«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՏԱՐԱԾՔԱՅԻՆ ԲԱԺԱՆՄԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«Հայաստանի Հանրապետության վարչատարածքային բաժանման մասին» օրենքում լրացում կատարելու մասին»

                                                                                                                                   օրենքի ընդունման
1. Ընթացիկ իրավիճակը և իրավական ակտի ընդունման անհրաժեշտությունը
ՀՀ Լոռու մարզի Ալավերդի համայնքի ղեկավարի կողմից ներկայացվել է միջնորդություն՝ Ալավերդի
բնակավայրի Սանահին թաղամասը (նախկին Սանահին գյուղը)՝ որպես բնակավայր առանձնացնելու վերաբերյալ:
Ալավերդի համայնքի ավագանին 2023 թվականի մարտի 17-ին ընդունել է «Հայաստանի Հանրապետության Լոռու
մարզի Ալավերդի համայնքի Ալավերդի քաղաքի մաս կազմող Սանահին թաղամասին բնակավայրի կարգավիճակ
տալու մասով հանրային նախաձեռնությանը հավանություն տալու մասին» №20-Ա որոշումը:
Սանահին գյուղն ունի հազարամյա պատմություն: Գյուղը 1967 թվականից կազմում է Ալավերդի քաղաքի
մաս: Գյուղն առաջին հերթին հայտնի է Սանահինի վանքով, որը հանդիսանում ՅՈԻՆԵՍԿՕ-ի համաշխարհային
ժառանգության մաս: Սանահինի պատմությունն սկսվում է վանական համալիրի հիմնադրմամբ’ 10-րդ դարից:
Սանահինը հայտնի է եղել որպես հայ միջնադարյան հոգևոր, մշակութային և գիտակրթական նշանավոր կենտրոն:
Վանական համալիրը հիմնադրվել է Բագրատունիների կողմից, ապա 12-րդ դարում դարձել է Զաքարյան
իշխանական տոհմի սեփականությունը (Զաքարյան իշխանների տոհմական տապանատունը' դամբարանը, այժմ էլ
պահպանվում է Սանահինի վանական համալիրի տարածքում): 2001 թվականին Սանահինի վանական համալիրը
Հաղպատի վանական համալիրի հետ ընդգրկվել է ՅՈԻՆԵՍԿՕ-ի «Համաշխարհային մշակութային արժեքների
գրանցամատյանում»: Սանահին գյուղում են ծնվել ու մեծացել աշխարհահռչակ Միկոյան եղբայրները: Այժմ
Սանահինում գործում է եղբայրների տուն-թանգարանը, որը հիմնադրվել է 1971 թվականին: Թանգարան և
վանական համալիր այցելող զբոսաշրջիկների թիվը գերազանցում է տարեկան 50.000-ը:
Ներկայումս գյուղն ունի 273 տնային տնտեսություն:
Համաձայն բնակչության ռեգիստրի տվյալների՝ գյուղում հաշվառված է 800 բնակիչ, որից 200-ը'
անչափահաս: Մշտապես բնակվում է շուրջ 200 ընտանիք: Սանահինում գործում է Ա. Միկոյանի անվ. թիվ 4
հիմնական դպրոցը՝ կառուցված 1959 թվականին: Ներկայումս դպրոցում սովորում է 132 աշակերտ: Սանահինում
գործում է նաև թիվ 5 մանկապարտեզը, որն ունի 26 սան:
2023 թվականի ապրիլի 19-ին Կադաստրի կոմիտեում տեղի ունեցավ ՀՀ աշխարհագրական օբյեկտների
անվանակոչումների և անվանափոխումների մասնագիտական հանձնաժողովի հերթական նիստը, որի ընթացքում

քննարկվել է Ալավերդի քաղաքից առանձնացվող Սանահին թաղամասը որպես նոր բնակավայր «Սանահին գյուղ»
անվանակոչելու հարցը, որը միաձայն ստացել է դրական եզրակացություն:
2. Առաջարկվող կարգավորման բնույթը
ՀՀ տարածքային կառավարման և ենթակառուցվածքների նախարարության կողմից մշակվել է «Հայաստանի
Հանրապետության վարչատարածքային բաժանման մասին» օրենքում լրացում կատարելու մասին» օրենքի
նախագիծը, որի համաձայն՝ Ալավերդի բազմաբնակավայր համայնքի կազմում ներառվում է «Սանահին» անվամբ
բնակավայր:

3. Նախագծի մշակման գործընթացում ներգրավված ինստիտուտները, անձինք և նրանց դիրքորոշումը
ՀՀ տարածքային կառավարման և ենթակառուցվածքների նախարարություն
4. Ակնկալվող արդյունքը
Իրավական ակտի նախագծի ընդունման դեպքում կապահովվի Ալավերդի համայնքի տեղական
ինքնակառավարման մարմինների միջնորդությունը և Սանահին թաղամասը կառանձնացվի Ալավերդի բնակավայրից
և կներառվի Ալավերդի համայնքում՝ որպես առանձին բնակավայր:
5. Տեղեկանք ծախսերի և եկամուտների մասին
«Հայաստանի Հանրապետության վարչատարածքային բաժանման մասին» օրենքում լրացում կատարելու
մասին» օրենքի ընդունման կապակցությամբ լրացուցիչ ֆինանսական միջոցների պահանջ չի առաջանում, իսկ
Հայաստանի Հանրապետության պետական բյուջեի եկամուտներում և ծախսերում փոփոխություններ չեն սպասվում:
6. Կապը ռազմավարական փաստաթղթերի հետ. Հայաստանի վերափոխման ռազմավարություն 2050,
Կառավարության 2021-2026թթ. ծրագիր, ոլորտային և/կամ այլ ռազմավարություններ».
Կապը ռազմավարական փաստաթղթերի հետ բացակայում է: