«ԱՌԵՎՏՐԻ ԵՎ ԾԱՌԱՅՈՒԹՅՈՒՆՆԵՐԻ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ

«ԱՌԵՎՏՐԻ ԵՎ ԾԱՌԱՅՈՒԹՅՈՒՆՆԵՐԻ ՄԱՍԻՆ» ՕՐԵՆՔՈՒՄ  ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հոդված 1.  «Առևտրի և ծառայությունների մասին» 2004 թվականի նոյեմբերի 24-ի ՀՕ-134-Ն օրենքի (այսուհետ՝ Օրենք) 2-րդ հոդվածի 1-ին մասը քսաներեքերորդ պարբերությունից հետո լրացնել հետևյալ բովանդակությամբ նոր պարբերությունով.

«տաղավար՝ առևտրական գործունեության իրականացման համար նախատեսված բացօթյա թեթև շինություն․»:

Հոդված 2․ Օրենքի 3-րդ հոդվածի 2-րդ մասը «տոնավաճառները (վերնիսաժները)» բառերից հետո լրացնել «,տաղավարները» բառերով:

     Հոդված 3․ Օրենքի 9-րդ հոդվածը լրացնել հետևյալ բովանդակությամբ 15.1-ին և 15․2-րդ մասերով.

  «15.1. Ձմերուկի, սեխի, դդումի և մրգերի վաճառքը իրականացվում է  խանութներում, կրպակներում, շուկաներում, տոնավաճառներում, տաղավարներում՝ տակդիրների կամ դարակաշարերի վրա, որոնց նվազագույն բարձրությունը պետք է լինի առնվազն 15-20 սմ։ Տոնավաճառներում, տաղավարներում  ձմերուկի, սեխի, դդումի և մրգերի վաճառքի կետերը պետք է ունենան ծածկեր կամ հովանոցներ։ Արգելվում է ձմերուկը, սեխը, դդումը և մրգերը վաճառել կտրած կամ մասերի բաժանված։

  15․2․ Սպանդանոցային ծագման տեղական արտադրության կենդանական    ծագման մթերքի և հումքի նույնականացումը ապահովելու նպատակով N 5 ձևի անասնաբուժական վկայականը կամ պիտակը կամ պիտակի պիտակը փակցվում է սպառողներին տեսանելի տեղում։»:

      Հոդված 4․ Օրենքի 10-րդ հոդվածի 1-ին մասի 4-րդ կետը շարադրել հետևյալ խմբագրությամբ․

«ճաշացուցակ`  կերակրատեսակների, խոհարարական արտադրատեսակների, խմորեղենի, հացաբուլկեղենի և (կամ) գնովի ապրանքների ցուցակ, որը վաճառողն առաջարկում է սպառողին` խոհարարական արտադրանքի անվանման (փոխարինիչների օգտագործման դեպքում պարտադիր նշումով), հիմնական բաղադրիչների, պատրաստման եղանակի, սննդային արժեքի (ներառյալ էներգետիկ արժեքը՝ արտահայտված կիլոկալորիաներով), զանգվածի և գնի նշումով.

     Հոդված 5․   Օրենքի 12-րդ հոդվածի 3-րդ մասը շարադրել նոր խմբագրությամբ․

  «3. Վաճառողը պետք է ունենա ճաշացուցակ, որը ներկայացվում է սպառողին (գնորդին): Ճաշացուցակը կարող է լինել թղթային կամ էլեկտրոնային ցուցատախտակի վրա՝ պարտադիր հայերեն լեզվով (անհրաժեշտության դեպքում նաև օտար լեզվով)։ Ճաշացուցակում նշվում է խոհարարական արտադրանքի անվանումը (փոխարինիչների օգտագործման դեպքում պարտադիր նշումով), հիմնական բաղադրիչները, պատրաստման եղանակը, սննդային արժեքը (ներառյալ էներգետիկ արժեքը՝ արտահայտված կիլոկալորիաներով), զանգվածը և վերջինիս այն գինը, որը ենթակա է սպառողի կողմից վերջնական վճարման։»։

   Հոդված 6․ Օրենքի 17-րդ հոդվածի 1-ին մասը «9-րդ հոդվածի 3-րդ մասի և 15-րդ մասի «գ» կետի» բառերից հետո լրացնել «15․2,» բառերը:»:

     Հոդված 7. Սույն օրենքն ուժի մեջ է մտնում պաշտոնական հրապարակման օրվան հաջորդող երեսուներորդ օրը:

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ

ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳՐՔՈՒՄ  ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

   Հոդված 1.  1985 թվականի դեկտեմբերի 6-ի Վարչական իրավախախտումների վերաբերյալ Հայաստանի Հանրապետության օրենսգրքի (այսուհետ՝ Օրենսգիրք) 158-րդ հոդվածը լրացնել հետևյալ բովանդակությամբ 7․1-ին և 7․2-րդ, 47-րդ, 48-րդ, 49-րդ և 50-րդ մասերով.

«7․1․  Հանրային սննդի օբյեկտներում ճաշացուցակին ներկայացվող պահանջները խախտելը՝

առաջացնում է տուգանքի նշանակում պաշտոնատար անձի նկատմամբ՝ սահմանված նվազագույն աշխատավարձի հարյուրապատիկի չափով:

 7․2․  Սույն հոդվածի 6․1-ին մասով նախատեսված արարքը վարչական տույժի նշանակման օրվանից  մեկ տարվա ընթացքում կրկին  կատարելը՝

առաջացնում է տուգանքի նշանակում` պաշտոնատար անձի նկատմամբ՝ սահմանված նվազագույն աշխատավարձի երկուհարյուրապատիկի չափով։»։

«47․ Ձմերուկի, սեխի, դդումի և մրգերի վաճառքը՝ առանց տակդիրների կամ դարակաշարերի, կամ եթե դրանց բարձրությունը չի համապատասխանում Հայաստանի Հանրապետության օրենսդրությամբ սահմանված նվազագույն չափին, կամ տոնավաճառներում կամ տաղավարներում իրականացվում է առանց ծածկերի կամ հովանոցների, ինչպես նաև կտրած կամ մասերի բաժանված՝

առաջացնում է տուգանքի նշանակում՝ ֆիզիկական անձի նկատմամբ՝  սահմանված նվազագույն աշխատավարձի հիսնապատիկի չափով, իսկ իրավաբանական անձանց նկատմամբ՝ սահմանված նվազագույն աշխատավարձի հարյուրապատիկի չափով:

48․   Սույն հոդվածի 47-րդ մասով նախատեսված արարքը վարչական տույժի նշանակման օրվանից մեկ տարվա ընթացքում կրկին  կատարելը՝

առաջացնում է տուգանքի նշանակում` ֆիզիկական անձի նկատմամբ՝  սահմանված նվազագույն աշխատավարձի հարյուրապատիկի չափով, իսկ իրավաբանական անձանց նկատմամբ՝ սահմանված նվազագույն աշխատավարձի երկուհարյուրապատիկի չափով:»։

49․ Սպանդանոցային ծագման տեղական արտադրության կենդանական    ծագման մթերքի և հումքի նույնականացումը ապահովելու նպատակով N 5 ձևի անասնաբուժական վկայականը կամ պիտակը կամ պիտակի պիտակը  սպառողներին տեսանելի տեղում չփակցնելը՝

առաջացնում է տուգանքի նշանակում պաշտոնատար անձի նկատմամբ՝ սահմանված նվազագույն աշխատավարձի հիսնապատիկից մինչև հարյուրապատիկի չափով։»։

50․ Սույն հոդվածի 49-րդ մասով նախատեսված արարքը վարչական տույժի նշանակման օրվանից  մեկ տարվա ընթացքում կրկին  կատարելը՝

 առաջացնում է տուգանքի նշանակում` պաշտոնատար անձի նկատմամբ՝ սահմանված նվազագույն աշխատավարձի հարյուրհիսնապատիկից մինչև երկուհարյուրապատիկի չափով։»։

Հոդված  2. Օրենսգրքի 238 -րդ հոդվածի 1-ին մասի «46-րդ» բառերը փոխարինել «46-րդ, 47-րդ» բառերով:

     Հոդված 3. Սույն օրենքն ուժի մեջ է մտնում պաշտոնական հրապարակման օրվան հաջորդող երեսուներորդ օրը: