«ԵՐԵՎԱՆԻ ՔԱՂԱՔԱՅԻՆ ԶԱՐԳԱՑՄԱՆ ՆԵՐԴՐՈՒՄԱՅԻՆ ԾՐԱԳՐԻ ՀՈՂԻ ՕՏԱՐՄԱՆ ԵՎ ՏԱՐԱԲՆԱԿԵՑՄԱՆ ՇՐՋԱՆԱԿԸ ՀԱՍՏԱՏԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ
-
4 - Agree
-
1 - Disagree
Հ Ի Մ Ն Ա Վ Ո Ր ՈՒ Մ
«ԵՐԵՎԱՆԻ ՔԱՂԱՔԱՅԻՆ ԶԱՐԳԱՑՄԱՆ ՆԵՐԴՐՈՒՄԱՅԻՆ ԾՐԱԳՐԻ
ՀՈՂԻ ՕՏԱՐՄԱՆ ԵՎ ՏԱՐԱԲՆԱԿԵՑՄԱՆ ՇՐՋԱՆԱԿԸ ՀԱՍՏԱՏԵԼՈՒ ՄԱՍԻՆ»
ՀՀ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ
- Նախագծի անհրաժեշտությունը, նպատակը և ընթացիկ իրավիճակը.
Հայաստանի Հանրապետության և Ասիական զարգացման բանկի (ԱԶԲ) միջև 2023 թվականի նոյեմբերի 27-ին կնքվել է «Երևանի քաղաքային զարգացման ներդրումային ծրագիր» վարկային համաձայնագիրը, որի արդյունավետությունը հայտարարվել է 2024 թվականի մայիսի 22-ին: Ծրագրի շրջանակներում նախատեսվում է կառուցել Երևանի Ծովակալ Իսակով պողոտա-Արշակունյաց պողոտա ճանապարհահատվածը, 260 մետրանոց կամուրջ, ինչպես նաև՝ վերականգնել Կոմիտասի անվան այգու մի հատվածը՝ կիրառելով բնահեն լուծումներ: Ճանապարհը կապահովի անմիջական երթուղային կապը Երևանի 3 վարչական շրջանների (Մալաթիա-Սեբաստիա, Կենտրոն և Շենգավիթ) միջև՝ էականորեն նպաստելով տրանսպորտային հոսքերի արդյունավետ վերաբաշխմանը:
Իսակով-Արշակունյաց ճանապարհահատվածի կառուցման աշխատանքային նախագիծը պետական համալիր փորձաքննական հանձնաժողովի 2024 թվականի հունիսի 13-ի որոշմամբ ստացել է հ․ 110 դրական եզրակացությունը։ Շինարարական աշխատանքների մեկնարկից առաջ պետք է իրականացվեն շինարարության հատվածն ընդգրկող տարածքներում հողի օտարման և տարաբնակեցման աշխատանքներ:
ՀՀ կառավարության 2023 թվականի օգոստոսի 11-ի թիվ 1357-Ն որոշմամբ ճանապարհահատվածի կառուցման արդյունքում ազդեցության ենթարկվող գույքերի նկատմամբ ճանաչվել է հանրության գերակա շահ:
Համաձայն վարկային համաձայնագրի, ծրագրի շրջանակներում հողի օտարման և տարաբնակեցման աշխատանքները պետք է իրականացվեն համաձայն ՀՀ գործող վերաբերելի օրենսդրության և ԱԶԲ-ի ոչ կամավոր տարաբնակեցման քաղաքականության, որը նախատեսում է փոխհատուցումների և նպաստների տրամադրում այնպիսի կորուստների դիմաց, որոնք ՀՀ օրենսդրությամբ նախատեսված չեն:
Սույն որոշման անհրաժեշտությունը բխում է Ծրագրի շրջանակներում նախատեսվող հողերի օտարման և տարաբնակեցման՝ ՀՀ օրենսդրության և ԱԶԲ-ի ոչ կամավոր տարաբնակեցման քաղաքականության ներդաշնակեցման պահանջից՝ սահմանելու փոխհատուցման ենթակա կորուստների տեսակները և փոխհատուցման սկզբունքները:
Որոշման հավելվածներով սահմանվող ՀՕՏՇ-ն հաստատված է ԱԶԲ կողմից։
- Նախագծով առաջարկվող կարգավորումների բնույթը.
ՀՀ կառավարության կողմից ՀՕՏՇ-ն հաստատվելուց անմիջապես հետո ՀՀ կառավարության հաստատմանը կներկայացվի նաև Հողերի օտարման և տարաբնակեցման ծրագիրը (ՀՕՏԾ), որը կներառի ազդեցության ենթակա տնային տնտեսությունների և գույքերի վերաբերյալ տեղեկատվություն, ՀՕՏԾ իրականացման բյուջեն և ժամանակացույցը:
- Պետական և տեղական ինքնակառավարման մարմինների բյուջեներում եկամուտների և ծախսերի սպասվելիք փոփոխությունները.
Սույն որոշման ընդունմամբ ՀՀ պետական և տեղական ինքնակառավարման մարմինների բյուջեների եկամուտներում և ծախսերում ավելացում և (կամ) նվազեցում չի առաջանում:
- Նախագծի ընդունման առնչությամբ ընդունվելիք այլ իրավական ակտերի կամ դրանց ընդունման անհրաժեշտության մասին.
Սույն որոշման ընդունմամբ այլ իրավական ակտերում փոփոխությունների անհրաժեշտություն առկա չէ:
- Նախագծի մշակման գործընթացում ներգրավված ինստիտուտները և անձինք.
Նախագիծը մշակվել է Երևանի քաղաքապետարանի և «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ի կողմից:
- Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ».
Որոշման նախագիծն անմիջականորեն չի բխում ռազմավարական փաստաթղթերից, միաժամանակ՝ ապահովելու է Երևանի գլխավոր հատակագծով սահմանված՝ նոր ճանապարահահատվածի կառուցման ծրագրի իրականացման համար անհրաժեշտ հիմքեր և, որպես այդպիսին, անհրաժեշտ նախապայման է վարկային համաձայնագրով հաստատված Ծրագրի իրականացման համար։
-
Discussed
11.12.2024 - 26.12.2024
-
Type
Decision
-
Area
Territorial administration and development
-
Ministry
Ministry of Territorial Administration and Infrastructure
Views 1062
Print