«Կենդանաբանական հավաքածուների վերաբերյալ տեղեկատվության հավաքման և գրանցման կարգը սահմանելու մասին» շրջակա միջավայրի նախարարի հրամանի նախագիծ

ՆԱԽԱԳԻԾ

ՇՐՋԱԿԱՆ ՄԻՋԱՎԱՅՐԻ ՆԱԽԱՐԱՐԻ

ՀՐԱՄԱՆ

«____ » __________________  2023 թ.         N____________-Ն

ԿԵՆԴԱՆԱԲԱՆԱԿԱՆ ՀԱՎԱՔԱԾՈՒՆԵՐԻ ՎԵՐԱԲԵՐՅԱԼ ՏԵՂԵԿԱՏՎՈՒԹՅԱՆ ՀԱՎԱՔՄԱՆ ԵՎ ԳՐԱՆՑՄԱՆ ԿԱՐԳԻ ՍԱՀՄԱՆՄԱՆ ՄԱՍԻՆ

Ղեկավարվելով «Կենդանական աշխարհի մասին» օրենքի 6-րդ հոդվածի 1-ին մասի «ե2» կետով՝

Հ Ր Ա Մ Ա Յ Ո Ւ Մ Ե Մ՝

1. Սահմանել կենդանաբանական հավաքածուների վերաբերյալ տեղեկատվության հավաքման և գրանցման կարգը՝ համաձայն հավելվածի:
2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

Հ. ՍԻՄԻԴՅԱՆ

Հավելված

շրջական միջավայրի նախարարի 2023 թվականի

«     »                                 N   -Ն հրամանի

Կ Ա Ր Գ

ԿԵՆԴԱՆԱԲԱՆԱԿԱՆ ՀԱՎԱՔԱԾՈՒՆԵՐԻ ՎԵՐԱԲԵՐՅԱԼ ՏԵՂԵԿԱՏՎՈՒԹՅԱՆ ՀԱՎԱՔՄԱՆ ԵՎ ԳՐԱՆՑՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետության տարածքում կենդանաբանական հավաքածուների վերաբերյալ տեղեկատվության հավաքման և գրանցման կարգը:
2. Կենդանաբանական հավաքածուների վերաբերյալ տեղեկատվության (այսուհետ՝ տեղեկատվություն) հավաքը և գրանցումը նպատակ ունի բացահայտելու հավաքված, կանոնակարգված, ցուցադրվող և պահվող կենդանիների կենդանի կամ դրանց խրտվիլակների, արգասիքների և պրեպարատների հավաքածուները, դրանց քանակական և որակական փոփոխությունները, ինչպես նաև ապահովել գենետիկական պաշարների վերաբերյալ տեղեկատվության մատչելիությունը:
3. Կենդանաբանական հավաքածուները լինում են կենդանի և անկենդան:

• Կենդանի հավաքածուներն են՝ անազատ պայմաններում պահվող կենդանիների հավաքածուները:
• Անկենդան հավաքածուներն են՝ կենդանիների խրտվիլակները, ողնաշարավորների կմախքները կամ դրանց առանձին մասերը, արգասիքները և պրեպարատները:

4. Կենդանաբանական հավաքածուների պահպանությունը և օգտագործումն իրականացնում են իրավաբանական և ֆիզիկական անձինք:
5. Կենդանաբանական հավաքածուների վերաբերյալ տվյալների հավաքագրումը կարևոր նշանակություն ունի դրանց արդյունավետ կառավարման, հանրային կրթության և իրազեկման մակարդակի բարձրացման գործում՝ հասարակության լայն շերտերին հնարավորություն տալով ստանալ հանրամատչելի տեղեկատվություն գենետիկական պաշարների վերաբերյալ:
6. Կենդանաբանական հավաքածուների վերաբերյալ տվյալների գրանցումը մշտապես իրականացվող գործընթաց է, որն ապահովում է տվյալների համալրումը, դասակարգումը, պահպանումը, քանակական և որակական փոփոխությունների օպերատիվ մուտքագրումը:

1. ՏԵՂԵԿԱՏՎՈՒԹՅԱՆ ՀԱՎԱՔՄԱՆ ԵՎ ԳՐԱՆՑՄԱՆ

ԸՆԹԱՑԱԿԱՐԳԸ

7. Կենդանաբանական հավաքածուների վերաբերյալ փաստաթղթային և էլեկտրոնային տվյալները ներկայացվում են կենդանաբանական հավաքածուներ ունեցող իրավաբանական կամ ֆիզիկական անձանց կողմից:
8. Կենդանաբանական հավաքածուների վերաբերյալ գրանցամատյանները վարվում են Հայաստանի Հանրապետությունում կենդանական աշխարհի պահպանության, պաշտպանության, վերարտադրության և օգտագործման բնագավառներում Հայաստանի Հանրապետության կառավարության լիազորված պետական մարմնի (այսուհետ` լիազորված մարմին) կողմից էլեկտրոնային եղանակով՝ համաձայն Ձև N 1-ի:
9. Կենդանաբանական հավաքածուներ ունեցող իրավաբանական և ֆիզիկական անձինք յուրաքանչյուր տարի մինչև փետրվարի 1-ը Լիազորված մարմնին են տրամադրում իրենց մոտ պահվող կենդանաբանական հավաքածուների վերաբերյալ նախորդ տարվա տեղեկատվությունը և դրա հետ կապված փոփոխությունը՝ (առք, վաճառք, նվիրատվություն, ժառանգություն, կտակ, վերարտադրություն, անկում, հավաք, ներմուծում, արտահանում, պիտանելիության կորուստ և այլն) համաձայն Ձև N1-ի, ինչպես նաև կենդանիների կենդանի հավաքածուների դեպքում նաև հավաքածուի ձեռք բերման հիմքերը (առք, հավաք, վերարտադրություն, նվիրատվություն, ժառանգություն, կտակ, ներմուծում և այլն)։
10. Գրանցամատյաններում տեղեկատվության մուտքագրումը և փոփոխությունն իրականացվում է դրանք ներկայացվելու օրվանից 15 օրվա ընթացքում:
11. Տաղեկատվությանը կից ներկայացվում է հետևյալ փաստաթղթերը՝

• Իրավաբանական անձի պետական գրանցման վկայականի, կանոնադրության կամ ֆիզիկական անձի անձը հաստատող փաստաթղթի, անհատ ձեռնարկատեր հանդիսացող ֆիզիկական անձի դեպքում նաև անհատ ձեռնարկատիրոջ պետական գրանցման վկայականի պատճենները:

12. Փաստաթղթերը ներկայացվում են Լիազորված մարմնի պաշտոնական էլեկտրոնային փոստով (minenv@env.am ):
13. Սույն կարգով սահմանված ժամկետներում իրավաբանական և ֆիզիկական անձինք կենդանաբանական հավաքածուների տվյալները Լիազորված մարմնին չտրամադրելու դեպքում ենթարկվում են վարչական պատասխանատվության օրենքով սահմանված կարգով:
14. Ձև N1-ը լրացվում է՝

• 1-ին սյունակում լրացվում է գրանցման տարեթիվը, ամիսը, ամսաթիվը,
• 2-րդ սյունակում լրացվում է իրավաբանական անձի անվանումը կամ ֆիզիկական անձի անունը, ազգանունը,
• 3-րդ սյունակում լրացվում է իրավաբանական անձի գտնվելու վայրը կամ ֆիզիկական անձի բնակության վայրը,
• 4-րդ սյունակում լրացվում է կենդանաբանական հավաքածուներ պահող իրավաբանական անձի կամ ֆիզիկական անձի հեռախոսահամարը, էլեկտրոնային փոստի հասցեն (առկայության դեպքում),
• 5-րդ սյունակում լրացվում է իրավաբանական անձի պետական գրանցման վկայականի (գրանցման) համարը կամ ֆիզիկական անձի անձնագրային տվյալները, անհատ ձեռնարկատեր հանդիսացող ֆիզիկական անձի դեպքում նաև անհատ ձեռնարկատիրոջ պետական գրանցման վկայականի (գրանցման) համարը,
• 6-րդ սյունակում լրացվում է կենդանի հավաքածուների դեպքում՝ կենդանիների տեսակային կազմը (հայերեն և լատիներեն), յուրաքանչյուրի թվաքանակը, սեռահասակային կազմը, պահման պայմանները և կարգավիճակը,
• 7-րդ սյունակում լրացվում է կենդանի հավաքածուների շարժի վերաբերյալ տեղեկատվություն (առք, վաճառք, վերարտադրություն, նվիրատվություն, ժառանգություն,կտակ, հավաք, անկում, ներմուծում, արտահանում),

• 8-րդ սյունակում լրացվում է անկենդան հավաքածուների դեպքում՝ կենդանիների խրտվիլակների և կմախքների տեսակային կազմը, կենդանիների արգասիքների և պրեպարատների նմուշների քանակը և տվյալները,
• 9-րդ սյունակում լրացվում է անկենդան հավաքածուների շարժի վերաբերյալ տեղեկատվություն (առք, վաճառք, նվիրատվություն, ժառանգություն, կտակ հավաք, ներմուծում, արտահանում, պիտանելիության կորուստ):

Ձև N 1

Գ Ր Ա Ն Ց Ա Մ Ա Տ Յ Ա Ն

ԿԵՆԴԱՆԱԲԱՆԱԿԱՆ ՀԱՎԱՔԱԾՈՒՆԵՐԻ ՎԵՐԱԲԵՐՅԱԼ