«Ոչ սակագնային կարգավորման միջոցների, այդ թվում՝ միակողմանիորեն սահմանվող ոչ սակագնային կարգավորման միջոցների, և տեխնիկական կարգավորման միջոցների պահպանումը հաստատելու կարգը սահմանելու մասին» Հայաստանի Հանրապետության կառավարության որոշման նախագիծ

 Իրավական ակտերի ընդունման անհրաժեշտությունը, ընթացիկ իրավիճակը և խնդիրները.

 Ներկայումս Հայաստանի Հանրապետության տարածք երրորդ երկրներից ներմուծվող՝ ոչ սակագնային կարգավորման, տեխնիկական կանոնակարգման ենթակա ապրանքների համար տրամադրվող թույլատվական փաստաթղթղերը տրամադրվում են ճյուղային օրենսդրությամբ սահմանված կարգերով և ժամկետներում, ինչը որոշակիորեն տարբեր մոտեցումների պատճառ է դառնում միատեսակ գործառնությունների ենթակա ապրանքների սահմանահատման ժամանակ և երբեմն անհարկի ձգձգում է մաքսային մարմինների կողմից ապրանքների բացթողումը։ Ներկայումս թույլատվական փաստաթղթերի տրամադրման՝ օրենսդրությամբ սահմանված ամենակարճ ժամանակահատվածը 3 օրն է, այն պարագայում, երբ մաքսային օրենսդրությամբ սահմանված է, որ հայտարարատուի կողմից բացթողման պայմանները ապահովելուց հետո մաքսային մարմինը 4 ժամվա ընթացքում պետք է իրականացնի ապրանքների բացթողումը։

 Կարգավորման առարկան, ակնկալվող արդյունքը.

 Ներկայացված նախագծով առաջարկվում է սահմանել ապրանքների մաքսային սահմանով տեղափոխման ժամանակ պահանջվող թույլատվական փաստաթղթերի տրամադրման միասնական ժամկետներ, ընդ որում՝ այդ ժամկետներն առաջարկվում է կրճատել՝ նախատեսելով, որ լիարժեք փաստաթղթային փաթեթի առկայության պարագայում (փորձաքննության անհրաժեշտության բացակայության դեպքում) թույլատրական փաստաթղթի տրամադրումը կամ դրա տրամադրման մերժումը իրականացվելու է առավելագույնը մեկ աշխատանքային օրվա ընթացքում, իսկ փորձաքննության պահանջի առկայության պարագայում՝ փորձաքննության արդյունքները ստանալուց հետո առավելագույնը մեկ աշխատանքային օրվա ընթացքում։                                           Նախագծի ընդունումը հնարավորություն կտա ապահովել ապրանքների բացթողման ժամանակահատվածի կրճատումը՝ ներդրված էլեկտրոնային համակարգի կիրառման արդյունավետության բարձրացման շնորհիվ՝ խնայելով պետական կառավարման մարմինների և տնտեսվարողների աշխատանքային և ժամանակային ռեսուրսը։                                                                             Ռադիոակտիվ նյութերի ներմուծման կամ արտահանման հետ կապված Հայաստանի Հանրապետության միջազգային պարտավորությունների (Ռադիոակտիվ աղբյուրների անվտանգության և պահպանվածության վարքագծի կանոններ` Code of conduct on safety and security of radioactive sources- 23-27 կետեր) համաձայն՝  դրանց ներմուծման լիցենզիա ստանալու  հայտը և կից փաստաթղթերը լիցենզավորող մարմին պետք է ներկայացվեն Հայաստանի Հանրապետության պետական սահմանի անցման համապատասխան կետ` դրանց հասնելուց առնվազն մեկ ամիս առաջ, ուստի միջուկային և ռադիոակտիվ նյութերի թույլատվական փաստաթղթերի տրամադրման ժամկետների մասով նախագծով սահմանվել է բացառություն՝ հաշվի առնելով այն հանգամանքը, որ նշված փաստաթղթերը տրամադրվում են մինչև ապրանքների մաքսային հայտարարագրումը։