ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՕՐԵՆՔԻ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ

1. Նախագծերի ընդունման անհրաժեշտությունը.

«Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ կատարելու մասին» օրենքի նախագծի (այսուհետ՝ Նախագիծ) ընդունումը պայմանավորված է «Բնակչության բժշկական օգնության և սպասարկման մասին» 1996 թվականի մարտի 4-ի ՀՕ-42 օրենքում (այսուհետ՝ Օրենք) 2020 թվականի մայիսի 6-ի ՀՕ-268-Ն օրենքով կատարված փոփոխությամբ, որի համաձայն Օրենքը շարադրվել է նոր խմբագրությամբ, որի հիմքում անհրաժեշտություն է առաջացել կատարել համապատասխան փոփոխություններ Վարչական իրավախախտումների վերաբերյալ Հայաստանի Հանրապետության օրենսգրքի (այսուհետև՝ Օրենսգիրք) 47.1-ին հոդվածի 2-րդ մասում՝ համապատասխանեցնելով նշված օրենքների իրավակարգավորումները։

2. Ընթացիկ իրավիճակը և խնդիրները.

Առողջապահության ոլորտում վերահսկողություն իրականացնող ՀՀ առողջապահական և աշխատանքի տեսչական մարմինը (այսուհետ՝ Տեսչական մարմին) օրենսգրքի 230-րդ հոդվածի համաձայն՝ ախտաբանաանատոմիական հերձումների և (կամ) հետազոտությունների անցկացման գործընթացում հայտնաբերված թերությունների և խախտումների արդյունքում հերձում և (կամ) հետազոտություն իրականացնողներին ենթարկում է վարչական պատասխանատվության Օրենսգրքի 47.1-րդ հոդվածի 2-րդ մասով։

Օրենսգրքի 47.1-ին հոդվածի 2-րդ մասով սահմանվում է Օրենքի 24-րդ հոդվածի 2-րդ և 3-րդ մասերով նախատեսվող ախտաբանաանատոմիական հերձումների և (կամ) հետազոտությունների պայմանների խախտումների համար պատասխանատվություն՝ տուգանքի տեսքով, սակայն 2020 թվականի մայիսի 6-ի ՀՕ-268-Ն օրենքի հիման վրա նոր խմբագրությամբ շարադրված Օրենքի 24-րդ հոդվածը սահմանում է այլ չվերաբերող կարգավորում (առանց մարդու համաձայնության բժշկական օգնության և սպասարկման իրականացման իրավադրույթները), ինչը հակասում է Օրենսգրքի 47.1-րդ հոդվածի 2-րդ մասով սահմանված դիսպոզիցիային։

Օրենքի 41-րդ հոդվածի 1-ին մասով ախտաբանաանատոմիական գործունեությունը իրականացվում է ձևաբանական հետազոտությունների և ախտաբանաանատոմիական դիահերձումների միջոցով, ուստի անհրաժեշտություն է առաջացել համապատասխանեցնել վերոնշյալ իրավակարգավորումները։

Նման դեպքում Օրենքի 24-րդ հոդվածի և Օրենսգրքի 47.1-րդ հոդվածի 2-րդ մասով սահմանված դիսպոզիցիան իրարամերժ են և առաջացնում են անորոշություն։ Այս պայմաններում խախտումներ հայտնաբերելու դեպքում վարչական տույժ կիրառելու իրավական հիմքերը բացակայում են։ 

3. Կարգավորման նպատակը և բնույթը.

Օրենսգրքի 47.1-ին հոդվածի 2-րդ մասը շարադրվում է նոր խմբագրությամբ՝ ապահովելով Օրենքի 41-րդ հոդվածով կարգավորվող պայմանների և կարգերի համար պատասխանատվություն ենթարկվելու դրույթը, ինչպես նաև հակասական և տարաբնույթ մեկնաբանությունների, այդ թվում անորոշության բացառումը։ 

4. Նախագծի մշակման գործընթացում ներգրավված ինստիտուտները և անձինք.

Նախագիծը մշակվել է Հայաստանի Հանրապետության վարչապետի աշխատակազմի տեսչական մարմինների աշխատանքների համակարգման գրասենյակի ու Առողջապահական և աշխատանքի տեսչական մարմնի կողմից համատեղ:

 5.Ակնկալվող արդյունք

Օրենսգրքի 47.1-ին հոդվածի 2-րդ մասի փոփոխությունները կբացառեն տվյալ դրույթի և Օրենքի 24-րդ հոդվածի միջև տարաբնույթ մեկնաբանությունը, կհստակեցնեն Օրենքի 41-րդ հոդվածով նախատեսված պահանջների համար սահմանված սանկցիան և կորոշակիացնեն իրավակարգավորումը։           

6. Այլ իրավական ակտերում փոփոխությունների և/կամ լրացումների անհրաժեշտությունը.

    Նախագծի ընդունման դեպքում այլ իրավական ակտերում փոփոխություններ և/կամ լրացումներ կատարելու անհրաժեշտությունը բացակայում է: 

7. Պետական կամ տեղական ինքնակառավարման մարմնի բյուջեում ծախսերի և եկամուտների էական ավելացման կամ նվազեցման մասին.

        Նախագիծը ՀՀ պետական բյուջեում (կամ տեղական ինքնակառավարման մարմնի բյուջեում) ծախսերի կամ եկամուտների էական ավելացման կամ նվազեցման չեն հանգեցնում: 

8. Կապը ռազմավարական փաստաթղթերի հետ. «Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

        Նախագիծը չի բխում ռազմավարական փաստաթղթերից և  ուղղված է իրավակիրառ պրակտիկայում ծագած մի շարք խնդիրների լուծմանը։