ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2015 ԹՎԱԿԱՆԻ ՄԱՐՏԻ 19-Ի N596-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

1.

Անհրաժեշտությունը

«ՀՀ կառավարության 2015 թվականի մարտի 19-ի N596-Ն որոշման մեջ լրացում կատարելու մասին» ՀՀ կառավա­րության որոշման նախագիծը մշակվել է ՀՀ կառավարության 2017 թվականի մայիսի 25-ի N 29.6/[407365]-17 (22) հանձնարարականի 3-րդ կետի կատարման շրջանակներում:

2.

Ընթացիկ իրավիճակը և խնդիրները

Ներկայումս կառուցվող շենքերի արտաքին տեսքի՝ ճակատների, տանիքների և այլ կարևոր տարրերի նկատմամբ որևէ համակարգված պահանջներ չեն ներկայացվում: ՀՀ կառավարության 2011 թվականի դեկտեմբերի 29-ի N1920-N և 2001 թվականի մայիսի 14-ի N 408 որոշումներով նախատեսված  է, որ համայնքը պետք է ունենա քաղաքաշինական կանոնադրություն, որով պետք է սահմանվեն համայնքի տարածքում կառուցապատման, ճարտարապետական ոճի, օգտագործվող շինանյութերի, գունային համադրությունների և այլ քաղաքաշինական և ճարտարապետական առանձնահատկությունները, ելնելով պատմականորեն ձևավորված միջավայրի, ավանդույթների, տարածաշրջանին  բնորոշ արվեստների և արհեստների պահպանման և զարգացման նպատակներից, տրված է նաև քաղաքաշինական կանոնադրության օրինակելի ձևը (N408 որոշում)

Սակայն նշված պահանջը, արտացոլված չլինելով Ճարտարապետահատակագծային առաջադրանքում, հիմնականում անտեսվում է:

3.

Տվյալ բնագավառում իրականացվող քաղաքականությունը

Խնդրո առարկա հարցի համատեքստում իրականացվող քաղաքականությունը նպատակաուղղված է քաղաքաշինական փաստաթղթերի լիարժեք տեղեկատվության արդյունքում ունենալ ազգային ճարտարապետության ավանդույթներով հարուստ, ներդաշնակ գունային  լուծումներով  և զբոսաշրջության համար գրավչություն ներկայացնող կառուցապատ թաղամասեր:

4.

Կարգավորման նպատակը և բնույթը

  Նախագծման թույլտվության (ճարտարապետահատակագծային առաջադրանքի) մեջ լրացում կատարելու նպատակն է  նախագծային փաստաթղթերի միջոցով կանոնակարգել կառուցվող շենքերի ճարտարապետական ոճերը, ճակատային լուծումներն ու դրանց շեշտադրող տարրերը, հորինվածքները, զարդաքանդակները, արտաքին դռների ու պատուհանների համաչափությունները և տանիքների ներդաշնակ գունային լուծումները:

5.

Նախագծի մշակման գործընթացում  ներգրավված ինստիտուտները և անձիք

  Նախագիծը մշակվել է ՀՀ կառավարությանն առընթեր քաղաքաշինության պետական կոմիտեի կողմից:

6.

Ակնկալվող արդյունքը

  Նախագծային փուլում կառուցվող շենքերի ճակատների հորինվածքների, արտաքին դռների, պատուհանների և տանիքների գունային լուծումների կանոնակարգման արդյունքում ակնկալվում է  ՀՀ համայնքներում կառուցապատման գործառույթների իրականացման ընթացքում նպաստել պատմականորեն ձևավորված կենսամիջավայրի և ազգային ճարտարապետության ավանդույթների պահպանմանը, վերականգնմանն ու զարգացմանը, ճարտարապետական կերպարի միասնականության ապահովմանը, ճակատների ու տանիքների գունային լուծումների ներդաշնակությանը: