Հ Ի Մ Ն Ա Վ Ո Ր ՈՒ Մ
«ԿԱԴԱՍՏՐԱՅԻՆ ՔԱՐՏԵԶՈՒՄ ՀԱՅՏՆԱԲԵՐՎԱԾ ՍԽԱԼՆԵՐԻ ՈՒՂՂՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ
- Կարգավորման ենթակա ոլորտի կամ խնդրի սահմանումը
Նախագծով սահմանվում է կադաստրային քարտեզներում համայնքների վարչական սահմանների, կադաստրային թաղամասերի տեղադիրքի և սահմանների, կադաստրային քարտեզի տեղեկատվության բազային կամ թեմատիկ շերտերում տեղ գտած սխալների ուղղման առանձնահատկությունները: Նախագծով կարգավորվում են կադաստրային քարտեզում առկա խնդիրները և անճշտությունները:
Նախագծով հատուկ կարգավիճակ է տրվում օրթոֆոտոհատակագծերին, որոնք ստեղծված կամ ընդունված են Կադաստրի կոմիտեի կողմից։ Նախատեսվում է, որ օրթոֆոտոհատակագծերով կատարված ուղղումներով սահմանները համարվելու են մոտավոր սահմաններ, իսկ հատուկ սարքերով կատարված ուղղումները՝ ճշգրիտ սահմաններ։
Նախագծով հաստատվող կարգով պարզեցվում է քարտեզների ուղղման ընթացքում համասեփականատերերի կողմից տրվող համաձայնությունների ընթացակարգը։
ՀՀ համայնքների կադաստրային քարտեզներում կադաստրային թաղամասերի սխալների ուղղման գործընթացը կազմակերպվելու է առանց անշարժ գույքի միավորի գծային չափերի, երկրաչափական տեսքի և մակերեսների փոփոխման՝ հնարավորինս համապատասխանեցնելով օրթոֆոտոհատակագծով պատկերված տեղանքին։
Նախածգով նախատեսվում է պիլոտային կարգով կիրառել ՀՀ Արարատի մարզի Արտաշատ քաղաքում, Շահումյան, Տափերական, Նոր Կյանք, Փոքր Վեդի և Լուսառատ համայնքներում: Կիրառության արդյունքում ի հայտ եկած թերությունները թույլ կտան ըստ անհրաժեշտության փոփոխություններ կատարել կարգում և կիրառել ՀՀ, ամբողջ տարածքում։
- Առկա իրավիճակը
Ներկայումս գործող էլեկտրոնային կադաստրային քարտեզներում հայտնաբերված անճշտությունների ուղղումը կատարվում է ՀՀ կառավարությանն առընթեր անշարժ գույքի կադաստրի պետական կոմիտեի նախագահի 2010 թվականի հունիսի 1-ի N 186-Ն հրամանի պահանջների համաձայն: Նշված հրամանի անհրաժեշտությունը պայմանավորված է եղել այն հանգամանքով, որ քարտեզագրական աշխատանքների ժամանակ օգտագործվել են տարբեր ճշտության սարքավորումներ և տարբեր կոորդինատային համակարգեր։
Միևնույն ժամանակ վերոգրյալ հրամանով նախատեսված կարգավորումները չեն բավարարում առաջացած խնդիրների լիարժեք և համապարփակ լուծմանը, հետևաբար անհրաժեշտություն է առաջացել ավելի պարզեցնելու կադաստրային քարտեզներում առկա սխալների ուղղման գործընթացը։
- Կարգավորման նպատակները, ակնկալվող արդյունքը
Նախագծով առաջարկվող կարգավորման նպատակը վերոգրյալ խնդիրների լուծումն է: Նախագծի ընդունմամբ հնարավորություն է տրվելու պարզեցված կարգով իրականացնելու կադաստրային քարտեզների ուղղումը:
- Իրավական ակտի նախագիծը մշակող պատասխանատու մարմինը
Նախագիծը մշակվել է Կադաստրի կոմիտեի կողմից:
- Նորմատիվ բնույթի հիմնավորվածությունը
Նախագիծը կազմելու համար հիմք են հանդիսացել «Նորմատիվ իրավական ակտերի մասին», «Գույքի նկատմամբ իրավունքների պետական գրանցման մասին» ՀՀ օրենքները, ՀՀ անշարժ գույքի կադաստրի պետական կոմիտեի նախագահի 2010 թվականի հուիսի 1-ի N 186-Ն հրամանը և ՀՀ կառավարության 2018 թվականի հունիսի 8-ի N 667-Լ որոշումը: