«Հայաստանի Հանրապետության կառավարության 2016 թվականի դեկտեմբերի 22-ի N 1339-Ն որոշման մեջ փոփոխություն կատարելու մասին»

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2016 ԹՎԱԿԱՆԻ ԴԵԿՏԵՄԲԵՐԻ 22-Ի N 1339-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ

ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը.

Հայաստանի Հանրապետության կառավարության 2016 թվականի դեկտեմբերի 22-ի «Պարենային և ոչ պարենային արտադրանքի գրանցում իրականացնող իրավասու մարմիններ սահմանելու մասին» N 1339-Ն որոշմաբ (այսուհետ՝ Որոշում) սահմանված պահանջներին համապատասխան՝ ԵԱՏՄ տեխնիկական կանոնակարգերով արտադրանքի պետական գրանցում իրականացնում են ԵԱՏՄ սերտիֆիկացման մարմինների և փորձարկման լաբորատորիաների միասնական ռեեստրում ներառված ու նշանակված համապատասխանության գնահատման մարմինները (ՀԳՆՄ՝ սերտիֆիկացման մարմիններ ու փորձարկման լաբորատորիաներ), որոնք փաստաթղթերի փորձաքննության և արտադրանքի լաբորատոր բոլոր փորձարկումների դրական արդյունքների հիման վրա հայտատուին տրամադրում են արտադրանքի պետական գրանցման վկայական։

Ներկա պահին ՀԳՆՄ-ները պարենային և ոչ պարենային արտադրանքի պետական գրանցման մասին տեղեկատվությունը պետական գրանցման վկայականների միասնական ռեեստրում ներառելու նպատակով դիմում են՝ Սննդամթերքի անվտանգության տեսչական մարմնին՝ պարենային արտադրանքի գրանցման մասով, իսկ ոչ պարենային արտադրանքի գրանցման մասով՝ Շուկայի վերահսկողության տեսչական մարմնին։

Որոշմամբ սահմանված է, որ Տեսչական մարմինները  մեկօրյա ժամկետում անճշտություններ, սխալներ, վրիպակներ հայտնաբերելու դեպքում տեղեկացնում են ՀԳՆՄ-ին և առաջարկում   երկօրյա ժամկետում վերացնել դրանք: Արտադրանքի պետական գրանցման մասին տեղեկատվությունը ռեեստրում ներառվում է անճշտությունների, սխալների, վրիպակների վերացումից հետո՝ եռօրյա ժամկետում:

Սահմանված ժամկետում թերությունները չուղղելու դեպքում տեղեկատվությունը չի ներառվում ԵԱՏՄ  պետական գրանցման վկայականների միասնական ռեեստրում։

Որոշման կիրարկման ընթացքում առաջացած բացերը, պետական գրանցման վկայականների միասնական ռեեստրում գրանցված անհամապատասխան պետական գրանցման վկայականների առկայությունը բացառելու նպատակով մշակվել է «Հայաստանի Հանրապետության կառավարության 2016 թվականի դեկտեմբերի 22-ի N 1339-Ն որոշման մեջ փոփոխություն կատարելու մասին» Հայաստանի Հանրապետության կառավարության որոշման նախագիծը (այսուհետ՝ նախագիծ):

2. Առաջարկվող կարգավորումների բնույթը.

Նախագծով նախատեսվում է, որ ԵԱՏՄ տեխնիկական կանոնակարգերով արտադրանքի գրանցում կարող են իրականացնել ԵԱՏՄ սերտիֆիկացման մարմինների և փորձարկման լաբորատորիաների միասնական ռեեստրում ներառված հավատարմագրված սերտիֆիկացման մարմինները, որոնք համապատասխանության գնահատման ոլորտում ունեն առնվազն 2 (երկու) տարվա փորձ։

ԵԱՏՄ տեխնիկական կանոնակարգերով արտադրանքի գրանցում իրականացնելու իրավասություն ստանալու, ինչպես նաև արտադրանքի գրանցման մասին տեղեկատվությունը պետական գրանցման վկայականների միասնական ռեեստրում ներառելու նպատակով հավատարմագրված սերտիֆիկացման մարմինը դիմում է «Հավատարմագրման ազգային մարմին» պետական ոչ առևտրային կազմակերպություն (համապատասխանության գնահատման մյուս փաստաթղթերի՝ հայտարարագրերի և սերտիֆիկատների ռեեստրը վարում է հավատարմագրման ազգային մարմինը)։

Նման փոփոխության արդյունքում հավատարմագրման ազգային մարմինը  կրկնակի հսկողություն իրականացնելու իրավասություն կունենա պետական գրանցում իրականացնող հավատարմագրված սերտիֆիկացման մարմնի նկատմամբ։

Դիմումին կից ներկայացվելու են այն բոլոր փաստաթղթերը, որոնք հիմք են հանդիսացել վկայականի տրամադրման համար։

Հավատարմագրման ազգային մարմինը ներկայացված փաստաթղթերում ոչ միայն անճշտություններ, սխալներ, վրիպակներ, այլ նաև տեխնիկական կանոնակարգով սահմանված պահանջների անհամապատասխանություններ, ոչ հավաստի տվյալներ հայտնաբերելու դեպքում 10 աշխատանքային օրվա ընթացքում  գրավոր տեղեկացնում է ՀԳՆՄ-ին և առաջարկում երեք աշխատանքային օրվա ընթացքում վերացնել դրանք։

Արտադրանքի պետական գրանցման մասին տեղեկատվությունը ռեեստրում ներառվում է անհամապատասխանությունները վերացնելուց հետո՝ եռօրյա ժամկետում, իսկ խնդիրները չվերացնելու դեպքում չի ներառվում։

Նախագծով Հավատարմագրման ազգային մարմնին տրվում է նաև իրավասություն պետական գրանցման վկայականի գործողության կասեցման կամ դադարեցման մասին տեղեկատվությունը ներառել ռեեստրում, որոնց համար նախատեսված են հստակ դեպքեր։

Բացի այդ Նախագծով առաջարկվում է, որ համապատասխան տեսչական մարմինը (ՍԱՏՄ և ՇՎՏՄ) շուկայում տեխնիկական կանոնակարգի պահանջներին անհամապատասխան արտադրանք հայտնաբերելու դեպքում անմիջապես կասեցնի կամ դադարեցնի տվյալ արտադրանքի պետական գրանցման վկայականը։

3. Նախագծի մշակման գործընթացում ներգրավված ինստիտուտները և անձինք.

Նախագիծը մշակվել է Էկոնոմիկայի նախարարության աշխատակիցների կողմից:

4. Ակնկալվող արդյունքը.

Նախագծի ընդունմամբ կկարգավորվի պետական գրանցման վկայականի գրանցման գործընթացը: Նախագծով Հավատարմագրման ազգային մարմնին տրվում է նաև իրավասություն միասնական ռեեստրում  պետական գրանցման վկայականի գործողության կասեցման կամ դադարեցման մասին տեղեկատվությունը ներառելու պահանջը, ինչպես նաև նախատեսված են դրանց հստակ դեպքերը։

Բացի այդ Նախագծով առաջարկվում է, որ համապատասխան տեսչական մարմինը (ՍԱՏՄ կամ ՇՎՏՄ) շուկայում տեխնիկական կանոնակարգի պահանջներին անհամապատասխան և մարդու առողջության և անվտանգության պահպանության վրա ազդող արտադրանք հայտնաբերելու դեպքում անմիջապես կասեցնի կամ դադարեցնի տվյալ արտադրանքի պետական գրանցման վկայականը։

5․ Այլ տեղեկություններ․

Նախագծի ընդունման կապակցությամբ Հայաստանի Հանրապետության պետական բյուջեի եկամուտների էական նվազեցում կամ ծախսերի ավելացում չի առաջանում։

Նախագիծը դրվել է հանրային քննարկման։

6․ Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ․

Նախագիծը չի բխում Հայաստանի վերափոխման ռազմավարություն 2050, Կառավարության 2021-2026թթ. ծրագրից, ինչպես նաև ոլորտային և/կամ այլ ռազմավարություններից։