Արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանելու մասին ՀՀ կառավարության որոշման նախագիծ

ՆԱԽԱԳԻԾ

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

 

Ո Ր Ո Շ ՈՒ Մ

 

____________ 2025 թվականի N ___-Ն

 

ԱՐՏԱԿԱՐԳ ԻՐԱՎԻՃԱԿՆԵՐՈՒՄ ՔԱՂԱՔԱՑԻԱԿԱՆ ԱՎԻԱՑԻԱՅԻ ՕԴԱՆԱՎԱԿԱՅԱՆՆԵՐԻ ԳՈՐԾԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄԱՐՄԻՆՆԵՐԻ ՀԵՏ ՓՈԽՀԱՄԱԳՈՐԾԱԿՑՈՒԹՅԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

 

         Ղեկավարվելով «Ավիացիայի մասին» օրենքի 12-րդ հոդվածի 16-րդ մասով և «Նորմատիվ իրավական ակտերի մասին» օրենքի 37-րդ հոդվածի 1-ին մասով` Հայաստանի Հանրապետության կառավարությունը որոշում է.

1. Սահմանել արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը` համաձայն հավելվածի:
2. Քաղաքացիական ավիացիայի կոմիտեի նախագահին՝ սույն որոշումն ուժի մեջ մտնելուց հետո եռամսյա ժամկետում ձեռնարկել քայլեր Հայաստանի Հանրապետությունում գործող քաղաքացիական ավիացիայի օդանավակայանների կողմից, սույն որոշման 1-ին կետով սահմանված կարգին համապատասխան, արտակարգ իրավիճակներում գործելու և Հայաստանի Հանրապետության պետական մարմինների հետ փոխհամագործակցության պլանի մշակման, սահմանված կարգով՝ Քաղաքացիական ավիացիայի կոմիտեի ու Հայաստանի Հանրապետության Ներքին գործերի նախարարության հետ համաձայնեցման և հաստատման ուղղությամբ:
3. Քաղաքացիական ավիացիայի կոմիտեի նախագահին և Հայաստանի Հանրապետության ներքին գործերի նախարարին` սույն որոշումն ուժի մեջ մտնելուց հետո 6-ամսյա ժամկետում, սույն որոշման 1-ին կետով սահմանված կարգին համապատասխան, մշակել արտակարգ իրավիճակներում ձեր գերատեսչության և համապատասխան քաղաքացիական ավիացիայի օդանավակայանների հետ փոխհամագործակցության պլանը, համաձայնեցնել միմյանց հետ և հաստատել:
4. Սույն որոշման 1-ին կետով սահմանված կարգի 2-րդ կետի 1-ին ենթակետի «գ»-ից «ժբ»-րդ պարբերություններում ընդգրկված մարմինների ղեկավարներին` սույն որոշումն ուժի մեջ մտնելուց հետո 6-ամսյա ժամկետում, սույն որոշման 1-ին կետով սահմանված կարգին համապատասխան, մշակել արտակարգ իրավիճակներում ձեր գերատեսչության և համապատասխան քաղաքացիական ավիացիայի օդանավակայանների հետ փոխհամագործակցության պլանը, համաձայնեցնել Քաղաքացիական ավիացիայի կոմիտեի ու Հայաստանի Հանրապետության ներքին գործերի նախարարության հետ և հաստատել:
5. Ուժը կորցրած ճանաչել Հայաստանի Հանրապետության կառավարության 2017 թվականի փետրվարի 2-ի «Արտակարգ իրավիճակներում քաղաքացիական ավիացիայի օդանավակայանների գործելու և Հայաստանի Հանրապետության պետական մարմինների հետ փոխհամագործակցության կարգը սահմանելու մասին» N 105-Ն որոշումը:
6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

                ՎԱՐՉԱՊԵՏ                                                                                                                                                                                                                                                            Ն․ ՓԱՇԻՆՅԱՆ

                                                                             Ք․ Երևան

 

 

 

Հավելված

ՀՀ կառավարության 2025 թվականի

______________ -ի N    -Ն որոշման

 

ԿԱՐԳ

ԱՐՏԱԿԱՐԳ ԻՐԱՎԻՃԱԿՆԵՐՈՒՄ ՔԱՂԱՔԱՑԻԱԿԱՆ ԱՎԻԱՑԻԱՅԻ ՕԴԱՆԱՎԱԿԱՅԱՆՆԵՐԻ ԳՈՐԾԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄԱՐՄԻՆՆԵՐԻ ՀԵՏ ՓՈԽՀԱՄԱԳՈՐԾԱԿՑՈՒԹՅԱՆ

                                                                     

1․ ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով սահմանվում են Հայաստանի Հանրապետության (այսուհետ` ՀՀ) քաղաքացիական ավիացիայի օդանավակայանների և ՀՀ պետական մարմինների գործողություններն ու փոխհամագործակցության ուղղությունները` ՀՀ տարածքում առաջացած արտակարգ իրավիճակների արձագանքման, միջազգային մարդասիրական օգնության, փրկարարական և հատուկ մասնագիտական ստորաբաժանումների ընդունման, ինչպես նաև ՀՀ կողմից մարդասիրական օգնության, փրկարարական և հատուկ մասնագիտական ստորաբաժանումների` այլ երկիր ուղարկման հիմնահարցերում:
2. Սույն կարգում ընդգրկված են հետևյալ ՀՀ պետական մարմինները, օգտագործվող հասկացությունները և հապավումները`

• կարգում ընդգրկված ՀՀ պետական մարմիններն են`

ա. Քաղաքացիական ավիացիայի կոմիտեն – ՔԱԿ,

բ.Ներքին գործերի նախարարությունը – ՆԳՆ,

գ. Տարածքային կառավարման և ենթակառուցվածքների նախարարությունը – ՏԿԵՆ,

դ. Առողջապահության նախարարությունը - ԱՆ,

ե. Պաշտպանության նախարարությունը - ՊՆ,

զ. Արտաքին գործերի նախարարությունը - ԱԳՆ,

է. Բարձր տեխնոլոգիական արդյունաբերության նախարարությունը – ԲՏԱՆ,

ը. Էկոնոմիկայի նախարարությունը – ԷՆ,

թ. Ազգային անվտանգության ծառայությունը - ԱԱԾ

ժ. Պետական եկամուտների կոմիտեն – ՊԵԿ,

ժա. Սննդամթերքի անվտանգության տեսչական մարմինը - ՍԱՏՄ,

ժբ․ Առողջապահական և աշխատանքի տեսչական մարմինը – ԱԱՏՄ,

ժգ․ Քաղաքաշինության կոմիտեն – ՔԿ․

• կարգում օգտագործված հասկացություններն ու հապավումներն են`

ա. օդանավակայանի անձնակազմ - օդանավակայանի հաստիքացուցակով հաստատված անձնակազմ, օդանավակայանում գործող` ՀՀ պետական կառավարման համակարգի մարմինների և կազմակերպությունների ստորաբաժանումների անձնակազմ,

բ. աղետ - համայնքի կամ հասարակության բնականոն կենսագործունեության խաթարում, որի հետևանքների վերացումը և հետաղետային վերականգնումը գերազանցում են համայնքի կամ հասարակության սեփական ուժերով հաղթահարելու կարողությունը,

գ. անձինք և ապրանքներ - ՀՀ պետական սահմանը հատող անձինք, բեռներ, ապրանքներ, ուղեբեռներ, փոստային առաքանիներ, մարդկանց դիակներ, կոնտեյներներ, տրանսպորտային միջոցներ,

դ. տարահանվողների հաշվառում - տարահանվողներին ուղեկցող օդանավակայանում ծառայություն իրականացնող ոստիկանների կամ օդանավակայանի համապատասխան ստորաբաժանման աշխատակիցների կողմից, տարահանվածների շրջանում, հարցման միջոցով չտարահանված կամ որևէ անձի կորելու մասին տեղեկատվության հավաքագրում,

ե. ԱԻ - արտակարգ իրավիճակ,

զ. ՓԾ - ՆԳՆ փրկարար ծառայություն,

է․ ՈՍ - ՆԳՆ ոստիկանություն,

ը. ՓԾ ՃԿԱԿ - ՆԳՆ փրկարար ծառայության ճգնաժամային կառավարման ազգային կենտրոն (վարչություն),

թ. ՓԾ ՃՔԿՄ- ճառագայթային, քիմիական, կենսաբանական մոնիթորինգ,

ժ. ՀԱԷԿ - Հայկական ատոմային էլեկտրակայան,

ժա. ՆՊՄԻ գոտի - նախահարձակ պաշտպանական միջոցառումների իրականացման գոտի (ՀԱԷԿ-ից 0-5 կմ շառավղով),

ժբ․ ՇՊՄՊ գոտի - շտապ պաշտպանական միջոցառումների պլանավորման գոտի (ՀԱԷԿ-ից 5-10 կմ շառավղով),

ժգ. ԵՊԳՊ գոտի - երկարաժամկետ պաշտպանական գործողությունների պլանավորման գոտի (ՀԱԷԿ-ին հարակից տարածք, որտեղ պլանավորվում են տեղական արտադրության սննդամթերքի և խմելու ջրի օգտագործման սահմանափակումներից ելնող, ինչպես նաև բնակչության քրոնիկ ճառագայթահարումը բացառող միջոցառումներ, որոնք կիրականացվեն վթարային հակազդման ազգային համակարգողի հրահանգների համաձայն` կարգավորող մարմնի առաջարկությունների հիման վրա)։

 

2․ ԱՐՏԱԿԱՐԳ ԻՐԱՎԻՃԱԿԻ ՍՊԱՌՆԱԼԻՔԻ ԿԱՄ ԱՌԱՋԱՑՄԱՆ ԴԵՊՔՈՒՄ ԳՈՐԾՈՂՈՒԹՅՈՒՆՆԵՐԻ ԿԱՐԳԸ

 

2․1․ Օդանավակայանի անձնակազմի և ուղևորների ազդարարումը

 

3. Օդանավակայանի շենք-շինություններում և տարածքում ԱԻ-ի սպառնալիքի կամ ծագման դեպքում իրականացվում է օդանավակայանի անձնակազմի ազդարարում և ուղևորների իրազեկում:
4. Օդանավակայանի անձնակազմի (տվյալ պահին օդանավակայանում գտնվող) ազդարարումն իրականացվում է առկա կապի միջոցներով (ռադիոկապ, բջջային, քաղաքային հեռախոսակապ, օդանավակայանի ներքին հեռախոսակապ և այլն):
5. Զուգահեռ իրականացվում է օդանավակայանի այն անձնակազմի ազդարարումը, որը տվյալ պահին չի գտնվում օդանավակայանում: Օդանավակայանի անձնակազմի անդամներից յուրաքանչյուրը, զգալով ուժեղ երկրաշարժ կամ տեսնելով ավերվածություններ կամ այլ աղբյուրներից տեղեկանալով աղետի մասին (ՀԱԷԿ-ի վթար), չազդարարվելու դեպքում, եթե չկան անձնական բնույթի խոչընդոտող հանգամանքներ (վիրավորվածություն, ընտանիքի անդամների վիրավորվածություն կամ կորուստ), կապ է հաստատում իր ստորաբաժանման ղեկավարի հետ կամ ժամանում է օդանավակայան:
6. Ուղևորների, դիմավորող/ճանապարհող քաղաքացիների և օդանավակայանի վարչական շենքում գործող կազմակերպությունների (սրճարաններ, մանրածախ առևտրի կետեր, բանկերի և ապահովագրական կազմակերպությունների մասնաճյուղեր, ծառայություններ մատուցող ձեռնարկությունների ու ավիաընկերությունների գրասենյակներ և այլն) աշխատողների իրազեկումն իրականացվում է օդանավակայանում գործող ընդհանուր հայտարարությունների համար նախատեսված ռադիոցանցի միջոցով (բարձրախոսային համակարգով և տեղեկատվական հեռուստացույցներով` հատուկ տեքստով): Ռադիոցանցի միջոցով հաղորդվում է տեղի ունեցած կամ սպառնացող ԱԻ-ի, ինչպես նաև առաջարկվող վարվելակերպի մասին տեղեկատվությունը:
7. Անձնակազմի ազդարարումը չի նախատեսվում իրականացնել օդանավակայանի` հայտարարությունների համար նախատեսված միջոցներով (բացառությամբ այն դեպքերի, երբ անհրաժեշտ է անհապաղ ազդարարել բոլորին` շտապ տարահանում իրականացնելու նպատակով)` ուղևորների շրջանում չհիմնավորված կամ լրացուցիչ խուճապի երևույթներից խուսափելու համար:
8. Օդանավակայանի անձնակազմի ազդարարման և ուղևորների իրազեկման համար պատասխանատու է օդանավակայանի համապատասխան ստորաբաժանումը: Ազդարարումն ու իրազեկումն իրականացվում է ներքին կապի միջոցների և ընդհանուր հայտարարությունների համակարգի միջոցով:

 

2․2․ Շահագրգիռ մարմինների ազդարարումը և տեղեկատվության փոխանակումը

 

9. Օդանավակայանի շենք-շինություններում և տարածքում ԱԻ-ի սպառնալիքի կամ ծագման դեպքում ազդարարմանը և իրազեկմանը զուգահեռ իրականացվում է տեղեկատվության հաղորդում` ՔԱԿ և ՆԳՆ ՓԾ ՃԿԱԿ` համաձայն նախապես մշակված սխեմայի:
10. Օդանավակայանի քաղավիացիայի կենտրոնական կարգավորման ծառայությունը կապ է հաստատում ՊՆ-ի օդանավակայանների հետ` տեղեկատվության փոխանակման, իրավիճակի պարզաբանման և թռիչքուղու օգտագործման հնարավորության նպատակով:
11. Օդանավակայանում գործող ՀՀ պետական կառավարման համակարգի մարմինների ստորաբաժանումների պատասխանատու աշխատողները կազմակերպում են ենթակա անձնակազմի ազդարարում և հավաք (նախապես որոշված վայրում), օդանավակայանում ստեղծված իրավիճակի մասին տեղեկատվությունը հաղորդում են ըստ վերադասության:
12. Սույն կարգի 11-րդ կետին զուգահեռ իրականացվում է օդանավակայանում գործող ՀՀ պետական կառավարման համակարգի մարմինների՝ տվյալ պահին օդանավակայանում չգտնվող, անձնակազմի ազդարարում: Յուրաքանչյուրը, զգալով ուժեղ երկրաշարժ կամ տեսնելով ավերվածություններ կամ այլ աղբյուրներից տեղեկանալով աղետի մասին (ՀԱԷԿ-ի վթար), չազդարարվելու դեպքում, եթե չկան անձնական բնույթի խոչընդոտող հանգամանքներ (վիրավորվածություն, ընտանիքի անդամների վիրավորվածություն կամ կորուստ), կապ է հաստատում իր ստորաբաժանման ղեկավարի հետ կամ ժամանում է օդանավակայան:
13. Ազդարարում իրականացնելն անհնար լինելու և ԱԻ-ի ակնհայտ հետևանքների առկայության դեպքում օդանավակայանի անձնակազմը հավաքվում է աշխատանքի վայրում կամ շինության հարակից անվտանգ տարածքում:

 

2․3․ Օդանավակայանի անխափան աշխատանքի կազմակերպումը

 

14. Օդանավակայանի ստորաբաժանումներն ամենօրյա գործունեության ժամանակ պետք է իրականացնեն իրավական, ինժեներատեխնիկական, կազմակերպչական և ապահովման համալիր միջոցառումներ ԱԻ-ում օդանավակայանի անխափան աշխատանքների ապահովման ուղղությամբ: Այդ միջոցառումները պլանավորվում և հաստատվում են յուրաքանչյուր տարվա վերջում՝ հաջորդ տարվա համար:
15. Օդանավակայանի անխափան աշխատանքների ապահովման միջոցառումները պետք է ուղղված լինեն ԱԻ-ի դեպքում օդանավակայանի ստորաբաժանումների գործունեության անընդհատությունն ապահովելուն կամ դրանց խափանման դեպքում արագ վերականգնելուն:

 

3․ ՈՒԺԵՂ ԵՐԿՐԱՇԱՐԺԻ ԴԵՊՔՈՒՄ ԳՈՐԾՈՂՈՒԹՅՈՒՆՆԵՐԻ ԿԱՐԳԸ

 

3.1. Հնարավոր իրավիճակներ և եզրակացություններ ուժեղ երկրաշարժի դեպքում

 

16. Ուժեղ երկրաշարժի դեպքում չվերթները դադարեցվում են մինչև օդանավակայանի համապատասխան ծառայությունների կողմից թռիչքուղին, օդանավակայանի օդային երթևեկության կառավարման կետը, օդանավակայանային և բեռնային համալիրները, վառելիքաքսայուղային նյութերի պահեստը, գազի կաթսայատունը ստուգվելը:
17. Ուժեղ երկրաշարժի դեպքում օդանավակայանի կողմից պետք է ապահովվի «Հայաէրոնավիգացիա» ՓԲԸ-ի աշխատանքների անընդհատությունը` այլ օդանավակայաններ չվերթների անհապաղ վայրէջքի անվտանգ կազմակերպման համար:

 

3.2. Տարահանման կազմակերպումը

 

18. Ուժեղ երկրաշարժի դեպքում օդանավակայանի ուղևորների, ճանապարհող/դիմավորող քաղաքացիների և անձնակազմի տարահանումն իրականացվում է հետևյալ սկզբունքով` տարահանվում են օդանավակայանի վարչական շենք-շինությանը հարակից անվտանգ և ազատ տարածք` համաձայն տարահանման սխեմաների (մշակվում է օդանավակայանի բոլոր շինությունների համար):
19. Յուրաքանչյուր շենք-շինությունից տարահանման տարածքները որոշվում են նախապես` համաձայն անվտանգության նորմերի` տվյալ շենքին հարակից ազատ տարածքներում, ինչպես նաև նախատեսվում են պահուստային շինություններ և տարածքներ` օդանավակայանի տարահանված անձնակազմի աշխատանքները շարունակելու համար:
20. Սպասասրահի ուղևորները, ճանապարհող/դիմավորող քաղաքացիները օդանավակայանում ծառայություն իրականացնող ոստիկանների ուղեկցմամբ տարահանվում են օդանավակայանի տարածքից դուրս:
21. Ավիացիոն անվտանգության զննման գոտում գտնվող և այդ գոտիով արդեն անցած ուղևորները, օդանավակայանի համապատասխան ստորաբաժանման աշխատակիցների ուղեկցմամբ, տարահանվում են թռիչքուղու անվտանգ տարածք:
22. Ավիացիոն անվտանգության զննման գոտում գտնվող և այդ գոտիով դեռ չանցած ուղևորները, օդանավակայանի համապատասխան ստորաբաժանման աշխատակիցների ուղեկցմամբ, տարահանվում են դեպի սպասասրահ, այնուհետ՝ օդանավակայանի տարածքից դուրս:

 

3.3. Տարահանվողների հաշվառում

 

23. Տարահանվողների հաշվառումն իրականացվում է տարահանման վայրում (վարչական շենք-շինության հարակից տարածք) հետևյալ կերպ`

• օդանավակայանի անձնակազմի` օդանավակայանի յուրաքանչյուր ստորաբաժանման ղեկավարն իրականացնում է տարահանված անձնակազմի հաշվառում (անձնակազմի այն անդամները, ովքեր տվյալ պահին գտնվում են օդանավակայանի այլ ստորաբաժանումում, տարահանվում են այդ ստորաբաժանման անձնակազմի հետ, այնուհետև իրենց մասին տեղեկատվությունը հաղորդում են իրենց ստորաբաժանման ղեկավարին).
• սպասասրահի ուղևորների, այդ թվում՝ ավիացիոն անվտանգության զննման գոտում գտնվող և այդ գոտիով դեռ չանցած ուղևորների, ճանապարհող/դիմավորող քաղաքացիների տարահանման հաշվառումն իրականացվում է իրենց ուղեկցող օդանավակայանում ծառայություն իրականացնող ոստիկանների կողմից.
• ավիացիոն անվտանգության զննման գոտում գտնվող և այդ գոտիով արդեն անցած ուղևորների տարահանման հաշվառումն իրականացվում է օդանավակայանի համապատասխան ստորաբաժանման աշխատակիցների և չվերթի համար պատասխանատու ավիաընկերության ներկայացուցչի կողմից` չվերթի ցուցակներին համապատասխան.
• հաշվառման արդյունքում չտարահանված կամ որևէ անձի կորելու մասին բացահայտված տվյալները փոխանցվում են ժամանած ՆԳՆ ՓԾ ստորաբաժանումներին` որոնողափրկարարական աշխատանքների կազմակերպման համար:

 

3.4. Վնասված շենք-շինությունների, այլ տարածքների հետագա շահագործման որոշումը և մուտքի ու ելքի արգելափակումը

 

24. Ուժեղ երկրաշարժի ցնցումներից հետո կազմակերպվում է օդանավակայանի շենք-շինությունների ինժեներական վիճակի գնահատում:
25. Ինժեներական վիճակի գնահատման ղեկավարը օդանավակայանի համապատասխան ստորաբաժանման պետն է: Ինժեներական վիճակի գնահատումն իրականացվում է շահագործման ստորաբաժանման անձնակազմի ուժերով: Այդ նպատակով օդանավակայանում ստեղծվում են խմբեր, որոնց անդամները պետք է ունենան շինարար-ճարտարագետի կրթություն և նախապես անցած լինեն համապատասխան վերապատրաստում:
26. Ինժեներական վիճակի գնահատումն իրականացվում է համաձայն սահմանված սխեմայի` ըստ օդանավակայանի հանգույցների կարևորության:
27. Ինժեներական վիճակի գնահատման յուրաքանչյուր խմբի ղեկավար զեկուցում է ընդհանուր ղեկավարին՝ գնահատում անցած շենք-շինության վիճակի մասին, այնուհետև ներկայացնում առաջարկություններ տվյալ շենք-շինության հետագա շահագործման կամ այդ շինությունում գործունեության ժամանակավոր դադարեցման մասին, որի հիման վրա օդանավակայանի ղեկավարը որոշում է ընդունում նշված շինության շահագործման կամ այդ շինությունում գործունեության դադարեցման մասին:
28. Անհրաժեշտության դեպքում, օդանավակայանի շենք-շինությունների ինժեներական վիճակի գնահատման համար հրավիրվում են համապատասխան մասնագետներ ՔԿ-ից և ՆԳՆ-ից ։
29. Հետագա շահագործմանը ոչ ենթակա շինությունը սահմանազատվում է ժապավենով, որտեղ արգելվում է անձնակազմի և քաղաքացիների մուտքն ու ելքը (շենք-շինության երևացող հատվածում նշվում է մուտքը արգելող նշանը և շենքում վտանգավոր նյութերի առկայության մասին տեղեկատվություն, եթե այդպիսին կա):
30. Հետագա շահագործմանը ոչ ենթակա այն հանգույցների համար, որոնց գործունեության արագ վերականգնումն անհրաժեշտ է օդանավակայանի գործելու համար, նախապես որոշվում են պահեստային/լրացուցիչ գործունեության իրականացման տարածքներ (նաև վրանների ծավալման եղանակով): Այդ տարածքները նախապես ապահովվում են համապատասխան հաղորդակցության միջոցներով (էլեկտրամատակարարման գծեր, համակարգչային ներքին ցանցի գծեր, ջրամատակարարում և գործունեության համար անհրաժեշտ այլ պարագաներ):

 

3.5. Որոնողափրկարարական աշխատանքների կազմակերպումը և իրականացումը

 

31. Օդանավակայանում տուժածների որոնողափրկարարական աշխատանքները մինչև ՆԳՆ ՓԾ ուժերի ժամանումը պետք է իրականացնեն օդանավակայանի հրշեջ ծառայությունը և նախապես ստեղծված որոնողափրկարարական խմբերը:
32. ՆԳՆ ՓԾ ուժերի ժամանումից հետո որոնողափրկարարական աշխատանքները ղեկավարում է ՆԳՆ ՓԾ-ն, իսկ օդանավակայանի հրշեջ ծառայության և օդանավակայանում նախապես ստեղծված որոնողափրկարարական խմբերն անցնում են ՆԳՆ ՓԾ-ի օպերատիվ ենթակայության տակ:
33. Օդանավակայանում չվերթների վերականգնումից հետո դադարեցվում է օդանավակայանի հրշեջ ծառայության ներգրավվածությունն որոնողափրկարարական աշխատանքներում:
34. Օդանավակայանում որոնողափրկարարական աշխատանքներ իրականացնող ՆԳՆ ՓԾ-ի յուրաքանչյուր ստորաբաժանմանը կցվում է օդանավակայանի պատասխանատու աշխատող:

 

3.6. Անհետաձգելի վթարավերականգնողական աշխատանքների կազմակերպումը

 

35. Օդանավակայանում անհետաձգելի վթարավերականգնողական աշխատանքներն իրականացվում են օդանավակայանի համապատասխան ստորաբաժանումների ուժերով:
36. Անհետաձգելի վթարավերականգնողական աշխատանքներն իրականացվում են ըստ նախապես սահմանված հերթականության և առաջնահերթ ուղղված են օդանավակայանի բնականոն աշխատանքային ռեժիմի վերականգնմանը, որը նախատեսում է օդանավակայանի այն հանգույցների վերականգնումը, որոնք պատասխանատու են կամ ապահովում են չվերթների ընդունումն ու ճանապարհումը:
37. Սույն կարգի 36-րդ կետի կատարումն ապահովելու նպատակով օդանավակայանում նախապես ստեղծվում են նյութական միջոցների պաշարներ, որոնք ենթակա են պարբերաբար թարմացման: Օդանավակայանի այն հանգույցների վթարները, որոնք չեն ազդում թռիչքների իրականացման կամ ապահովման վրա, կարող են չներառվել անհետաձգելի վթարավերականգնողական աշխատանքների մեջ` դրանց անդրադառնալով աղետի հետևանքների վերացման ժամանակ:
38. Վթարի ծավալների մեծ լինելու դեպքում օդանավակայանը հայտ է ներկայացնում ԱԻ-ի հանրապետական հանձնաժողով՝ անհետաձգելի վթարավերականգնողական աշխատանքներին լրացուցիչ ուժեր և միջոցներ ներգրավելու մասին:

 

4․ ԱՐՏԱԿԱՐԳ ԻՐԱՎԻՃԱԿՆԵՐՈՒՄ ՕԴԱՆԱՎԱԿԱՅԱՆԻ ԳՈՐԾՈՒՆԵՈՒԹՅԱՆ ԿԱՌԱՎԱՐՈՒՄԸ

 

39. ԱԻ-ի առաջացման ժամանակ օդանավակայանում գործում է օպերատիվ աշխատանքային խումբ (այսուհետ՝ ՕԱԽ):
40. ՕԱԽ-ի նպատակն է բարձրացնել ԱԻ-ում օդանավակայանի կառավարման արդյունավետությունը:
41. ՕԱԽ-ի խնդիրներն են`

• արձագանքող (օդանավակայանում գործունեությունը շարունակող) ծառայությունների միջև համագործակցության ապահովման աջակցումը.
• ժամանակին և արդյունավետ որոշումների ընդունմանը նպաստելը.
• օդանավակայանի անխափան աշխատանքի ապահովման աջակցումը:

42. ՕԱԽ-ն ղեկավարում է ՏԿԵՆ ներկայացուցիչը, որի տեղակալն է ՔԱԿ-ի ներկայացուցիչը: ՕԱԽ-ի կազմում ներգրավվում են ԲՏԱՆ-ի, ԱԳՆ-ի, օդանավակայանում գործունեություն իրականացնող ՀՀ պետական կառավարման համակարգի մարմինների համապատասխան ստորաբաժանումների և օդանավակայանի ստորաբաժանումների ներկայացուցիչները:
43. ՕԱԽ-ի գործունեության ակտիվացման որոշումը կայացնում է ՏԿԵՆ-ը։
44. ՕԱԽ-ի գործունեության ակտիվացման, անդամների հավաքի և գործունեության իրականացման վայրի մեկնման մասին ազդարարումն իրականացնում է ՓԾ ՃԿԱԿ-ը՝ համապատասխան գերատեսչությունների միջոցով։
45. Ազդարարումը ստանալուց հետո ՕԱԽ-ի ներկայացուցիչները ժամանում են օդանավակայան:
46. ՕԱԽ-ն իր գործունեությունն իրականացնում է օդանավակայանի տարածքում` նախապես որոշված աշխատանքային սենյակից, որը կահավորվում է անհրաժեշտ քանակի սարքավորումներով և գույքով, ապահովվում է բոլոր տեսակի կապի միջոցներով, այդ թվում` նաև ինտերնետային` օդանավակայանի բոլոր ծառայությունների աշխատանքն այդ վայրից համակարգելու և վերադաս, համագործակցող ու ենթակա ստորաբաժանումների հետ կապ ունենալու համար:
47. ՕԱԽ-ն կարող է գործել անընդմեջ: Խորհրդակցությունները կարող են հրավիրվել ՕԱԽ-ի ղեկավարի կամ այլ ծառայությունների կողմից անհապաղ լուծում պահանջող խնդիրների առկայության դեպքում:
48. ՕԱԽ-ն գործում է շուրջօրյա, այդ իսկ պատճառով ապահովվում են ՕԱԽ-ի անձնակազմի անդամների հերթափոխները, և կազմակերպվում է նրանց հանգիստը:
49. ԱԻ-ի առաջացման ժամանակ օդանավակայանում շուրջօրյա ուժեղացված աշխատանքները կազմակերպվում են օդանավակայանում գործող բոլոր ստորաբաժանումների և ծառայությունների համար, այդ իսկ պատճառով նախատեսվում է լրացուցիչ անձնակազմի ներգրավում:
50. Անհրաժեշտության դեպքում, համաձայն միջազգային պայմանագրերի, դիտարկվում է նաև փորձագետների ներգրավումն օդանավակայանի տարբեր օղակների աշխատանքներում:

 

5․ ՀԱՅԿԱԿԱՆ ԱՏՈՄԱՅԻՆ ԷԼԵԿՏՐԱԿԱՅԱՆԻ ՎԹԱՐԻ ԴԵՊՔՈՒՄ ԳՈՐԾՈՂՈՒԹՅՈՒՆՆԵՐԻ ԿԱՐԳԸ

 

51. ՀԱԷԿ-ի արտանախագծային վթարի դեպքում քաղաքացիական ավիացիայի օդանավակայաններն ըստ տեղակայման վայրի (ՀԱԷԿ-ի ՆՊՄԻ, ՇՊՄՊ, ԵՊԳՊ գոտիներ) իրականացնում են միջոցառումներ՝ ՀՀ կառավարության կողմից սահմանված Հայկական ատոմային էլեկտրակայանի միջուկային կամ ճառագայթային վթարների դեպքում բնակչության պաշտպանության ազգային պլանով (Հայկական ատոմային էլեկտրակայանի արտաքին վթարային պլան)։
52. Ուղևորների, դիմավորող/ճանապարհող քաղաքացիների և օդանավակայանի գործունեությունն ապահովող ստորաբաժանումների ու վարչական շենքում գործող կազմակերպությունների (սրճարաններ, խանութներ, գրասենյակներ և այլն) աշխատողների իրազեկումն իրականացվում է`

1) օդանավակայանում գործող ընդհանուր հայտարարությունների համար նախատեսված բարձրախոս համակարգով.

2) տեղեկատվական հեռուստացույցներով.

3) հատուկ տեքստով` «Ճառագայթային վտանգ: Օդանավակայանը դադարեցնում է գործունեությունը: Հետևեք հրահանգներին:», հայերեն, անգլերեն և ռուսերեն լեզուներով:

 

6․ ՀՐԴԵՀԻ ԴԵՊՔՈՒՄ ԳՈՐԾՈՂՈՒԹՅՈՒՆՆԵՐԻ ԿԱՐԳԸ

 

6.1. Հնարավոր իրավիճակը, հրդեհաշիջման աշխատանքների կազմակերպումը

 

53. Հրդեհի ծագման առավել հավանական վայրեր են վառելիքաքսայուղային նյութեր պարունակող պահեստները, օդանավակայանի գործունեությունը սպասարկող տեղամասերի էլեկտրակայանները, մեքենաների կայանատեղերը, անգարները, վարչական շենքերը, օդանավերի կայանատեղերը, պահեստները, սպասասրահները, բեռների տերմինալը, օդանավերը և այլն:
54. Օդանավակայանի տարածքում հրդեհի ծագման դեպքում, եթե տվյալ պահին չկան սպասարկվող չվերթներ, կամ ծագած հրդեհն առաջացրել է այնպիսի խոչընդոտներ, որոնց պատճառով հնարավոր չէ սպասարկել չվերթները, առաջնային արձագանքումը կազմակերպվում է օդանավակայանի հրշեջ ծառայության կողմից: ՆԳՆ ՓԾ-ի ուժերը ժամանելով՝ իրականացնում են հրդեհաշիջման ղեկավարումը՝ օդանավակայանի հրշեջ ծառայության ուժերի ներգրավմամբ:
55. Հրդեհի ծագման դեպքում օդանավակայանի ստորաբաժանումների կողմից իրականացվում են`
    • ազդարարում.
    • տեղեկատվության փոխանցում ՆԳՆ ՓԾ ՃԿԱԿ` համաձայն նախապես մշակված տեղեկատվության փոխանակման սխեմայի.
    • ՆԳՆ ՓԾ-ի ստորաբաժանումների դիմավորում և ուղեկցում.
    • մարդկանց տարահանում.
    • օդանավակայանի հրշեջ և անվտանգության ծառայությունների կողմից անմիջապես կազմակերպվում է մարդկանց փրկումը, եթե վտանգ է սպառնում նրանց կյանքին կամ առողջությանը.
    • վթարային վայրէջք կատարած օդանավի կողմից կամ այլ պատճառներով վնասված օդանավակայանի շենք-շինություններում հրդեհաշիջման և փրկարարական աշխատանքները ղեկավարում է օդանավակայան ժամանած ՆԳՆ ՓԾ-ի ստորաբաժանումների ղեկավարը: Օդանավակայանի հրշեջ ծառայության ներկայացուցիչը տվյալ դեպքում հրդեհաշիջման և փրկարարական աշխատանքների ուղղորդող խորհրդատու է.
    • օդանավակայանի տվյալ հատվածում դադարեցվում են բոլոր աշխատանքները, եթե դա թույլատրվում է օդանավակայանի գործունեության կանոններով, բացի այն աշխատանքներից, որոնք կապված են չվերթների սպասարկման հետ (եթե հրդեհը չի խոչընդոտում չվերթների սպասարկմանը).
    • կազմակերպվում են հրդեհի մեկուսացումը և շինությունների ծխապատումը կանխող միջոցառումներ.
    • ապահովվում է հրդեհաշիջման աշխատանքներում ներգրավված աշխատողների կողմից անվտանգության պահանջների կատարումը.
    • կազմակերպվում է ՆԳՆ ՓԾ-ի ստորաբաժանումների դիմավորում` համաձայն նախապես համաձայնեցված ցուցակի.
    • ՆԳՆ ՓԾ-ի հրշեջ-փրկարարական ստորաբաժանման ժամանումից հետո օդանավակայանի հրշեջ ծառայությունը ՆԳՆ ՓԾ-ի հրդեհաշիջման ղեկավարին ներկայացնում է օդանավակայանի կառուցվածքային և տեխնոլոգիական առանձնահատկությունների, հարակից շենքերի, շինությունների, պահվող, օգտագործվող նյութերի, դրանց հրդեհավտանգ հատկությունների մասին, հաղորդում է այլ տեղեկություններ, որոնք անհրաժեշտ են հրդեհաշիջման աշխատանքների համար, ինչպես նաև կազմակերպում է օդանավակայանի ուժերի և միջոցների ներգրավումը հրդեհի վերացման աշխատանքներում:

 

6.2. Վթարավերականգնողական աշխատանքների իրականացումը

 

56. Օդանավակայանի տարածքում վթարավերականգնողական աշխատանքներն իրականացվում են օդանավակայանի ուժերով և միջոցներով:

 

6.3. Օդանավի հրդեհի դեպքում գործողությունների իրականացումը

 

57. Օդանավի վթարային վայրէջքի դեպքում ծագած հրդեհի հրդեհաշիջման և ուղևորների ու օդանավի անձնակազմի փրկարարական աշխատանքների համար պատասխանատու է օդանավակայանի հրշեջ ծառայությունը:
58. Օդանավակայանի տարածքում օդանավում բռնկված հրդեհի դեպքում հրդեհաշիջման և փրկարարական աշխատանքներն իրականացնում է օդանավակայանի հրշեջ ծառայությունը (օդանավի հրդեհի դեպքում գործողությունները կանոնակարգվում են առանձին օպերատիվ հրդեհաշիջման պլաններով):
59. Վթարի մասին տեղեկատվությունն անհապաղ հաղորդվում է ՔԱԿ և ՆԳՆ ՓԾ ՃԿԱԿ:

 

6.4. Փրկարարական և հրդեհաշիջման աշխատանքների իրականացումը

 

60. Օդանավակայանի տարածքում վթարված օդանավի հրդեհաշիջման և որոնողափրկարարական աշխատանքներն իրականացվում են օդանավակայանի հրշեջ ծառայության ուժերով և միջոցներով:
61. Օդանավակայան ժամանած ՆԳՆ ՓԾ-ի հրդեհաշիջման և փրկարարական ուժերն անցնում են օդանավակայանի հրշեջ ծառայության ղեկավարի օպերատիվ ենթակայության տակ, եթե հրդեհաշիջման և փրկարարական աշխատանքներն իրականացվում են միայն օդանավի վրա:
62. Վթարային վայրէջք կատարած օդանավի կողմից կամ այլ պատճառներով վնասված շենք-շինություններում հրդեհաշիջման և փրկարարական աշխատանքները ղեկավարում է ՆԳՆ ՓԾ-ն: Օդանավակայանի հրշեջ ծառայության ներկայացուցիչը, տվյալ դեպքում հրդեհաշիջման և փրկարարական աշխատանքների խորհրդատու է:
63. Փրկված ուղևորներին ԱՆ-ի կողմից տրամադրվում է բժշկական օգնություն և սպասարկում, անհրաժեշտության դեպքում` նաև հոգեբանական աջակցություն, իսկ ՆԳՆ ՓԾ-ի կողմից իրականացվում է օդանավի ու աղետի վայրի ճառագայթային, քիմիական, կենսաբանական իրավիճակի գնահատում` անկախ վթարված օդանավում վտանգավոր նյութերի առկայության մասին նախնական տեղեկատվության:
64. Օդանավի կորելու, աղետալի իրավիճակում հայտնվելու, պատահարի կամ օդային երթևեկությանն այլ վտանգ սպառնալու դեպքում անհրաժեշտ միջոցառումներն իրականացվում են ՀՀ կառավարության 2008 թվականի սեպտեմբերի 11-ի N 1043-Ն որոշման համաձայն:

 

6.5. Վերականգնողական աշխատանքների իրականացումը

 

65. Օդանավակայանի տարածքում օդանավի վթարի դեպքում հետևանքների վերացման աշխատանքներն իրականացվում են տվյալ չվերթն իրականացնող ավիաընկերության և օդանավակայանի միջև կնքված պայմանագրի և (կամ) միջազգային պայմանագրերով սահմանված դրույթների համաձայն:
66. Անհրաժեշտության դեպքում ՆԳՆ ՓԾ-ի միջնորդությամբ կարող են ընդգրկվել այլ ուժեր և միջոցներ, որոնց ներգրավման հետ կապված ծախսերը նույնպես կարգավորվում են չվերթն իրականացնող ավիաընկերության և միջազգային պայմանագրերով սահմանված դրույթների համաձայն:
67. ՃԱՌԱԳԱՅԹԱՅԻՆ, ՔԻՄԻԱԿԱՆ, ԿԵՆՍԱԲԱՆԱԿԱՆ ԳՈՐԾՈՆՆԵՐՈՎ ՊԱՅՄԱՆԱՎՈՐՎԱԾ (ԱՐՏԱՀՈՍՔՈՎ/ԱՐՏԱՆԵՏՄԱՄԲ) ՏՐԱՆՍՊՈՐՏԱՅԻՆ ՊԱՏԱՀԱՐՆԵՐԻ ԴԵՊՔՈՒՄ ԱԻ-Ի ԳՈՐԾՈՂՈՒԹՅՈՒՆՆԵՐԻ ԿԱՐԳԸ

 

7.1. Հնարավոր իրավիճակը

 

67. Օդանավակայանի տարածքում կենսաբանական վտանգավոր երևույթներով, քիմիական և ռադիոակտիվ նյութերի արտահոսքով/արտանետմամբ ուղղորդվող արտակարգ իրավիճակներ են դիտարկվում կենսաբանական, քիմիական վտանգավոր և ճառագայթաակտիվ նյութեր տեղափոխող կոնտեյների ապահերմետիկացումը կամ վարակված բեռների/ուղևորների մուտքը ՀՀ տարածք:
68. Օդանավակայանում կենսաբանական, քիմիական, ճառագայթային գործոններով պայմանավորված ԱԻ-ի ժամանակ գործողություններն իրականացվում են` համաձայն ՀՀ կառավարության 2012 թվականի հունիսի 22-ի N 777-Ն որոշման պահանջների:
69. «Արտակարգ դրության իրավական ռեժիմի մասին» և «Բնակչության սանիտարահամաճարակային անվտանգության ապահովման մասին» ՀՀ օրենքներով սահմանված կարգով կարանտին սահմանելու դեպքում քաղաքացիական ավիացիայի օդանավակայաններում իրականացվող միջոցառումները կանոնակարգվում են կարանտին սահմանելու վերաբերյալ ՀՀ կառավարության համապատասխան որոշմամբ սահմանված միջոցառումներով:

 

7.2. Տարահանումը/պատսպարումը

 

70. Օդանավակայանի տարածքում քիմիական վտանգավոր և ռադիոակտիվ նյութերի արտահոսքով/արտանետմամբ պայմանավորված վթարի դեպքում օդանավակայանի շահագործման ծառայության կողմից իրականացվում է օդանավակայանի անձնակազմի, ուղևորների և շահագրգիռ մարմինների ազդարարում` սույն կարգի 2-րդ գլխի 2.1-ին և 2.2-րդ բաժինների համաձայն:
71. Կախված արտանետված նյութից (եթե դրա մասին կա մանրամասն նկարագիր` փաստաթղթեր/տեղեկատվություն)` կազմակերպվում է օդանավակայանի անձնակազմի և մարդկանց պատսպարում, տարահանում կամ որոշակի տարածքներ մուտքի ու ելքի արգելափակում:
72. Եթե նյութի վերաբերյալ կամ այդ նյութի արտահոսքի/արտանետման ժամանակ հայտնի չեն հստակ վարվելակերպի կանոններ, ապա իրականացվում է միայն օդանավակայանի անձնակազմի և այնտեղ գտնվող մարդկանց պատսպարում:
73. Մինչև ՓԾ-ի և ՈՍ-ի հիմնական ուժերի ժամանումը, վարակված հատվածի սահմանազատումը (միայն անհատական պաշտպանության միջոցների (այսուհետ` ԱՊՄ) առկայության դեպքում), ինչպես նաև դեպի օդանավակայան մարդկանց ժամանման ժամանակավոր դադարեցումն իրականացվում է օդանավակայանի անվտանգության ստորաբաժանման աշխատողների և օդանավակայանում ծառայություն իրականացնող ոստիկանների ուժերով:

 

7.3. Ճառագայթային, քիմիական, կենսաբանական իրավիճակի գնահատման

կազմակերպումը

 

74. Օդանավակայանի անձնակազմի ազդարարման և մարդկանց իրազեկմանը զուգահեռ իրականացվում է տեղեկատվության հաղորդում ՓԾ ՃԿԱԿ, կազմակերպվում է ՓԾ ՃՔԿՄ-ի թիմի դիմավորում և ուղղորդում վթարի վայր` օդանավակայանի տարածքում ճառագայթային, քիմիական, կենսաբանական իրավիճակի գնահատման կազմակերպման և իրականացման նպատակով:

 

7.4. Ճառագայթային, քիմիական, կենսաբանական մոնիթորինգի իրականացումը

 

75. Մինչև ՃՔԿՄ-ի ավարտը ՆԳՆ-ի և ՔԱԿ-ի համաձայնության դեպքում կարող են չվերթները ժամանակավոր դադարեցվել:
76. Մոնիթորինգի արդյունքում որոշվում են`
    • վարակված հատվածը և վարակազերծման ձևը.
    • հետագա վարվելակերպի կանոնները.
    • օդանավակայանի գործունեության վերսկսման հնարավորությունն ու ժամկետը:
77. Օդանավակայանի գործունեության վերսկսման որոշումը կայացվում է օդանավակայանի ղեկավարության կողմից` ՆԳՆ-ի և ՔԱԿ-ի առաջարկությունների հիման վրա:

 

7.5. Գործողություններ` կենսաբանական գործոնով պայմանավորված

միջադեպերի և մարդկանց զանգվածային վարակվածության դեպքերում

 

78. Օդանավակայանում` կենսաբանական գործոնով պայմանավորված ԱԻ-ի առաջացնող դեպքերն են`
    • Առողջապահության համաշխարհային կազմակերպության կողմից հրապարակված, բնակչության սանիտարահամաճարակային անվտանգության ապահովման բնագավառում ԱԻ-ի առաջացնելու ներուժ ունեցող վարակիչ հիվանդությունների (այսուհետև` վարակիչ հիվանդություններ) կասկածելի դեպքերի արձանագրումը.
    • փոխադրամիջոցում վարակիչ հիվանդությունների առումով անապահով տարածքներից, բռնկում, համաճարակ արձանագրած երկրներից տարանցիկ չվերթով ժամանած անձանց առկայությունը.
    • վարակիչ հիվանդությունների առումով անապահով տարածքներից, բռնկում, համաճարակ արձանագրած երկրից (երկրներից) փոխադրամիջոցի ժամանումը.
    • վարակիչ հիվանդությունների առումով անապահով տարածքներից, բռնկում, համաճարակ արձանագրած երկրից (երկրներից) փաթեթավորման ամբողջականության խախտմամբ, նախկինում օգտագործած հագուստի, անկողնային պարագաների, սպասքի, կենցաղային օգտագործման այլ իրերի, խաղալիքների միջազգային փոստային փոխադրումը.
    • կենսաբանական գործոնով աղտոտված բեռների, ապրանքների և տրանսպորտային միջոցների հայտնաբերումը:
79. ԱԱՏՄ-ն ուժեղացնում է սանիտարակարանտինային վերահսկողությունը, անհրաժեշտության դեպքում նաև կազմակերպում է առողջապահական միջոցառումներ՝ բժշկական, կանխարգելիչ, սահմանափակող: Այս նպատակով օդանավակայանի կողմից հատկացվում է համապատասխան տարածք` միջոցառումներ իրականացնելու համար՝ համաձայն ՀՀ կառավարության 2012 թվականի հունիսի 22-ի N 777-Ն որոշման պահանջների:
80. ՍԱՏՄ-ի կողմից իրականացվում է վերահսկողություն ներմուծվող սննդամթերքի, սննդամթերքի հետ անմիջական շփման մեջ գտնվող նյութերի, անասնաբուժական և բուսասանիտարական հսկման ենթակա ապրանքների, ինչպես նաև պեստիցիդների և ագրոքիմիկատների նկատմամբ:
81. Իրականացվում է կենդանիների կարանտինային, հատուկ վտանգավոր և պարտադիր ծանուցման ենթակա վարակիչ հիվանդությունների ախտորոշում: Կենդանիների կարանտինային, հատուկ վտանգավոր և պարտադիր ծանուցման ենթակա վարակիչ հիվանդությունների ախտորոշումը հաստատվելուց հետո ՍԱՏՄ-ն առաջարկություն է ներկայացնում տարածքային կառավարման մարմիններ` կարանտին սահմանելու, իսկ կարանտինային հիվանդություն չհանդիսացող հիվանդությունների դեպքում սահմանափակումներ կիրառելու վերաբերյալ, և իրականացվում են հակաանասնահամաճարակային համապատասխան միջոցառումներ:
82. Մարդու և կենդանիների համար ընդհանուր վարակիչ հիվանդությունների հայտնաբերման դեպքում ԱՆ-ն ԱԱՏՄ-ի և ՍԱՏՄ-ի հետ համատեղ իրականացնում են հակահամաճարակային միջոցառումներ:
83. Սույն կարգի 78-րդ կետում նշված դեպքերում անձանց և ապրանքների առաջնային հսկողությունն իրականացվում է ըստ համապատասխան սարքավորումների և աշխատանքային տարածքներում: Ամբողջ գործընթացը կազմակերպվում և հսկվում է ՔԱԿ-ի կողմից` օդանավակայանի համապատասխան ծառայությունների ներգրավմամբ:

 

8. ԱՂԵՏԻ ԴԵՊՔՈՒՄ (ԵՐԲ ՕԴԱՆԱՎԱԿԱՅԱՆԸ ՉԻ ՏՈՒԺԵԼ) ԳՈՐԾՈՂՈՒԹՅՈՒՆՆԵՐԻ ԿԱԶՄԱԿԵՐՊՈՒՄԸ

 

8.1. Օդանավակայանի ճգնաժամային աշխատանքային ռեժիմի սահմանումը

(առավելագույն թվով օդանավերի ընդունումը՝ ըստ ժամերի և այլն)

 

84. ՀՀ տարածքում տեղի ունեցած աղետի դեպքում ՀՀ քաղաքացիական ավիացիայի օդանավակայանները պետք է գործեն արտակարգ իրավիճակի պայմաններում:
85. Սույն կարգի 84-րդ կետում նշված դեպքում իր գործունեությունն է սկսում ԱԻ-ի հանրապետական հանձնաժողովը, որն, ըստ ՀՀ օրենսդրության, աղետի արձագանքման, բնակչության պաշտպանության և հետևանքների վերացման վերադաս մարմինն է: Այս հանձնաժողովում գործում են մի շարք ենթամարմիններ, որոնցից մեկը ազգային աջակցման միջգերատեսչական աշխատանքային խումբն (այսուհետ՝ Ազգային աջակցման մարմին) է:
86. Ազգային աջակցման մարմինը ղեկավարում է ՆԳՆ ներկայացուցիչը: Խմբի կազմում ներգրավվում են ՏԿԵՆ-ի, ՊՆ-ի, ԱՆ-ի, ԱԳՆ-ի, ԲՏԱՆ-ի, ԷՆ-ի, ԱԱԾ-ի, ՊԵԿ-ի, ՍԱՏՄ-ի և ԱԱՏՄ-ի՝ օդային տրանսպորտով ՀՀ պետական սահմանի հատման կետերով ժամանած միջազգային մարդասիրական օգնության դեպքում, ինչպես նաև ՔԱԿ-ի ու օդանավակայանի ներկայացուցիչները:
87. Ազգային աջակցման մարմնի գործունեության ակտիվացման որոշումը կայացնում է ՆԳՆ-ն։
88. Ազգային աջակցման մարմնի գործունեության ակտիվացման, անդամների հավաքի և գործունեության իրականացման վայրի մեկնման մասին ազդարարումն իրականացնում է ՓԾ ՃԿԱԿ-ը՝ համապատասխան գերատեսչությունների միջոցով։
89. Ազգային աջակցման մարմինն իր գործունեությունն իրականացնում է ՀՀ պետական սահմանի հատման այն կետի տարածքում, որտեղով նախատեսվում է միջազգային մարդասիրական օգնության, փրկարարական և հատուկ մասնագիտական ստորաբաժանումների գերակշիռ մասի ընդունում կամ, ըստ իրավիճակի, ԱԻ-ի հանրապետական հանձնաժողովի որոշմամբ նախատեսված վայրում:
90. Սույն կարգի 84-րդ կետում նշված դեպքում, ըստ անհրաժեշտության՝ ՀՀ պետական սահմանի հատման մյուս կետերում միջազգային մարդասիրական օգնության, փրկարարական և հատուկ մասնագիտական ստորաբաժանումների ընդունման համար ստեղծվում են աշխատանքային ենթախմբեր, որոնց կազմն ըստ գերատեսչության որոշում է Ազգային աջակցման մարմինը։
91. Ազգային աջակցման մարմնի խնդիրներն են`
    • ՀՀ պետական սահմանի հատման կետերում ՀՀ օրենսդրության սահմանած նորմերի համաձայն կազմակերպել միջազգային օգնության արագ ու պարզեցված ընթացակարգերով ընդունումը.
    • ՀՀ պետական սահմանի հատման կետերում ուժեղացված ծառայության կազմակերպումը (անհրաժեշտության դեպքում լրացուցիչ ուժերի ներգրավմամբ).
    • միջազգային օգնության ուղեկցումը կամ տեղափոխումը համապատասխան տարածքներ` ըստ այդ օգնության նշանակության (որոնողափրկարարական և այլ ստորաբաժանումների ուղեկցումն աղետի գոտի, նյութական օգնության տեղափոխումը պահպանման կամ բաշխման վայրեր).
    • ՀՀ պետական սահմանի հատման կետերում համապատասխան ընդունման/մեկնման կետի հիմնումը, ինչպես նաև ժամանող միջազգային ուժերի կողմից նմանատիպ կետի հիմնման համար տարածքի հատկացումը.
    • ՀՀ ժամանած որոնողափրկարարական և այլ ստորաբաժանումների հիմնման համար համապատասխան տարածքների հատկացումը.
    • նյութական օգնության բեռնաթափման, պահեստավորման և հետագա տեղափոխման համար տարածքների և միջոցների նախապատրաստումը.
    • ՀՀ պետական սահմանի հատման կետերում ժամանած միջազգային ստորաբաժանումներին աղետի մասին թարմացված տվյալներով, քարտեզներով, թարգմանիչներով, կապով, տրանսպորտային միջոցներով, ինչպես նաև փոխհատուցման սկզբունքով վառելիքով և անհրաժեշտության դեպքում ջրով ու սննդով ապահովումը: Ժամանած ստորաբաժանումներին տեղակայման բազա ուղեկցումը.
    • երկրում միջազգային ստորաբաժանումների գործունեության համար համապատասխան անվտանգության մակարդակների ապահովումը` համաձայն Միավորված ազգերի կազմակերպության ապահովության ու անվտանգության մակարդակների պահանջների, ինչպես նաև ժամանող միջազգային ստորաբաժանումներին ազգային յուրահատկությունների/սովորույթների մասին իրազեկումը:
92. Սույն կարգի 91-րդ կետում թվարկված միջոցառումները կարող են իրականացվել հարևան պետություններին օգնության ցուցաբերման ժամանակ:
93. Սույն կարգի 91-րդ կետում թվարկված միջոցառումներն իրականացվում են, երբ հարևան պետությունն աղետի հետևանքներով պայմանավորված չի կարողանում իր մաքսային սահմանահատման կետերում ընդունել միջազգային օգնություն, վնասված կամ ծանրաբեռնված են իր օդանավակայանները և այլն: Այս դեպքերում ՀՀ օդանավակայաններն ու տարածքը կարող են ներգրավվել ԱԻ-ի վերացման գործընթացում` որպես տարանցիկ/տրանզիտ տարածք:

 

8.2. Փրկարարական ուժերի և միջազգային օգնության ընդունման համար

օդանավակայանի նախապատրաստումը

 

94. Աղետի դեպքում Ազգային աջակցման մարմինն ապահովում է օդանավակայանի համար բնականոն և անխափան աշխատանքային պայմաններ` միջազգային մարդասիրական օգնության, փրկարարական և հատուկ մասնագիտական ստորաբաժանումների ընդունման համար:
95. Օդանավակայանի բնականոն աշխատանքային ռեժիմը չխախտելու, ինչպես նաև օգնության ժամանած միջազգային փրկարարական և հատուկ մասնագիտական ստորաբաժանումները ժամանող/մեկնող ուղևորներից հնարավորինս տարանջատելու համար օդանավակայանի բեռների տերմինալում հիմնվում են ՀՀ պետական սահմանի հատման հսկողության շարժական կետեր` ժամանած միջազգային փրկարարական ուժերի և միջազգային նյութական օգնության ընդունման համար:
96. Սույն կարգի 95-րդ կետում նշված շարժական կետերը հիմնվում են` ժամանած միջազգային փրկարարական և հատուկ մասնագիտական ստորաբաժանումներին իրենց հետ բերվող գույքից չտարանջատելու, պարզեցված կարգով ՀՀ պետական սահմանի հատման գործընթացներն իրականացնելու և փրկարարական ստորաբաժանումների մուտքը ՀՀ տարածք հնարավորինս արագացնելու համար:
97. Ժամանած միջազգային մարդասիրական օգնության նկատմամբ նույնպես կիրառվում են ՀՀ պետական սահմանի հատման գործընթացների պարզեցված ընթացակարգեր:
98. Սույն կարգի 95-րդ կետում նշված շարժական կետերում համատեղ գործունեություն են իրականացնում ՔԱԿ-ի, ԱԳՆ-ի, ՆԳՆ-ի, ԱՆ-ի, ՊԵԿ-ի մաքսային ծառայության, ԱԱԾ-ի սահմանապահ զորքերի, ԱԱՏՄ-ի, ՍԱՏՄ-ի և օդանավակայանի ներկայացուցիչները:
99. Բեռնային համալիրում, անհրաժեշտության դեպքում, հիմնվում են միջազգային փրկարարական և հատուկ մասնագիտական ստորաբաժանումների ընդունման շարժական կետեր, որոնք պետք է հագեցված լինեն համապատասխան աշխատանքային պայմաններով` սեղան, էլեկտրականություն, ինտերնետային ու հեռախոսային կապ: Շարժական կետերում գործունեություն իրականացնող ՀՀ պետական մարմինները և օդանավակայանի ղեկավարությունը պետք է ապահովեն շուրջօրյա անխափան աշխատանքները:
100. Սույն կարգի 99-րդ կետով նախատեսված միջոցառումներին զուգահեռ բեռնային համալիրում և հարակից տարածքում նախատեսվում են`
     • Ազգային աջակցման մարմնի ընդունման/մեկնման կետ.
     • ժամանած միջազգային փրկարարական և հատուկ մասնագիտական ստորաբաժանումների և Միավորված ազգերի կազմակերպության մարդասիրական օգնության համակարգման գրասենյակի (UN OCHA) կողմից ընդունման/մեկնման կետի ծավալման համար տարածք.
     • միջազգային մարդասիրական օգնության բեռների ժամանակավոր տեղաբաշխման տարածքներ/պահեստներ (նաև միջազգային կառույցների կողմից` համաձայն ստորագրված հուշագրի).
     • միջազգային մարդասիրական բեռների, փրկարարական և հատուկ մասնագիտական ստորաբաժանումների գույքի բեռնման համար անհրաժեշտ տարածքներ` իր տեխնիկայով (նաև միջազգային կառույցների կողմից` համաձայն ստորագրված հուշագրի).
     • վառելիքաքսայուղային նյութերի շարժական լցակայան:

 

 

8.3. Օդանավերի սպասարկման կազմակերպումը

 

• Խոշոր ԱԻ-ի դեպքում օդանավակայանի բնականոն աշխատանքների կազմակերպման միջոցառումների մեջ ներառվում է նաև միջազգային մարդասիրական օգնություն բերող օդանավերի անխափան և ժամանակին սպասարկումը:

102. Միջազգային մարդասիրական օգնություն բերած օդանավերը կարող են դասակարգվել`
     • օդանավեր, որոնք միջազգային փրկարարական և հատուկ մասնագիտական ստորաբաժանումների ժամանումից կամ բեռնաթափման ավարտից անմիջապես հետո կհեռանան ՀՀ տարածքից.
     • օդանավեր, որոնք կկայանեն օդանավակայանի տարածքում` մինչև իրենց բերած միջազգային փրկարարական կամ հատուկ մասնագիտական ստորաբաժանումն ավարտի իր գործողությունները ՀՀ տարածքում:
103. Միջազգային մարդասիրական օգնություն բերած օդանավերի պատշաճ սպասարկումն իրականացնելու համար օդանավակայանը շահագրգիռ պետական կառավարման համակարգի մարմինների հետ համատեղ պետք է պատրաստ լինի իրականացնել`

• միջազգային փրկարարական և հատուկ մասնագիտական ստորաբաժանումների ժամանակին իջեցում ու սահմանահատման գործընթացի կազմակերպում: Այս նպատակով կազմակերպվում են ՀՀ պետական սահմանի հատման շարժական կետեր, որտեղ, համաձայն ՆԳՆ-ի կողմից նախապես տրամադրված ցուցակների, իրականացվում են ժամանած միջազգային մարդասիրական օգնության, փրկարարական և հատուկ մասնագիտական ստորաբաժանումների պարզեցված կարգով ու արագ ՀՀ սահմանահատման գործընթացները (ՀՀ պետական կառավարման համակարգի մարմինների, հանրապետական նշանակության կազմակերպությունների, միջազգային և հասարակական կազմակերպությունների կողմից ժամանած միջազգային մարդասիրական օգնության ստացման դեպքում պատասխանատու ստացողը ներկայացուցիչ է ուղարկում օդանավակայան կամ նյութական օգնության փաստաթղթերը ներկայացնում է ՕԱԽ-ին և Ազգային աջակցման մարմնին).
• օդանավերի ժամանակին բեռնաթափում: Այս նպատակով իրականացվում է`

ա) օդանավակայանի ամենօրյա հերթափոխերի անձնակազմի ավելացում,

բ) ՆԳՆ-ի կողմից կազմակերպվում է բեռների տերմինալի հարակից տարածքում պահեստների ձևավորում, ՏԿԵՆ-ի հետ համատեղ կազմակերպվում է տրանսպորտային միջոցների ներգրավում (բեռնատարներ), կազմակերպություններից ինժեներական տեխնիկայի ներգրավում (որոնք կարող են օգտագործվել օդանավերի բեռնաթափման համար).

• օդանավերի լիցքավորում: Այս նպատակով օդանավակայանի կողմից պետք է նախատեսվի վառելիքի հնարավոր առավելագույն քանակի մշտական պահեստավորում` նման իրավիճակներում օդանավերը վերալիցքավորելու համար: Վառելիքի սակավության կամ բացակայության դեպքում օդանավակայանը, ՔԱԿ-ը և ՏԿԵՆ-ը համատեղ կազմակերպում են միջոցառումներ հետդարձի պաշարով օդանավերի ժամանման կամ հարևան պետություններում վերալիցքավորման ուղղությամբ (այս միջոցառումները կարգավորվում են միջազգային օգնություն համակարգող մարմինների և (կամ) օտարերկրյա պետությունների հետ ՀՀ ստանձնած միջազգային պարտավորությունների համաձայն և շրջանակներում).
• օդանավերի վերգետնյա սպասարկում (նաև միջազգային կառույցների աջակցությամբ): Այս նպատակով իրականացվում է`

ա) օդանավակայանի ամենօրյա հերթափոխերի անձնակազմի ավելացում,

բ) միջազգային կառույցների օպերատիվ պահուստներից օդանավերի սպասարկման լրացուցիչ տեխնիկայի ժամանակավոր հատկացում:

104. Արտակարգ իրավիճակի դեպքում միջազգային մարդասիրական օգնություն բերող օդանավերի երթևեկության առաջնահերթությունը, օդանավերի սպասարկման, լիցքավորման և այլ ծախսերի, տուրքերի ու գանձումների չափաքանակները, ինչպես նաև դրանց փոխհատուցման կարգը որոշվում են ՀՀ օրենսդրության և միջազգային պայմանագրերի համաձայն:
105. Սույն կարգի 103-րդ կետի կատարումն ապահովելու նպատակով Ազգային աջակցման մարմինը պետք է նախօրոք տեղեկացնի ՔԱԿ-ին թռիչքների ենթադրյալ ուղիների, օդանավի տիպի և կանչի տեսակի, անձնակազմի քանակի, բեռի, չվացուցակի, ուղևորների ցուցակի վերաբերյալ և պահպանի օդային թռիչքների ու վայրէջքի գործընթացների ավիացիոն համապատասխան մարմինների ցանկացած պահանջները:

 

 

8.4. ՀՀ կողմից մարդասիրական օգնության ու փրկարարական

ստորաբաժանումների` այլ երկիր ուղարկման գործողությունները կամ ՀՀ

տարածքը` որպես տարանցիկ օգնության երկիր

 

106. Այլ երկրին օգնության անհրաժեշտության պարագայում Ազգային աջակցման մարմինը պետք է քայլեր ձեռնարկի, որպեսզի ազգային մաքսային, միգրացիոն և տրանսպորտային մարմինները հնարավորինս արագացնեն և պարզեցնեն տարանցիկության հետ կապված իրենց տարածքով միջազգային մարդասիրական օգնության տրամադրման գործընթացները: Այս դեպքերում օդանավակայանի ծառայությունները ձևակերպումների առաջնահերթությունը պետք է տրամադրեն աջակցող կազմակերպությունների բեռներին ու սարքավորումներին:

 

9. ՕԴԱՆԱՎԱԿԱՅԱՆԻ ԱՂԵՏԻ ՌԻՍԿԻ ՆՎԱԶԵՑՄԱՆ ՄԻՋՈՑԱՌՈՒՄՆԵՐԻ ԾՐԱԳԻՐԸ

 

9.1. Ազդարարման և կապի համակարգի ներդրումը

 

107. Օդանավակայանները պետք է ձեռնարկեն միջոցառումներ` օդանավակայանի և ՆԳՆ ՓԾ ՃԿԱԿ-ի հետ մշտական կապի առկայության համար:
108. Սույն կարգի 107-րդ կետի պահանջն ապահովելու նպատակով օդանավակայանները ձեռք են բերում և պահպանում կապի միջոցներ (ռադիոկապ, արբանյակային կապ և այլն):

 

9.2. Տարահանման կամ ժամանակավորապես տեղաբաշխման տարածքները

 

109. Օդանավակայանի վարչական շենքերի հարակից տարածքները պետք է դիտարկվեն որպես տարահանման հնարավոր/պոտենցիալ տարածքներ, որոնք նախապես հարմարեցվում են օդանավակայանից տարահանված անձնակազմի և ուղևորների կենսագործունեության ապահովման համար, մասնավորապես, օդանավակայանի անձնակազմի համար տարահանված հատվածներում նախատեսելով պայմաններ` աշխատանքները շարունակելու համար, ապահովելով անհրաժեշտ հաղորդակցության միջոցների (կապ, էլեկտրականություն, ինտերնետ և այլն), վրանների, տաքացման սարքերի առկայությունը:

 

9.3. Օդանավակայանի անձնակազմի և գործունեություն իրականացնող ՀՀ պետական կառավարման համակարգի մարմինների ստորաբաժանումների ԱԻ-ի գործելու պատրաստականության բարձրացումը

 

• Օդանավակայանի ստորաբաժանումներում ստեղծել խմբեր, որոնք կիրականացնեն նախնական իրավիճակի գնահատում/մոնիթորինգ, որոնման, փրկարարական, հրդեհաշիջման և օդանավակայանի վթարավերականգնողական ստորաբաժանումներին աջակցման համար միջոցառումներ: ՆԳՆ-ի հետ համատեղ կազմակերպել ընտրված անձնակազմի ուսուցում և վերապատրաստում:

111. ՆԳՆ-ի հետ համատեղ կազմակերպել և իրականացնել օդանավակայանի ամբողջ անձնակազմի համար ուսուցում, սեմինարներ, աշխատանքային հանդիպումներ և ուսումնավարժություններ: Այս բոլոր միջոցառումները դասակարգել ըստ կատեգորիաների` ղեկավար կազմ, ԱԻ արձագանքմանն ընդգրկված անձնակազմ և այլն:

 

10. ԽՈՇՈՐ ԱՂԵՏԻ ԴԵՊՔՈՒՄ ՔԱՂԱՔԱՑԻԱԿԱՆ ԱՎԻԱՑԻԱՅԻ ՕԴԱՆԱՎԱԿԱՅԱՆՆԵՐԻ ՀԵՏ ՓՈԽՀԱՄԱԳՈՐԾԱԿՑՈՒԹՅԱՆ ՆԵՐՔՈ ՀՀ ՊԵՏԱԿԱՆ ԿԱՌԱՎԱՐՄԱՆ ՀԱՄԱԿԱՐԳԻ ՄԱՐՄԻՆՆԵՐԻ ԳՈՐԾՈՂՈՒԹՅՈՒՆՆԵՐԸ

 

112. Աղետի դեպքում քաղաքացիական ավիացիայի օդանավակայանների հետ փոխհամագործակցության ներքո ՀՀ պետական կառավարման համակարգի մարմինների գործողություններն են՝

• ՔԱԿ՝

ա. ՀՀ քաղաքացիական ավիացիայի օդանավակայանների թռիչքային և ավիացիոն անվտանգության, տեխնիկական կարգավորման իրականացում,

բ. աջակցություն օդանավակայանների կենսագործունեության ապահովմանը.

• ՆԳՆ՝

ա. օդանավակայաններում ծագած ԱԻ դեպքում փրկարարական և հրդեհաշիջման աշխատանքների իրականացում,

բ. ժամանող միջազգային մարդասիրական օգնության գործընթացների ընդհանուր համակարգում,

գ․ հասարակական անվտանգության և ՀՀ մուտքի արտոնագրերի ձևակերպման իրականացում, դեպի օդանավակայան մուտքի և ելքի երթուղիներում հսկիչ անցագրային կետի հիմնում,

դ․ սպասասրահի ուղևորների, ճանապարհող/դիմավորող քաղաքացիների տարահանման իրականացում,

ե․ ժամանած միջազգային փրկարարական ստորաբաժանումներին տեղակայման բազա ուղեկցում և անվտանգության ապահովում,

զ․ օդանավակայանների կայուն գործունեությանն աջակցություն։

• ԱՆ՝

ա. տուժած և տարահանված անձնակազմի ու քաղաքացիների բժշկական օգնության և սպասարկման համակարգում,

բ. հիվանդանոցների և շտապ բժշկական օգնության ծառայության հետ փոխհամագործակցության ապահովում,

գ. կենսաբանական անվտանգության միջոցառումների իրականացում:

• ԱԳՆ՝ ժամանող միջազգային մարդասիրական օգնության, փրկարարական և հատուկ մասնագիտական ստորաբաժանումների՝ ՀՀ պետական սահմանի անցման միջոցառումների կազմակերպում, մասնակցություն միջազգային ուժերի և պետական կառավարման համակարգի մարմինների միջև փոխհամագործակցության կազմակերպմանը, անհրաժեշտության դեպքում, ՀՀ կառավարության հանձնարարությամբ, աջակցություն միջազգային փրկարարական և հատուկ մասնագիտական ստորաբաժանումներին, ինչպես նաև մարդասիրական օգնություն բերած խմբերին թարգմանիչներով ապահովմանը և միջազգային հանրության իրազեկմանը.
• ԲՏԱՆ՝ աջակցություն ժամանած միջազգային փրկարարական և հատուկ մասնագիտական ստորաբաժանումներին կապով ապահովման գործընթացի կազմակերպմանը.
• ԷՆ՝

ա․ աջակցություն ժամանող միջազգային մարդասիրական օգնության կամ փրկարարական աշխատանքների համար նախատեսված սարքերի և սարքավորումների՝ ՀՀ սահմանահատման և մաքսային գործընթացների պարզեցված կարգով կազմակերպմանը և իրականացմանը՝ երկակի նշանակության ապրանքների ներմուծման և արտահանման ժամանակավոր արտոնություն տրամադրելու ուղղությամբ,

բ․ ՀՀ պետական սահմանի անցման կետերում ժամանած միջազգային փրկարարական և հատուկ մասնագիտական ստորաբաժանումներին փոխհատուցման սկզբունքով, անհրաժեշտության դեպքում, ջրով ու սննդով ապահովում,

• ՊՆ՝

ա․ օդանավակայանների կայուն գործունեությանն աջակցություն,

բ․ աջակցություն ժամանող միջազգային մարդասիրական օգնության կամ փրկարարական աշխատանքների համար նախատեսված սարքերի և սարքավորումների՝ ՀՀ սահմանահատման և մաքսային գործընթացների պարզեցված կարգով կազմակերպմանը և իրականացմանը՝ երկակի նշանակության ապրանքների, որոնք կարող են օգտագործվել նաև ռազմական նպատակներով, ներմուծման և արտահանման ժամանակավոր արտոնություն տրամադրելու ուղղությամբ․

• ՏԿԵՆ՝ ժամանած միջազգային մարդասիրական օգնության, փրկարարական և հատուկ մասնագիտական ստորաբաժանումների տեղափոխման համար տրասնպորտային միջոցների, ինչպես նաև փոխհատուցման սկզբունքով՝ վառե­լիքի ապահովում․
• ԱԱԾ՝ օդանավակայանների գործունեությանն աջակցություն․
• ԱԱՏՄ՝

ա․ դեղերի, դեղանյութերի, դեղաբուսական հումքի ներմուծման օրենսդրությամբ նախատեսված ընթացակարգի պահպանման նկատմամբ պետական վերահսկողության իրականացում,

բ․ օդանավակայաններ ժամանող չվերթների նկատմամբ սանիտարակարանտինային վերահսկողության ուժեղացում, անհրաժեշտության դեպքում նաև բժշկական, կանխարգելիչ և սահմանափակող միջոցառումների կազմակերպում,

գ․ օդանավակայանում հակահամաճարակային միջոցառումների կազմակերպում,

դ․ օդանավակայանում սանիտարահամաճարակային անվտանգության ապահովման միջոցառումների իրականացում,

• ՍԱՏՄ՝ ժամանող միջազգային փրկարարական և հատուկ մասնագիտական ստորաբաժանումների սննդի, որպես մարդասիրական օգնություն բերվող սննդամթերքի և փրկարարական շների ՀՀ պետական սահմանի անցման գործընթացների կարգավորում.
• ՊԵԿ՝ ՀՀ ժամանող միջազգային մարդասիրական օգնության ժամանակ իրականացվող մաքսային գործառնությունների՝ օրենսդրությանը համապատասխան առաջնահերթ կարգով իրականացում․
• ՔԿ՝ անհրաժեշտության դեպքում օդանավակայանի շենք-շինությունների ինժեներական վիճակի գնահատում։