«ԵՐԵՎԱՆ ՔԱՂԱՔԻ ԾՈՎԱԿԱԼ ԻՍԱԿՈՎԻ ՊՈՂՈՏԱ - ԱՐՇԱԿՈՒՆՅԱՑ ՊՈՂՈՏԱ ՃԱՆԱՊԱՐՀԱՀԱՏՎԱԾՈՒՄ ԱՌԿԱ ԳՈՒՅՔԵՐԻ ՆԿԱՏՄԱՄԲ ՀԱՆՐՈՒԹՅԱՆ ԳԵՐԱԿԱ ՇԱՀ ՃԱՆԱՉԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ

ՀԻՄՆԱՎՈՐՈՒՄ

«ԵՐԵՎԱՆ ՔԱՂԱՔԻ ԾՈՎԱԿԱԼ ԻՍԱԿՈՎԻ ՊՈՂՈՏԱ - ԱՐՇԱԿՈՒՆՅԱՑ ՊՈՂՈՏԱ ՃԱՆԱՊԱՐՀԱՀԱՏՎԱԾՈՒՄ ԱՌԿԱ ԳՈՒՅՔԵՐԻ ՆԿԱՏՄԱՄԲ ՀԱՆՐՈՒԹՅԱՆ ԳԵՐԱԿԱ ՇԱՀ ՃԱՆԱՉԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ

1.   Նախագծի անհրաժեշտությունը.

Երևան քաղաքի գլխավոր հատակագծով նախատեսվում է Իսակով և Արշակունյաց փողոտաների միացումն ապահովող ճանապարհի կառուցման աշխատանքները: 2014 թվականին Երևանի քաղաքապետարանն ավարտել է Մոնթե Մելքոնյան փողոցի շինարարական աշխատանքները և այն հանձնել շահագործման (Իսակով – Լենինգրադյան ճանապարհ): Այս փողոցի տրամաբանական շարունակությունն Իսակով-Արշակունյաց ճանապարհահատվածն է (այսուհետ՝ Ճանապարհ), որը հանդիսանում է Լենինգրադյան փողոց–Ծովակալ Իսակովի պողոտա կառուցված ավտոմայրուղու շարունակությունը և անցնելով նախատեսվող «Դաունթաուն Երևան» (Նորագյուղ) նախագծային թաղամասի միջով և Հրազդան գետի վրայով` միանում է Արշակունյաց պողոտային: Հիշյալ պարագայում նախատեսված է լրացնել Իսակով պողոտայի հանգույցի թևերը, որով կապահովվի երթևեկության ուղղությունների բոլոր կապերը: Մայրուղու երկու հատվածների ամբողջականությունը մայրաքաղաքի կենտրոնի երթևեկության բեռնաթափման տարանցիկ լուծումներից մեկն է՝ միմյանց կապելով Երևան քաղաքի 3 վարչական շրջան և իր վրա վերցնելով տրանսպորտային մեծ հոսքեր:

2.   Ընթացիկ իրավիճակը և խնդիրները.

Ճանապարհահատվածի կառուցման համար Հայաստանի Հանրապետության և Ասիական զարգացման բանկի միջև 2023 թվականի նոյեմբերի 27-ին ստորագրվել է վարկային համաձայնագիր: Ծրագիրն իրականացնելու համար հատկացվել է 85.67 միլիոն ԱՄՆ դոլար, որից 20,5 միլիոն ԱՄՆ դոլար նախատեսվել է պետական ֆինանսավորմամբ: Նշված համաձայնագրով նախատեսված ծրագրի իրականացման ժամկետը 4 տարի է, ավարտը՝ 2028 թվականի մարտի 30-ին։ Ծրագիրն իրականացնում է Երևանի քաղաքապետարանի «Երևանի կառուցապատման ներդրումային ծրագրերի իրականացման գրասենյակ» համայնքային ոչ առևտրային կազմակերպությունը:

Պատրաստ են Ծրագրի իրականացման նախագծանախահաշվային փաստաթղթերը, ինչպես նաև ստացված է շինարարության թույլտվությունը: Նախագիծը ներառում է Իսակով պողոտայի վրա առկա ճանապարհային հանգույցի անհրաժեշտ թևերի կառուցում՝ ապահովվելու է մուտք դեպի Նորագյուղ թաղամաս, Հրազդան գետի վրա 269մ երկարությամբ երկաթբետոնե հեծաններով կամուրջ: Արշակունյաց պողոտայում կառուցվելու է թունելային անցմամբ և շրջանաձև երթևեկությամբ ճանապարհային հանգույց: Հիմնական ճանապարհի երկարությունը 1.86 կմ է (իջատեղերով՝ 6.57 կմ): Ճանապարհը հիմնականում բաղկացած է 6 երթևեկելի գոտուց (3x3), որտեղ ճանապարհի երևեկելի հատվածի լայնությունը կազմում է 24.5 մ:

Իրականացված են վարկային ծրագրի շրջանակներում շինարարական աշխատանքների և նախագծի վերանայման ու տեխնիկական հսկողության խորհրդատուի մրցութային գործընթացները։ Շինարարական աշխատանքների համար միջազգային մրցույթն ավարտված է, ընթանում են հաղթող ընկերության հետ պայմանագրի կնքման բանակցությունները։ Տեխնիկական հսկողության ծառայությունների մրցույթը ամփոփման փուլում է։

Ակնկալվում է 2026 թվականի գարնանը մեկնարկել շինարարական աշխատանքները, որպիսի պարագայում օտարման այս գործընթացների իրականացումը կրիտիկական անհրաժեշտություն է։

Հայաստանի Հանրապետության կառավարությունը 2023 թվականի օգոստոսի 11-ին ընդունել է «Երևան քաղաքի Ծովակալ Իսակովի պողոտա-Արշակունյանց պողոտա ճանապարհահատվածում առկա գույքերի նկատմամբ հանրության գերակա շահ ճանաչելու մասին» թիվ 1357-Ն որոշումը, որում  ներառվել են 21 (քսանմեկ) ֆիզիկական և 6 (վեց) իրավաբանական անձանց պատկանող թվով անշարժ գույքեր (ընդամենը՝ 27 (քսանյոթ) միավոր)։ Նշված անձանց հետ գույքերի օտարման գործընթացն ընթանում է Հայաստանի Հանրապետության օրենսդրությամբ սահմանված կարգով: Սակայն, նշված գործընթացի հետ մեկտեղ, տվյալների բազայի ուսումնասիրման և տեղում օտարման գործընթացի իրականացման ընթացքում պարզվել է, որ առկա են գույքեր, որոնք չեն ներառվել վերը նշված որոշման մեջ, մասնավորապես,

1)     Կաշեգործների փող․, 468, հողամասի կադաստրային ծածկագիր՝ 01-011-0066-0131

2)    Կաշեգործների փող․, 466, հողամասի կադաստրային ծածկագիր՝01-011-0066-0132

3)    Արմենակյան փողոց 1/2,  հողամասի կադաստրային ծածկագիր՝ 01-006-0708-0064

4)    Ծովակալ Իսակովի պողոտա 15/15, հողամասի կադաստրային ծածկագիր 01-006-0708-0063:

Այսպես, Կաշեգործների փող․, 468, կադաստրային ծածկագիր՝ 01-011-0066-0131, Արմենակյան փողոց 1/2,  հողամասի կադաստրային ծածկագիր՝ 01-006-0708-0064 և Ծովակալ Իսակովի պողոտա 15/15, հողամասի կադաստրային ծածկագիր 01-006-0708-0063 անշարժ գույքերը թիվ 1357-Ն որոշմամբ հաստատված ցանկում ներառված չի եղել կադաստրային քարտեզում առկա անճշտությունների պատճառով, իսկ Կաշեգործների փող․, 466, կադաստրային ծածկագիր՝ 01-011-0066-0132 գույքի վերաբերյալ 2025 թվականի ապրիլի 7-ին Հայաստանի Հանրապետության վարչական դատարանը կայացրել է վճիռ՝ «Իրավունք հաստատող փաստաթղթերը չպահպանված անհատական բնակելի տների կարգավիճակի մասին» ՀՀ օրենքի շրջանակներում սեփականության իրավունքը վերականգնելու վերաբերյալ։ Վճռից ծագող իրավունքների գրանցման պարագայում առաջանում է նոր գույքային միավոր, առանց որի օտարման հնարավոր չէ իրականացնել ծրագիրը:

Կաշեգործների փ., 468/2, Ծովակալ Իսակովի պողոտա 10/6 և Կաշեգործների փ., 474 գույքերի հարկադիր օտարման հայցադիմումը ընթացակարգային թերությունների պատճառաբանությամբ դատարանի կողմից վարույթ չի ընդունվել, և ըստ այդմ՝ հանրության գերակա շահի ռեժիմն այս գույքերի մասով համարվում է ուժը կորցրած:

3.   Նախագծով առաջարկվող կարգավորումների նպատակը և բնույթը.

Հաշվի առնելով վարկային համաձայնագրով հաստատված ճանապարհի ծրագրի իրականացման անհրաժեշտությունը և այն, որ Հայաստանի Հանրապետության կառավարության 11.08.2023 թ. N 1357-Ն որոշմամբ Իսակով-Արշակունյաց ճանապարհի ազդեցության գոտում ընդգրկված գույքերի նկատմամբ արդեն իսկ ճանաչավել է գերակա շահ, մասնակի օտարման գործընթաց իրականացվել՝ ծրագիրն ամբողջությամբ իրականացնելու համար անհրաժեշտ է օտարել վերը նշված թվով 7 (յոթ) միավոր գույքերը, որի համար առաջարկվում է նշված գույքերի նկատմամբ ճանաչել հանրության գերակա շահ:

4.   Ակնկալվող արդյունքը.

Հայաստանի Հանրապետության կառավարության որոշման ընդունման դեպքում հնարավոր կլինի ամբողջ ծավալով ապահովել Իսակով-Արշակունյաց ճանապարհի կառուցման համար պահանջվող օտարման գործընթացը՝ նպաստելով շինարարական աշխատանքների անխափան իրագործմանը:

5.   Նախագծի մշակման գործընթացում ներգրավված ինստիտուտները և անձինք.

Նախագիծը մշակել է «Երևանի կառուցապատման ներդրումային ծրագրերի իրականացման գրասենյակ» համայնքային ոչ առևտրային կազմակերպությունը:

6.   Նախագծի ընդունման առնչությամբ ընդունվելիք այլ իրավական ակտերի կամ դրանց ընդունման անհրաժեշտության բացակայության մասին.

Նախագծի ընդունման արդյունքում այլ իրավական ակտերի ընդունման անհրաժեշտությունը բացակայում է:

7.   Նախագծի ընդունման կապակցությամբ լրացուցիչ ֆինանսական միջոցների անհրաժեշտության, պետական և տեղական ինքնակառավարման մարմինների բյուջեների եկամուտներում և ծախսերում սպասվելիք փոփոխությունների մասին.

Նախագծի ընդունմամբ Հայաստանի Հանրապետության պետական և տեղական ինքնակառավարման մարմինների բյուջեների եկամուտներում և ծախսերում էական ավելացում և (կամ) նվազեցում չի առաջանում:

8.  Կապը ռազմավարական փաստաթղթերի հետ.

Նախագիծն ուղղակիորեն բխում է Երևանի ավագանու կողմից ընդունված՝ Երևանի զարգացման 2024-2028 թթ․ ծրագրից և Երևանի գլխավոր հատակագծից, որտեղ Իսակով-Արշակունյաց ճանապարհի կառուցումը սահմանվել է որպես առաջնահերթություն է։ Ավելին, այն կապված է ՀՀ կառավարության 2021-2026 թվականների Ծրագրի 3.2 կետի հետ, որտեղ որպես տնտեսության զարգացման և սոցիալական կյանքի բարելավման կարևոր նախադրյալ ընդգծված է ճանապարհային ցանցի զարգացումը և դրա միջոցով տնտեսական ներուժի և մարդկանց կենսական մակարդակի բարձրացումը։