«Հայաստանի Հանրապետության փոխվարչապետի 2019 թվականի մարտի 11-ի N97-Ն որոշման մեջ փոփոխություններ և լրացումներ կատարելու մասին» փոխվարչապետի որոշման նախագիծ

ՀԻՄՆԱՎՈՐՈՒՄ

 «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՓՈԽՎԱՐՉԱՊԵՏ 2019 ԹՎԱԿԱՆԻ ՄԱՐՏԻ 11-Ի N 97-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՓՈԽՎԱՐՉԱՊԵՏԻ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ

1. Ընթացիկ իրավիճակը և իրավական ակտի ընդունման անհրաժեշտությունը

Կառավարության 2019 թվականի նոյեմբերի 28-ի N 1716-Լ որոշմամբ հաստատված «Պետական ֆինանսների կառավարման համակարգի 2019-2023 թվականների բարեփոխումների» ռազմավարության 10-րդ բաղադրիչով նախատեսված աշխատավարձի ֆոնդի հսկողություններ իրականացնելու համար անհրաժեշտ իրավական կառուցակարգեր նախատեսելու նպատակով 2024 թվականի հունիսի 12-ին Ազգային ժողովի կողմից ընդունված «Հանրային ծառայության մասին օրենքում փոփոխություններ կատարելու մասին» ՀՕ-295-Ն օրենքով սահմանվեցին պետական և տեղական ինքնակառավարման մարմիններում քաղաքացիական աշխատանք կատարող և տեխնիկական սպասարկում իրականացնող անձանց անձնական գործ ունենալու և անձնական գործը էլեկտրոնային եղանակով վարելու վերաբերյալ իրավական կարգավորումներ։ Ընդ որում՝ նախատեսվեց, որ հիշյալ խումբ աշխատողների անձնական գործերի վարումը իրականացվելու է «Հանրային ծառայության մասին» օրենքի 17-րդ հոդվածի 2-րդ մասով սահմանված կարգով, այն է՝  Փոխվարչապետի 2019 թվականի մարտի 11-ի թիվ  97-Ն որոշմամբ սահմանված համապատասխան պաշտոններ զբաղեցնող անձանց անձնական գործերի վարման ընթացակարգային առանձնահատկություններին համապատասխան։

Նույն օրենսդրական փաթեթում ներառված «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացում կատարելու մասին» ՀՕ-296-Ն օրենքը իրավական հիմքեր նախատեսեց պետական մարմիններին հատկացված աշխատավարձի, պարգևատրման ֆոնդերի վերլուծության իրականացման համար։

Վերոնշյալ օրենքներով նախատեսված իրավակարգավորումների իրացման նպատակով համապատասխան ընթացակարգային կառուցակարգեր սահմանելու համար անհրաժեշտություն է առաջացել փոփոխություններ կատարել Կառավարության 2012 թվականի դեկտեմբերի 20-ի թիվ 1676-Ն որոշման և Հայաստանի Հանրապետության փոխվարչապետի 2019 թվականի մարտի 11-ի N 97-Ն որոշման մեջ։

Այսպես՝ «Հայաստանի Հանրապետության փոխվարչապետ 2019 թվականի մարտի 11-ի N 97-Ն որոշման մեջ փոփոխություններ և լրացումներ կատարելու մասին» փոխվարչապետի որոշման նախագծի (այսուհետ՝ Նախագիծ) ընդունումը պայմանավորված է 2024 թվականի հունիսի 12-ին ընդունված «Հանրային ծառայության մասին օրենքում փոփոխություններ կատարելու մասին» ՀՕ-295-Ն օրենքով սահմանված քաղաքացիական աշխատանք կատարող և տեխնիկական սպասարկում իրականացնող անձանց անձնական գործը էլեկտրոնային եղանակով վարելու վերաբերյալ կարգավորումը տեղայնացնելու և ըստ այդմ` լիազորող նորմի բովանդակությանը համապատասխան ընթացակարգային մեխանիզմներ ապահովելու  անհրաժեշտությամբ:

 Բացի այդ, Փոխվարչապետի 2019 թվականի մարտի 11-ի N 97-Ն որոշմամբ էլեկտրոնային եղանակով վարվող անձնական գործում ներառվող տեղեկատվության ցանկում աշխատավարձի վերաբերյալ տեղեկատվություն լրացնելու իրավական կարգավորում նախատեսված չէ, մինչդեռ Կառավարության 2019 թվականի նոյեմբերի 28-ի N 1716-Լ որոշմամբ հաստատված «Պետական ֆինանսների կառավարման համակարգի 2019-2023 թվականների բարեփոխումների» ռազմավարության 10-րդ բաղադրիչով նախատեսված աշխատավարձի ֆոնդի հսկողություններ իրականացնելու նպատակով «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքի 27․1-ին հոդվածով նախատեսված աշխատավարձի և պարգևատրման ֆոնդերի վերլուծություն իրականացնելու համար անհրաժեշտ է ունենալ պետական մարմինների հաստիքացուցակում ընդգրկված պաշտոնների համար սահմանված աշխատավարձի վերաբերյալ ամբողջական տեղեկատվություն։ Վերոնշյալով պայմանավորված՝ Նախագծով առաջարկվում է որպես անձնական գործը ձևավորող  տեղեկատվություն սահմանել նաև աշխատավարձի վերաբերյալ տեղեկատվությունը՝ անհրաժեշտ փոփոխություններ կատարելով Փոխվարչապետի 2019 թվականի մարտի 11-ի թիվ  97-Ն որոշման մեջ։

Միևնույն ժամանակ վերոնշյալ օրենքների կարգավորումների հիմքում դրված նպատակների պատշաճ իրացումն ապահովելու համար անհրաժեշտություն է առաջացել համապատասխան փոփոխություններ կատարել նաև Կառավարության 2012 թվականի դեկտեմբերի 20-ի թիվ 1676-Ն որոշման մեջ՝ սահմանելով անհրաժեշտ կառուցակարգեր «Հանրային ծառայության մասին» օրենքի 17-րդ հոդվածի 2-րդ մասով սահմանված կարգով համապատասխան պաշտոնները զբաղեցնող անձանց անձնական գործերի վարումն ապահովող քաղաքացիական ծառայության տեղեկատվական հարթակի և հարկային մարմնի կողմից վարվող տեղեկատվական բազայի պատշաճ փոխգործելիության համար՝ նկատի ունենալով, որ համապատասխան պաշտոնների ստեղծման և դրանց վերաբերյալ տեղեկատվության սկզբնաղբյուր է հանդիսանալու քաղաքացիական ծառայության տեղեկատվական հարթակը։

2. Կարգավորման նպատակը

Նախագծային կարգավորումներով կապահովվեն  2024 թվականի հունիսի 12-ին ընդունված «Հանրային ծառայության մասին օրենքում փոփոխություններ կատարելու մասին» ՀՕ-295-Ն և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացում կատարելու մասին» ՀՕ-296-Ն օրենքներով նախատեսված կարգավորումների իրացումը։

3.Նախագծի մշակման գործընթացում ներգրավված ինստիտուտները և անձինք

Որոշումների նախագծերը մշակել է Վարչապետի աշխատակազմի քաղաքացիական ծառայության գրասենյակը:

4.Ակնկալվող արդյունքը

Նախագծերի ընդունման արդյունքում ընթացակարգային անհրաժեշտ մեխանիզմներ կսահմանվեն «Հանրային ծառայության մասին» և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքներով սահմանված կարգավորումները իրացնելու համար։

           5.Նախագծի ընդունման կապակցությամբ լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին

«Հայաստանի Հանրապետության կառավարության 2012 թվականի դեկտեմբերի 20-ի N 1676-Ն որոշման մեջ լրացումներ կատարելու մասին» Կառավարության և «Հայաստանի Հանրապետության փոխվարչապետի 2019 թվականի մարտի 11-ի N 97-Ն որոշման մեջ փոփոխություններ և լրացումներ կատարելու մասին» փոխվարչապետի որոշումների նախագծերի ընդունմամբ լրացուցիչ ֆինանսական միջոցների անհրաժեշտություն չի առաջանում կամ պետական բյուջեում ծախսերի և եկամուտների էական ավելացումներ կամ նվազեցումներ չեն նախատեսվում։

6. «Կապը ռազմավարական փաստաթղթերի հետ

«Հայաստանի Հանրապետության կառավարության 2012 թվականի դեկտեմբերի 20-ի N 1676-Ն որոշման մեջ լրացումներ կատարելու մասին» Կառավարության և «Հայաստանի Հանրապետության փոխվարչապետի 2019 թվականի մարտի 11-ի N 97-Ն որոշման մեջ փոփոխություններ և լրացումներ կատարելու մասին» փոխվարչապետի որոշումների նախագծերի ընդունումը բխում է Կառավարության 28.11.2019թ․ N 1716-Լ որոշմամբ հաստատված «Պետական ֆինանսների կառավարման համակարգի 2019-2023 թվականների բարեփոխումների» ռազմավարությունից։