«ԱԴԱՊՏԻՎ ՍՊՈՐՏԻ ԿԵՆՏՐՈՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ ՍՏԵՂԾԵԼՈՒ ՄԱՍԻՆ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

--------   ------------------- 2022 թ. № ----------- -Ն

«ԱԴԱՊՏԻՎ ՍՊՈՐՏԻ ԿԵՆՏՐՈՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ ՍՏԵՂԾԵԼՈՒ ՄԱՍԻՆ

 Հիմք ընդունելով «Պետական ոչ առևտրային կազմակերպությունների մասին» Հայաստանի Հանրապետության օրենքի 9-րդ հոդվածը, «Հաշմանդամություն ունեցող անձանց իրավունքների մասին» Հայաստանի Հանրապետության օրենքի 8-րդ հոդվածի 1-ին մասի 4-րդ կետը` Հայաստանի Հանրապետության կառավարությունը որոշում է.

1. Ստեղծել Հայաստանի Հանրապետության կրթության, գիտության, մշակույթի և սպորտի նախարարության ենթակայության «Ադապտիվ սպորտի կենտրոն» պետական ոչ առևտրային կազմակերպություն:
2. Սահմանել, որ «Ադապտիվ սպորտի կենտրոն» պետական ոչ առևտրային կազմակերպության գործունեության հիմնական նպատակն է՝ Հայաստանի Հանրապետությունում հաշմանդամություն ունեցող անձանց ադապտիվ ֆիզիկական կուլտուրայով և ադապտիվ սպորտով զբաղվելու համար համապատասխան պայմանների ստեղծում, հաշմանդամային սպորտի զարգացում և պարալիմպիկ մարզաձևերի ՀՀ հավաքական թիմերի համալրում:
3. Թույլատրել «Ադապտիվ սպորտի կենտրոն» պետական ոչ առևտրային կազմակերպությանն իրականացնել ձեռնարկատիրական գործնեության հետևյալ տեսակները.

1) լրացուցիչ մանկավարժական, հոգեբանական և ֆիզկուլտուրային-առողջարարական ծրագրերի իրականացում,

2) հաշմանդամային-ադապտիվ սպորտի բնագավառի՝ կազմակերպության հիմնական գործունեության մեջ չներառված գործունեություն:

4. «Ադապտիվ սպորտի կենտրոն» պետական ոչ առևտրային կազմակերպության կառավարման, ինչպես նաև «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի 2-րդ մասի «գ», «դ», «ե», և «է» ենթակետերով ու 14-րդ հոդվածով նախատեսված լիազորությունները վերապահել Հայաստանի Հանրապետության կրթության, գիտության, մշակույթի և սպորտի նախարարությանը:
5. «Երևանի Համո Սահյանի անվան հ. 70 հիմնական դպրոց» պետական ոչ առևտրային կազմակերպությանը անհատույց օգտագործման իրավունքով ամրացված շենքի 1-ին մասնաշենքի 2-րդ հարկի 150քմ տարածքը վերցնել և անհատույց օգտագործման հանձնել «Ադապտիվ սպորտի կենտրոն» պետական ոչ առևտրային կազմակերպությանը:
6. Թույլատրել «Երևանի Համո Սահյանի անվան հ. 70 հիմնական դպրոց» պետական ոչ առևտրային կազմակերպությանը 3-րդ մասնաշենքը համատեղ օգտագործել «Ադապտիվ սպորտի կենտրոն» պետական ոչ առևտրային կազմակերպության հետ:
7. «Ադապտիվ սպորտի կենտրոն» պետական ոչ առևտրային կազմակերպության ֆինանսավորումն իրականացվում է Հայաստանի Հանրապետության օրենսդրությամբ սահմանված կարգով:
8. Հայաստանի Հանրապետության կրթության, գիտության, մշակույթի և սպորտի նախարարին՝ եռամսյա ժամկետում՝

ա) հաստատել «Ադապտիվ սպորտի կենտրոն» պետական ոչ առևտրային կազմակերպության կանոնադրությունը,

բ ապահովել «Ադապտիվ սպորտի կենտրոն» պետական ոչ առևտրային կազմակերպության պետական գրանցումը,

գ) հաստատել «Ադապտիվ սպորտի կենտրոն» պետական ոչ առևտրային կազմակերպությանը սեփականության իրավունքով հանձնվող գույքի կազմը:

9. «Ադապտիվ սպորտի կենտրոն» պետական ոչ առևտրային կազմակերպության 2022 թվականի գործնեության հետ կապված անհրաժեշտ պետական ֆինանսական հատկացումներն իրականացնել Հայաստանի Հանրապետության կառավարության պահուստային ֆոնդի միջոցների հաշվին:
10. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: