Արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանելու մասին ՀՀ կառավարության որոշման նախագիծ

ՀԻՄՆԱՎՈՐՈՒՄ

«ԱՐՏԱԿԱՐԳ ԻՐԱՎԻՃԱԿՆԵՐՈՒՄ ՔԱՂԱՔԱՑԻԱԿԱՆ ԱՎԻԱՑԻԱՅԻ ՕԴԱՆԱՎԱԿԱՅԱՆՆԵՐԻ ԳՈՐԾԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄԱՐՄԻՆՆԵՐԻ ՀԵՏ ՓՈԽՀԱՄԱԳՈՐԾԱԿՑՈՒԹՅԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ

1. Ընթացիկիրավիճակը և իրավական ակտի ընդունման անհրաժեշտությունը․

Արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանելու մասին» Հայաստանի Հանրապետության կառավարության որոշման նախագծի ընդունման անհրաժեշտությունը  բխում է «Ավիացիայի մասին» օրենքի 12-րդ հոդվածի 16-րդ մասի պահանջից, որի համաձայն արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանում է Կառավարությունը, ինչպես նաև ՀՀ վարչապետի 2025 թվականի հունվարի 6-ի «Խաղաղ նպատակներով ատոմային էներգիայի անվտանգ օգտագործման մասին» օրենքում լրացում կատարելու մասին» և «Ավիացիայի մասին» օրենքում լրացում կատարելու մասին» օրենքների կիրարկումն ապահովող միջոցառումների ցանկը հաստատելու մասին» թիվ 2-Ա որոշման պահանջներից։

Ներկայում գործող Հայաստանի Հանրապետության կառավարության 2017 թվականի փետրվարի 2-ի «Արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանելու» N 105-Ն որոշման մեջ ներառված պետական կառավարման համակարգի մարմինները չեն համապատասխանում 2018-2019 և 2023 թվականներին պետական կառավարման համակարգում կատարված կառուցվածքային և գործառույթային փոփոխություններին։

Միաժամանակ, սույն նախագծում, որը մշակվում է գործող կարգի հենքի վրա, բացի վերոնշյալ  կառուցվածքային և գործառույթային փոփոխություններից, կատարվում են նաև բովանդակային փոփոխություններ, մասնավորապես՝ արտակարգ իրավիճակների ժամանակ միջոցառումների, դրանց իրականացնող պատասխանատուների, գործողությունների հստակեցման, ընդգրկված աշխատանքային խմբերի գործունեության ակտիվացման մասով, այն առավել կատարելագործված և ժամանակի պահանջներին համահունչ դարձնելու համար։

2․ Կարգավորման նպատակը․

Սույն նախագծի ընդունման նպատակն է կարգավորել Հայաստանի Հանրապետության քաղաքացիական ավիացիայի օդանավակայանների և պետական կառավարման համակարգի մարմինների գործողություններն ու փոխհամագործակցության ուղղությունները` ՀՀ տարածքում առաջացած արտակարգ իրավիճակների արձագանքման, մարդասիրական օգնության և միջազգային փրկարարական ստորաբաժանումների ընդունման, ինչպես նաև ՀՀ կողմից մարդասիրական օգնության ու փրկարարական ստորաբաժանումների` այլ երկիր ուղարկման հիմնահարցերում: Խոշոր աղետի դեպքում միջազգային մարդասիրական օգնության, փրկարարական և հատուկ մասնագիտական ստորաբաժանումների գերակշիռ մասի ընդունումն իրականացվելու է Հայաստանի Հանրապետության քաղաքացիական ավիացիայի օդանավակայանների միջոցով, հետևաբար, կանոնակարգված գործելու նպատակով՝ սույն որոշմամբ սահմանվելու են Հայաստանի Հանրապետության քաղաքացիական ավիացիայի օդանավակայանների և պետական կառավարման համակարգի մարմինների միջև համագործակցության մեխանիզմները՝ ելնելով խոշոր աղետների դեպքում համակարգված և արդյունավետ գործելու առաջնահերթությունից։ Նախագծով առաջարկվում են նաև միջազգային օգնություն ընդունող երկրի աջակցության հստակ և առավել գործուն մեխանիզմներ, որը բխում է «Համապարփակ և ընդլայնված գործընկերության համաձայնագրի» (ՀԸԳՀ) ճանապարհային քարտեզի 87-րդ կետից (Ընդունող երկրի աջակցության մեխանիզմների ներդնում)։

3․ Ակնկալվող արդյունքը․

Սույն նախագծի ընդունման արդյունքում կբարելավվի արտակարգ իրավիճակների (աղետների) դեպքում պետական կառավարման համակարգի մարմինների և քաղաքացիական ավիացիայի օդանավակայանների հետ փոխհամագործակցությունը և հետագա պլանավորման գործընթացի արդյունավետության բարձրացմունը։

Միաժամանակ, նախագծի ընդունմամբ ներգրավված պետական կառավարման համակարգի մարմինները և քաղաքացիական ավիացիայի օդանավակայաններն իրենց փոխհամագործակցության պլաններում պետք է կատարեն համապատասխան փոփոխություններ, որը կնպաստի քաղաքացիական ավիացիայի ոլորտին առնչվող միջազգային հարթակներում ՀՀ քաղաքացիական ավիացիայի օդանավակայանների դիրքերի բարելավմանը, քանի որ այդ պլանների առկայությանը մեծ նշանակություն և կարևորություն է տրվում։

4․ Նախագծի մշակման գործընթացում ներգրավված ինստիտուտները և անձինք

          Նախագիծը մշակվել է ՀՀ ներքին գործերի նախարարության կողմից:

5․ Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին

Նախագծի ընդունմամբ լրացուցիչ ֆինանսական միջոցների ներգրավման անհրաժեշտություն առկա չէ:

6․ Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ․

1․ Հայաստանի վերափոխման ռազմավարություն 2050՝ Մեգանպատակ 02 «Պաշտպանված Հայաստան»․  Ապահովենք անհրաժեշտ և բավարար պայմաններ՝ Հայաստանի կենսական շահերի պաշտպանության, արտաքին ուժերի ռազմական, տեղեկատվական և կիբեր հարձակումների, ինչպես նաև բնածին, տեխնածին և մարդածին աղետների ռիսկերը կանխարգելելու, պատճառած կորուստները նվազեցնելու և արագ վերականգնվելու համար։ Որպես թիրախային արդյունք ունենալու ենք «2.4 Բնածին, տեխնածին և մարդածին աղետներին դիմակայելու պատրաստվածության բարձրագույն մակարդակ», ենթակետ «2.4.3 Համայնքների, ենթակառուցվածքների և շենք-շինությունների անվտանգության և բնակչության դիմակայունության մակարդակ»։

2․ Կառավարության 2021-2026թթ. ծրագրի «Անվտանգություն և արտաքին քաղաքականություն» գլուխ 1-ի «Աղետներին դիմակայունության բարձրացում» բաժին՝ «Անվտանգության ապահովման հիմնական գործոններից է լինելու աղետների ռիսկի կառավարման ճկուն ու գործուն համակարգը, որի ներդրման շնորհիվ կունենանք պաշտպանված բնակչություն, տնտեսություն, տարածքներ, ենթակառուցվածքներ, մշակութային ու բնապահպանական օբյեկտներ: Կատարելով ներդրումներ աղետների ռիսկի կառավարման ոլորտում՝ Կառավարությունն ուղղակի կանխարգելելու և ազդելու է աղետների առաջացման պատճառների վրա՝ խուսափելով հետևանքների վերացման համար պահանջվող անհամեմատ ավելի մեծ ծախսերից»: