ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՄԱՅԻՍԻ 26-Ի N 825-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՄԱՅԻՍԻ 26-Ի N 825-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը.

«Հայաստանի Հանրապետության կառավարության 2006 թվականի մայիսի 26-ի N 825-Ն որոշման մեջ փոփոխություններ կատարելու մասին» Հայաստանի Հանրապետության կառավարության որոշման նախագծի անհրաժեշտությունը պայմանավորված է Հայաստանի Հանրապետության կառավարության 2023 թվականի ապրիլի 27-ի N 614-Ն որոշմամբ «Քրեակատարողական բժշկության կենտրոն» պետական ոչ առևտրային կազմակերպության կառավարումը Հայաստանի Հանրապետության առողջապահության նախարարությանը փոխանցմամբ, ինչպես նաև վերոնշյալ որոշմամբ սահմանված մի շարք կարգավորումները գործող օրենսդրությանը համապատասխանեցնելու անհրաժեշտությամբ, մասնավորապես. «Բնակչության բժշկական օգնության և սպասարկման մասին», «Հաշմանդամություն ունեցող անձանց իրավունքների մասին», «Անձի ֆունկցիոնալության գնահատման մասին» ՀՀ օրենքներին և այլ իրավական ակտերին:

 2. Առաջարկվող կարգավորման բնույթը և նպատակը.

Նախագծի նպատակն է ապահովել ՀՀ քրեակատարողական նոր օրենսգրքի կիրառումը, ինչպես նաև Հայաստանի Հանրապետության կառավարության 2023 թվականի ապրիլի 27-ի N 614-Ն որոշմամբ պայմանավորված՝ «Քրեակատարողական բժշկության կենտրոն» պետական ոչ առևտրային կազմակերպության բնականոն գործունեությունը։

Հաշվի առնելով, որ Հայաստանի Հանրապետության կառավարության 2006 թվականի մայիսի 26-ի N 825-Ն որոշման հավելվածում կատարվում են ծավալուն փոփոխություններ և լրացումներ, առաջարկվում է որոշման հավելվածը ամբողջությամբ շարադրել նոր խմբագրությամբ` այն համապատասխանեցնելով «Բնակչության բժշկական օգնության և սպասարկման մասին» ՀՀ օրենքին, մասնավորապես որոշմամբ սահմանված մի շարք դրույթներում կիրառվող հասկացությունները («բուժսանիտարական և բուժկանխարգելիչ օգնություն», «քաղաքացիական բժշկական հաստատություն», «ստացիոնար», «հիվանդներ», «հիվանդություններով տառապող» և այլն) համապատասխանեցվել են գործող օրենսդրությանը:

Գործող որոշման մի շարք դրույթներում իրավական ակտերին կատարված հղումները վերանայվել են` համապատասխանեցնելով ներկայում գործող իրավական ակտերին, մասնավորապես` մի շարք դրույթներում սահմանված «Առողջապահության նախարարի 2013 թվականի սեպտեմբերի 13-ի N 47-Ն հրաման»-ը փոխարինվել է «Առողջապահության նախարարի 2022 թվականի հունիսի 13-ի N 40-Ն հրաման»-ով, «Հայաստանի Հանրապետության կառավարության 2010 թվականի ապրիլի 1-ի N 350-Ն որոշում»-ը փոխարինվել է «Հայաստանի Հանրապետության առողջապահության նախարարի 2021 թվականի դեկտեմբերի 8-ի N 90-Ն հրաման»-ով:

Նաև, Որոշման մեջ կիրառվող «դատապարտյալներին հաշմանդամ ճանաչելու» հասկացությունը փոխարինվել է «դատապարտյալների ֆունկցիոնալության գնահատման», «1-ին խմբի հաշմանդամ» բառերը` «1-ին խմբի կամ ֆունկցիոնալության խորը աստիճանի սահմանափակումով հաշմանդամություն ունեցող անձ» բառերով` համապատասխանեցնելով գործող օրենսդրությանը:

 Միևնույն ժամանակ, «Բնակչության բժշկական օգնության և սպասարկման մասին ՀՀ օրենքից բխող ընդունվել են մի շարք իրավական ակտեր և անհրաժեշտություն է առաջացել քրեակատարողական հիմնարկներում պահվող կալանավորված անձանց և դատապարտյալների բժշկական օգնության և սպասարկման կազմակերպումը համապատասխանեցնել այդ կարգավորումներին։

3. Կապը ռազմավարական փաստաթղթերի հետ.

Որոշման Նախագծի ընդունումը չի բխում որևէ ռազմավարական փաստաթղթից:

4. Նախագծերի ընդունման կապակցությամբ այլ իրավական ակտերի ընդունման անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները.

Նախագծի ընդունումից հետո անհրաժեշտություն կառաջանա ուժը կորցրած ճանաչել Արդարադատության նախարարի 2019 թվականի դեկտեմբերի 18-ի N 593-Լ, 2020 թվականի հունվարի 14-ի N 10-Լ, 2021 թվականի ապրիլի 21-ի N 163-Լ և 2022 թվականի հուլիսի 25-ի N 404-Լ հրամանները, ինչպես նաև անհրաժեշտ կլինի հաստատել «Քրեակատարողական բժշկության կենտրոն պետական ոչ առևտրային կազմակերպությունում վարվող մի շարք բժշկական փաստաթղթերի ձևերը հաստատելու մասին Առողջապահության նախարարի հրաման:

Որոշումների Նախագծերի առաջարկվող իրավակարգավորումների ընդունման արդյունքում պետական բյուջեի եկամուտներում և ծախսերում սպասվելիք փոփոխություններ չկան։

5. Նախագծի մշակման գործընթացում ներգրավված ինստիտուտները, անձինք.

Որոշման Նախագիծը մշակվել է Առողջապահության նախարարության կողմից:

6. Իրավական ակտի կիրառման դեպքում ակնկալվող արդյունքը.

Նախագծի ընդունմամբ ակնկալվում է ապահովել քրեակատարողական հիմնարկներում պահվող կալանավորված անձանց և դատապարտյալների պատշաճ բժշկական օգնությունը և սպասարկումը: