2019-2025 ԹՎԱԿԱՆՆԵՐԻ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՉԱՓԱԳԻՏՈՒԹՅԱՆ ԱԶԳԱՅԻՆ ԵՆԹԱԿԱՌՈՒՑՎԱԾՔԻ ԱՐԴԻԱԿԱՆԱՑՄԱՆ ՌԱԶՄԱՎԱՐՈՒԹՅԱՆԸ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ

1. Որոշման նախագծի հավելվածը լուրջ խմբագրման կարիք ունի, մասնավորապես, զգացվում է, որ նյութը թարգմանվել է որևէ աղբյուրից, իսկ նախադասությունների կառուցվածքները հաճախ սխալ են և աղավաղվում է դրանց իմաստը։ Առկա են բազմաթիվ դեկլարատիվ բնույթի անիմաստ նախադասություններ։ Օրինակ՝ "Չափումների միասնականության ապահովման համակարգի զարգացումը դրական ազդեցություն է ունենում բնակչության սոցիալական կայունության վրա, քանի որ նվազեցնում է տարաձայնությունները գնորդի և վաճառողի, արտադրողի և սպառողի միջև:" նախադասության փոխարեն ավելի գրագետ ու ռազմավարության իմաստով առավել տրամաբանված կլիներ գրել՝ "Զարգացած չափումների միասնականության ապահովման համակարգը երաշխավորում է բնակչության սոցիալական կայունությունը, նվազեցնելով տարաձայնությունները գնորդի և վաճառողի, արտադրողի և սպառողի միջև։" Կամ ինչպե՞ս հասկանալ "Օրենսդրական չափագիտության ոլորտում օգտագործվող սարքավորումների թիվը երկրում կարող է պայմանավորված լինել ստուգաչափումների տարեկան թվին (մոտ 300 000), մինչդեռ տրամաչափարկումն անհրաժեշտ է ի հավելումն օրենքով նախատեսված ստուգաչափման:" նախադասությունը։ Այդպիսի օրինակները բազմաթիվ են, ողջ տեքստը խմբագրման կարիք ունի։

2․ Հավելվածում նշում են որոշակի տվյալներ կամ պնդումներ, որոնք հիմնված են ինչ-որ հետազոտությունների կամ ուսումնասիրությունների վրա, սակայն բացակայում են այդ հետազոտություններին կատարված հղումները։ Հետևապես, օրինակ, խիստ կասկածելի է թվում "Այլ հետազոտական աշխատանքներից և հաշվարկից երևում է, որ եթե չափագիտության մեջ ֆինանսավորումն ավելանա նախատեսված գումարի 10%-ի չափով, ապա տվյալ ժամանակահատվածում ՀՆԱ-ի աճը կկազմի 1.5%՝ նորարարական արտադրանքի վաճառքի արդյունքում։" արտահայտությունը։

3․ Հավելվածում բերված սահմանումներն արդեն իսկ սահմանված են "Չափումների միասնականության ապահովման մասին" ՀՀ օրենքով։ Կարծում եմ, որևէ անհրաժեշտություն չկա դրանք կրկնել ռազմավարության մեջ։