ԱՆԱՍՆԱԲՈՒԺՈՒԹՅԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ», «ԼԻՑԵՆԶԱՎՈՐՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ԵՎ «ՊԵՏԱԿԱՆ ՏՈՒՐՔԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՆԵՐԻ ՆԱԽԱԳԾԵՐԻ

ՀԻՄՆԱՎՈՐՈՒՄ

«ԱՆԱՍՆԱԲՈՒԺՈՒԹՅԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ», «ԼԻՑԵՆԶԱՎՈՐՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ԵՎ «ՊԵՏԱԿԱՆ ՏՈՒՐՔԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՆԵՐԻ ՆԱԽԱԳԾԵՐԻ

1․ Ընթացիկ իրավիճակը և իրավական ակտի ընդունման անհրաժեշտությունը․

 «Սննդամթերքի անվտանգության պետական վերահսկողության մասին» օրենքի (այսուհետ՝ Օրենք) 14-րդ հոդվածի 2-րդ մասը սահմանում է, որ արտահանվող սննդամթերքը, սննդամթերքի հետ անմիջական շփման մեջ գտնվող նյութերը, անասնաբուժական և բուսասանիտարական հսկման ենթակա ապրանքները պետք է բավարարեն արտադրող և միջազգայնորեն ընդունված պահանջները, ինչպես նաև ներմուծող երկրի պահանջները, եթե դրանք ներկայացվել են:

Եվրասիական տնտեսական միության հանձնաժողովի 2010 թվականի հունիսի 18-ի «Մաքսային միությունում անասնաբուժասանիտարական միջոցների կիրառման մասին» N 317 որոշման (այսուհետ՝ Որոշում) 5.1 կետի համաձայն՝ Միության մաքսային տարածքից հսկողության վերցված ապրանքների արտահանման թույլտվության տրամադրումը և անասնաբուժական սերտիֆիկատների ձևակերպումն իրականացվում է լիազորված մարմնի կողմից՝ համապատասխան անդամ պետության օրենսդրության համաձայն, իսկ 5.2 կետի համաձայն՝ արտահանողը պարտավոր է հետևել ներմուծող երկրի անասնաբուժական օրենսդրության պահանջներին:

Կառավարության 2010 թվականի հոկտեմբերի 21-ի թիվ 1442-Ն որոշման 28-րդ կետի 4-րդ ենթակետի համաձայն՝ հայտն ստանալուց հետո բեռի ծագման վայրի համապատասխան մարզային կենտրոնը մեկ աշխատանքային օրվա ընթացքում պարզում է`  ներմուծող երկրի օրենսդրությամբ բեռի ներմուծմանը ներկայացվող պահանջների առկայությունը և արտահանվող բեռի համապատասխանությունն այդ պահանջներին: Հավելվածի 32-րդ կետով՝ բեռները Եվրոպական միության երկրներ արտահանվում են նաև տվյալ բեռի ներմուծմանը ներկայացվող Եվրամիության պահանջների պահպանմամբ:

Որոշման 4-րդ բաժնի 4.3 կետի համաձայն՝  կենդանիների նկատմամբ անասնաբուժական հսկողությունն իրականացվում է դրանց բեռնման ժամանակ և նշանակման վայրում կենդանիներին ուղարկող տնտեսություններում և ստացող տնտեսություններում կարանտինային միջոցառումների պարտադիր անցկացմամբ, եթե այլ բան նախատեսված չէ Անասնաբուժական (անասնաբուժասանիտարական) միասնական պահանջներով:

Հայաստանի Հանրապետության իրավական համակարգում ներկայումս բացակայում է կենդանիների կարանտինացման գործընթացը կարգավորող նորմատիվ իրավական ակտը: 

2․ Առաջարկվող կագավորումների բնույթը․

Նկատի ունենալով, որ Օրենքով նախատեսված է անասնաբուժական հսկման ենթակա ապրանքները՝ արտադրող և միջազգայնորեն ընդունված, ինչպես նաև ներմուծող երկրի պահանջները բավարարելու (եթե դրանք ներկայացվել են) վերաբերյալ  իրավակարգավորում, իսկ Որոշմամբ սահմանված է՝ կենդանիներին ուղարկող տնտեսություններում և ստացող տնտեսություններում կարանտինային միջոցառումների պարտադիր անցկացման վերաբերյալ կարգավորում, միևնույն ժամանակ Հայաստանի Հանրապետության իրավական համակարգում ներկայումս բացակայում է կենդանիների կարանտինացման գործընթացը կարգավորող իրավական ակտ, «Անասնաբուժության մասին» օրենքում լրացում կատարելու մասին» օրենքի նախագծով առաջարկվում է Կառավարությանը վերապահել՝ կենդանիների կարանտինացման կարգը հաստատելու, կենդանիների կարանտինացման գործունեության լիցենզավորման կարգը հաստատելու, ինչպես նաև տեսաձայնագրման կարգը և տեսաձայնագրմանը ներկայացվող պահանջները սահմանելու վերաբերյալ լիազորություն:

«Լիցենզավորման մասին» օրենքում լրացում կատարելու մասին» օրենքի նախագծով առաջարկվում է կենդանիների կարանտինացում իրականացնելու գործունեությունը լիցենզավորել, միևնույն ժամանակ «Պետական տուրքի մասին» օրենքում լրացում կատարելու մասին» օրենքի նախագծով նախատեսվել է կենդանիների կարանտինացման գործունեությամբ զբաղվելու լիցենզիայի տրման, լիցենզիայի գործողության ժամկետի երկարաձգման կամ լիցենզիայի վերաձևակերպման համար վճարման ենթակա պետական տուրքի չափը: 

3․ Նախագծերի մշակման գործընթացում ներգրավված ինստիտուտները և անձինք․

Նախագծերը մշակվել են Տեսչական մարմինների աշխատանքների համակարգման գրասենյակի կողմից։ 

4․ Ակնկալվող արդյունքը․

Նախագծերի ընդունման արդյունքում Կառավարությունը լիազորված կլինի  հաստատել՝ կենդանիների կարանտինացման կարգը, կենդանիների կարանտինացման գործունեության լիցենզավորման կարգը, ինչպես նաև սահմանել՝ տեսաձայնագրման կարգը և տեսաձայնագրմանը ներկայացվող պահանջները: 

           5․ Կապը ռազմավարական փաստաթղթերի հետ. 2050 Հայաստանի վերափոխման ռազմավարություն, Կառավարության 2021-2026թթ. ծրագիր, ոլորտային և/կամ այլ ռազմավարություններ․

Նախագծերը չեն բխում 2050 Հայաստանի վերափոխման ռազմավարության, և Կառավարության 2021-2026թթ. ծրագրերից: 

6. Պետական կամ տեղական ինքնակառավարման մարմնի բյուջեում եկամուտների և ծախսերի էական ավելացման կամ նվազեցման վերաբերյալ

Նախագծերի ընդունման կապակցությամբ պետական կամ տեղական ինքնակառավարման մարմնի բյուջեում եկամուտների և ծախսերի էական ավելացում կամ նվազեցում չի նախատեսվում։