ՀԻՄՆԱՎՈՐՈՒՄ
«Հանրակրթական դպրոցներում, նախնական մասնագիտական (արհեստագործական)
և միջին մասնագիտական ուսումնական հաստատություններում նախազորակոչային պատրաստության կազմակերպման և անցկացման կարգը սահմանելու մասին»
ՀՀ կառավարության որոշման նախագծի ընդունման
1. Իրավական ակտի ընդունման անհրաժեշտությունը
Որոշման նախագծի ընդունումը պայմանավորված է «Պաշտպանության մասին» օրենքի 7-րդ հոդվածի 1-ին մասի 5-րդ կետի «դ» ենթակետի և «Զինվորական ծառայության և զինծառայողի կարգավիճակի մասին» օրենքների 18-րդ հոդվածի 1-ին մասի պահանջների համաձայն հանրակրթական դպրոցներում, նախնական մասնագիտական (արհեստագործական) և միջին մասնագիտական ուսումնական հաստատություններում նախազորակոչային պատրաստության կազմակերպման և անցկացման հետ կապված հարաբերությունները նորովի սահմանելու անհրաժեշտությամբ: Որոշման նախագծի ընդունումը բխում է նաև ՀՀ վարչապետի 22.02.2018թ. N 168-Ա որոշմամբ հաստատված ցանկի 21-րդ և 04.10.2022թ. N 1145-Ա որոշմամբ հաստատված ցանկի 3-րդ կետի կատարումն ապահովելու անհրաժեշտությունից:
2. Ընթացիկ իրավիճակը և խնդիրները
«Զինվորական ծառայության և զինծառայողի կարգավիճակի մասին» օրենքի 18-րդ հոդվածի 1-ին մասի պահանջների համաձայն՝ քաղաքացիներին զինվորական ծառայությանը նախապատրաստելու նպատակով հանրակրթական դպրոցներում, նախնական մասնագիտական (արհեստագործական) և միջին մասնագիտական ուսումնական հաստատություններում կազմակերպվում և անցկացվում է նախազորակոչային պատրաստություն` ՀՀ կառավարության սահմանած կարգով: Համապատասխան ուսումնական հաստատություններում նախազորակոչային պատրաստության իրականացման հետ կապված հարաբերությունները կարգավորվել են ՀՀ կառավարության 25.08.1999թ. N 532 որոշմամբ, որը կարիք ունի ամբողջական վերանայման, այդ թվում՝ ՀՀ Սահմանադրության 6-րդ հոդվածի պահանջների լույսի ներքո: Միաժամանակ, անհրաժեշտություն է առաջացել առավել խմբավորված և հստակ սահմանել նախազորակոչային պատրաստության նպատակները, համապատասխան ուսումնական հաստատություններում այդ գործընթացի կազմակերպման և անցկացման հետ կապված հարաբերությունները:
3. Կարգավորման նպատակը և բնույթը
Որոշման նախագծի համաձայն սահմանվում են քաղաքացիներին զինվորական ծառայությանը նախապատրաստելու նպատակով հանրակրթական դպրոցներում, նախնական մասնագիտական (արհեստագործական) և միջին մասնագիտական ուսումնական հաստատություններում նախազորակոչային պատրաստության կազմակերպման և անցկացման նպատակները, նախազորակոչային պատրաստություն առարկայի դասավանդման և գործնական (կրակային) պարապմունքների պայմաններն ու նյութատեխնիկական բազան, սովորողների նախազորակոչային պատրաստության գործընթացում իրավասու պետական մարմինների համագործակցության շրջանակները:
4. Լրացուցիչ ֆինանսական միջոցների անհրաժեշտությունը և պետական բյուջեի եկամուտներում ու ծախսերում սպասվելիք փոփոխությունները
Որոշման նախագծի ընդունումը պետական բյուջեի եկամուտներում ու ծախսերում սպասվելիք փոփոխությունների և լրացուցիչ ֆինանսական միջոցների անհրաժեշտություն չի առաջացնում:
5. Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ
Որոշման նախագիծը կապված չէ ռազմավարական փաստաթղթերի հետ: