարժական աշխատողի հասանելիք հավելավճարը սահմանվում է յուրաքանչյուր ամիս` աշխատավարձի հետ միասին:
4. Համատեղությամբ արհեստագործական կամ միջին մասնագիտական կրթական ծրագրեր իրականացնող պետական այլ ուսումնական հաստատությունում դասավանդելու դեպքում տարակարգ ստացած մանկավարժին հավելավճար տրամադրվում է նաև տվյալ հաստատությունում:
5. Հանրային և մասնավոր ՄՈՒՀ-երի մանկավարժական աշխատողը կարող է լիազոր մարմնի սահմանած կարգով մասնակցել տարակարգի շնորհման գործընթացին ՄՈՒՀ-ի կամ սեփական և այլ ֆինանսական միջոցների հաշվին։