ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

­­­­­­­­­­­­­­­­­                     2022 թվականի N              -Ն

ՀԱՆՑԱԳՈՐԾՈՒԹՅԱՄԲ ՏՈՒԺՈՂՆԵՐԻՆ ՊԱՏՃԱՌՎԱԾ ՎՆԱՍԻ ՓՈԽՀԱՏՈՒՑՄԱՆ ՍԿԶԲՈՒՆՔՆԵՐԸ, ԱՌԱՋՆԱՀԵՐԹՈՒԹՅՈՒՆՆԵՐԸ, ՓՈԽՀԱՏՈՒՑՄԱՆ ԿԱՐԳԸ ԵՎ ՉԱՓԸ ՍԱՀՄԱՆԵԼՈՒ ՄԱՍԻՆ

Հիմք ընդունելով Հայաստանի Հանրապետության քրեական օրենսգրքի 59-րդ հոդվածի 6-րդ մասի պահանջները` Հայաստանի Հանրապետության կառավարությունը որոշում է.

1. Սահմանել հանցագործությամբ տուժողներին պատճառված վնասի փոխհատուցման սկզբունքները, առաջնահերթությունները, փոխհատուցման կարգը և չափը՝ համաձայն հավելվածի:
2. Սույն որոշումն ուժի մեջ է մտնում «Հայաստանի Հանրապետության քրեական օրենսգիրք» 2021 թվականի մայիսի 5-ի ՀՕ-199-Ն օրենքի ուժի մեջ մտնելու օրը:

      2022 թ. ................................

                           Երևան

ՀԱՆՑԱԳՈՐԾՈՒԹՅԱՄԲ ՏՈՒԺՈՂՆԵՐԻՆ ՊԱՏՃԱՌՎԱԾ ՎՆԱՍԻ ՓՈԽՀԱՏՈՒՑՄԱՆ ՍԿԶԲՈՒՆՔՆԵՐԸ, ԱՌԱՋՆԱՀԵՐԹՈՒԹՅՈՒՆՆԵՐԸ, ՓՈԽՀԱՏՈՒՑՄԱՆ ԿԱՐԳԸ ԵՎ ՉԱՓԸ 

1. Հանցագործությամբ տուժողներին պատճառված վնասի փոխհատուցումն իրականացվում է թափանցիկության, անաչառության և մարդասիրության սկզբունքներով:
2. Յուրաքանչյուր անգամ պետության կողմից հանցագործությամբ տուժողներին պատճառված վնասի փոխհատուցման առաջանահերթությունները որոշվում են՝ հաշվի առնելով հաշվետու ժամանակահատվածում հանցագործությունների վիճակագրությունը, որոշակի խումբ հանցագործությունների տարածվածությունը, տուժողների գույքային դրությունը, հանցագործությունների և դրանցով պատճառված վնասի բնույթը:
3. Քրեական վարույթով հատուցման ենթակա են տուժողին պատճառված վնասի ներքոնշյալ տեսակները՝ նշված հերթականությամբ՝  

• բժշկական սպասարկման համար ծախսված գումարը,
• անաշխատունակության հետևանքով կրած դրամական վնասը,
• հուղարկավորության համար ծախսված գումարը,
• կերակրողին կորցնելու հետևանքով պատճառված դրամական վնասը,
• հափշտակված գումարը:

4. Սույն կարգի 3-րդ կետով նախատեսված վնասի յուրաքանչյուր հաջորդ տեսակը ենթակա է հատուցման միայն նախորդ տեսակի վնասը հատուցելուց հետո:
5. Հանցագործությունից տուժած անձինք հանցագործությամբ իրենց պատճառված վնասի համար կարող են դիմել լիազոր մարմնին՝ ներկայացնելով հետևյալ փաստաթղթերը՝

• անձը հաստատող փաստաթղթի պատճենը.
• քրեական վարույթով օրինական ուժի մեջ մտած եզրափակիչ դատավարական ակտը.
• տվյալ քրեական վարույթով իրեն որպես տուժող ճանաչելու մասին որոշումը.
• դրամական վնասի դեպքում` դրանց առկայությունը և չափը հաստատող փաստաթղթերը.
• կերակրողին կորցնելու հետևանքով պատճառված դրամական վնասի դեպքում` նշված փաստը հաստատող տվյալները.
• Հարկադիր կատարումն ապահովող ծառայության կատարողական վարույթի շրջանակներում պատճառված վնասը փոխհատուցելու անհնարինությունը հավաստող տվյալները.
• լիազոր մարմնին ուղղված դիմում:

6. Հանցագործությամբ տուժողներին պատճառված վնասի փոխհատուցում ստանալու դիմում կարող է ներկայացվել, եթե պատճառված վնասը հնարավոր չի եղել փոխհատուցել Հարկադիր կատարման ծառայության կատարողական վարույթի շրջանակներում:
7. Հանցագործությամբ տուժողներին պատճառված վնասի փոխհատուցում չի իրականացվում, եթե տուժողի կողմից կատարվել են հանցագործությանը նպաստող կամ քննությանը խոչընդոտող ապօրինի արարքներ:
8. Լիազոր մարմնի կողմից իրականացվում է ներկայացված դիմումի և դրան կից փաստաթղթերի ուսումնասիրություն, որի հիման վրա որոշում է կայացվում ներկայացված հայտին հավանություն տալու կամ այն մերժելու մասին: Հայտին հավանություն տալու դեպքում լիազոր մարմինը սկսում է տուժողին պատճառված վնասի փոխհատուցման գործընթաց:
9. Փոխհատուցում կարող է տրամադրվել, եթե պատճառված վնասի չափը գերազանցում է Հայաստանի Հանրապետությունում օրենքով սահմանված նվազագույն աշխատավարձի հիսնապատիկը:
10. Փոխհատուցում կարող է տրամադրվել պատճառված վնասի (մեկից ավելի տեսակի վնաս պատճառված լինելու դեպքում՝ դրանց հանրագումարի) մինչև նվազագույն աշխատավարձի երկուհազարապատիկը չգերազանցող գումարի չափով:
11. Սույն հավելվածով նախատեսված լիազոր մարմինը ճանաչվում է Հայաստանի Հանրապետության կառավարության կողմից՝ յուրաքանչյուր անգամ պետության կողմից հանցագործությամբ տուժողներին պատճառված վնասի փոխհատուցման մասին որոշում կայացնելու դեպքում: