ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2022 ԹՎԱԿԱՆԻ ԱՊՐԻԼԻ 28-Ի N 596-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2022 ԹՎԱԿԱՆԻ ԱՊՐԻԼԻ 28-Ի N 596-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Իրավական ակտի անհրաժեշտությունը (նպատակը)

    Նախագծի մշակման նպատակը գործող կարգում կամավոր ատեստավորման գործընթացի կազմակերպման ընթացքում ի հայտ եկած բացերի և խնդիրների հստակեցումն է ու որոշ դրույթների վերանայման արդյունքում  միջոցառման ավելի կանոնակարգված կազմակերպումը:

2. Կարգավորման հարաբերությունների ներկա վիճակը և առկա խնդիրները

2022 թվականին Կառավարության սույն որոշման գործարկման ընթացքում արձանագրվեցին մի շարք խնդիրներ, որոնք ենթակա են կարգավորման՝ գործընթացի անխոչընդոտ իրականացման համար: Մասնավորապես, հայտերի մուտքագրման ժամանակ հետադարձ կապի ապահովման բացակայությունը հայտատուների և նախարարության համար լրացուցիչ խնդիր էր առաջացնում, որի պատճառով մեծ թվով զանգեր էին ստացվում և և՛ նախարարությունում, և՛ ԿՏԱԿ-ում՝  ճշտելու համար՝ արդյոք դիմումներն ընդունվել են:

Հարկ է նշել, որ ազգային փոքրամասնության լեզուների դասավանդողների համար ևս նախատեսվել էր կամավոր ատեստավորում, մանավանդ որ քիչ դասաժամեր ունենալու պատճառով վարձատրությունը ցածր է: Հաշվի առնելով, որ ազգային փոքրամասնության լեզուների դասավանդողների թափուր տեղեր կան, և պակասը չի լրացվում նույն պատճառով (նաև համապատասխան կրթությամբ մասնագետ չլինելու), ուստի այս փոփոխությամբ առաջարկվում է ատեստավորման հնարավորություն ընձեռել նաև խմբակավարների համար, ինչը լրացուցիչ խթան կհանդիսանա այդ լեզուների դասավանդումը ավելի պատշաճ իրականացնելու հարցում:

  Տարընթերցումների հիմք էին հանդիսացել նաև դրույքաչափի փոփոխության ժամկետի, ինչպես նաև դասավանդվող ժամերի նկատմամբ հաշվարկվող հավելավճարի վերաբերյալ դրույթները, որոնք կարգավորվել են:

  Համատեղությամբ աշխատող ուսուցիչների վճարման դրույթը ևս վերանայվել է՝ լավարկման սկզբունքով:

   Կամավոր ատեստավորման ընթացքում անհրաժեշտ արդյունք չցուցաբերած ուսուցիչները հնարավոր է՝ այլ աշխատավայրում շարունակեն գործունեությունը, և որևէ արգելող կարգավորում առկա չէ կարգում, ուստի անհրաժեշտություն առաջացավ նոր աշխատավայրում հաստատության տնօրենի պարտականություն սահմանել ուսուցչի վերապատրաստումը կազմակերպելու հարցը:

3. Առկա խնդիրների առաջարկվող լուծումները

Գործող կարգում արձանագրված խնդիրները լուծելու նպատակով առաջարկվում է «Նախնական զինվորական պատրաստություն, Ֆիզկուլտուրա առարկաների ատեստավորումն իրականացնել միայն թեստավորման եղանակով՝ հաշվի առնելով 2022 թ.-ին ի հայտ եկած խնդիրները:

Ազգային փոքրամասնության լեզուների ուսուցման առկա խնդիրների կարգավորման միջոց է դիտարկվել նաև խմբակավարների մասնակցությունն ատեստավորմանը, որով հնարավոր կլինի դասավանդողների թափուր տեղերը փոքրիշատե համալրել, խթանել բուհական կրթություն ստանալու ձգտումը, բարձրացնել նաև խմբակավարների վարձատրությունը:

Երկարացվել է հայտ ներկայացնելու ժամկետը, կարգավորվել են ատեստավորման գործընթացի ժամանակացույցի և մեթոդական ուղեցույցի հրապարակման ժամկետները:

Ուսուցիչների դրույքաչափի փոփոխության ժամկետի սահմանափակում կարգում չի սահմանվել, սակայն դրույթը հստակեցմանկարիք ուներ։

 Հավելավճար ստացող ուսուցիչներին համատեղությամբ աշխատելու դեպքում հավելավճար չէր սահմանվել, ինչը դժգոհությունների հիմք էր հանդիսացել:

4. Իրավական ակտի կիրառման դեպքում ակնկալվող արդյունքը.

Կամավոր ատեստավորման գործընթացը շահառուների մի խմբի (օրինակ՝ «Նախնական զինվորական պատրաստություն, Ֆիզկուլտուրա առարկաների ուսուցիչների, համատեղությամբ աշխատողների) համար կիրականացվի ավելի հստակ կարգավորումների համաձայն:

Առանց ժամկետային սահմանափակման դրույքաչափի փոփոխության (200.000 դրամ)  մասին դրույթը  կլինի ավելի հստակ ձևակերպումով:

      Ազգային փոքրամասնության լեզուների ուսուցման որակի բարձրացմանը կարող է նպաստել  խմբակավարների մասնակցությունն ատեստավորմանը:

  Համատեղությամբ աշխատող ուսուցիչները կարող են հավելավճար ստանալ նաև 2-րդ աշխատավայրում՝ առանց դրույքաչափի փոփոխության:

    Աշխատավայրը փոխած ուսուցչի վերապատրաստման պատասխանատու է սահմանվել նոր հաստատության տնօրենը:

«Հայաստանի Հանրապետության կառավարության 2022 թվականի ապրիլի 28-ի N 596-Ն որոշման մեջ փոփոխություններ և լրացումներ կատարելու մասին» Հայաստանի Հանրապետության կառավարության որոշման ընդունումը նախատեսում է պետական բյուջեի  ծախսերի ավելացում:

Կապը ռազմավարական փաստաթղթերի հետ

Միջոցառման անհրաժեշտությունը բխում է «2050 ՀԱՅԱՍՏԱՆԻ ՎԵՐԱՓՈԽՄԱՆ ՌԱԶՄԱՎԱՐՈՒԹՅՈՒՆ» ծրագրի «ՄԻՆՉԵՎ 2030 ԹՎԱԿԱՆԻ ՄԵԳԱՆՊԱՏԱԿՆԵՐԻ»   ԳՈՐԾՈՂՈՒԹՅՈՒՆՆԵՐԻ «1․ ԿԻՐԹ ԵՎ ԿԱՐՈՂՈՒՆԱԿ ՔԱՂԱՔԱՑԻ, ԺՈՂՈՎՈՒՐԴ» համար 1 մեգանպատակի թիրախային արդյունքի ցուցանիշի ապահովման պահանջից:  

  Միջոցառման անհրաժեշտությունը բխում է «Հայաստանի Հանրապետության կրթության մինչև 2030 թվականը զարգացման պետական ծրագրի» հավելվածի 2-րդ՝ «Կրթության առկա վիճակը և հիմնախնդիրները» գլխի 43-րդ և 45-րդ կետերով սահմանված, 3-րդ՝ «Կրթության մինչև 2023 թվականը զարգացման տեսլականը, նպատակը և ուղղությունները» գլխի  72-րդ, 73-րդ կետերով, 76-րդ կետի 2-րդ ենթակետով սահմանված թիրախային արդյունքների ցուցանիշի ապահովման պահանջից: 

  Միջոցառման անհրաժեշտությունը բխում է նաև ՀՀ կառավարության 2021 թվականի նոյեմբերի 18-ի 1903-Լ որոշմամբ հաստատված՝ ՀՀ կատավարության 2021-2026 թվականների  Կրթության, գիտության, մշակույթի և սպորտի նախարարության բաժնի 2.2 կետով սահմանված միջոցառման իրականացման անհրաժեշտությունից:

  Միջոցառման անհրաժեշտությունը բխում է ՀՀ կառավարության 2021 օգոստոսի 18-ի թիվ 1363-Ա որոշմամբ հաստատված ՀՀ կառավարության  ծրագրի «4.3 ԿՐԹՈՒԹՅՈՒՆ» բաժնի  1-ին, 3-րդ պարբերությունից, 3-րդ պարբերության 4-րդ կետից:

     Միջոցառման անհրաժեշտությունը բխում է նաև «Հանրակրթության մասին» ՀՀ օրենքի 26-րդ հոդվածի 11-րդ  կետի պահանջից։

Իրավական ակտի մշակման գործընթացում ներգրավված ինստիտուտները, անձինք:

ՀՀ կրթության, գիտության, մշակույթի և սպորտի նախարարություն