«ՀՀ ՎԱՅՈՑ ՁՈՐԻ ՄԱՐԶԻ ԿԱՐՄՐԱՇԵՆԻ ՄԻՋՆԱԿԱՐԳ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆԸ «ՀՀ ՎԱՅՈՑ ՁՈՐԻ ՄԱՐԶԻ ՀԵՐՀԵՐԻ ՄԻՋՆԱԿԱՐԳ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆԸ ՄԻԱՑՄԱՆ ՁԵՎՈՎ ՎԵՐԱԿԱԶՄԱԿԵՐՊԵԼՈՒ ՄԱՍԻՆ

ՀԻՄՆԱՎՈՐՈՒՄ

«ՀՀ ՎԱՅՈՑ ՁՈՐԻ ՄԱՐԶԻ ԿԱՐՄՐԱՇԵՆԻ ՄԻՋՆԱԿԱՐԳ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆԸ «ՀՀ ՎԱՅՈՑ ՁՈՐԻ ՄԱՐԶԻ ՀԵՐՀԵՐԻ ՄԻՋՆԱԿԱՐԳ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆԸ ՄԻԱՑՄԱՆ ՁԵՎՈՎ ՎԵՐԱԿԱԶՄԱԿԵՐՊԵԼՈՒ ՄԱՍԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Իրավականակտի ընդունման անհրաժեշտությունը. 

2024-2025 ուսումնական տարում սեպտեմբերի 1-ի դրությամբ «ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպությունում երկու աշակերտ հաշվառված լինելու հանգամանքով պայմանավորված պետական ոչ առևտրային կազմակերպության, ՀՀ Վայոց ձորի մարզպետի աշխատակազմի առջև ծառացած խնդիրների կարգավորման նպատակով նպատակահարմար է երկու հաստատությունների միավորումը և առաջարկվում է վերակազմակերպել՝ հիմնելով մեկ միջնակարգ դպրոց: Հիմք է ընդունվել նաև այն հանգամանքը, որ «ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպության տեղակայման վայրից ամենահարմարը «ՀՀ Վայոց ձորի մարզի Հերհերի միջնակարգ դպրոց» պետական ոչ առևտրային կազմակերպության տեղակայման վայրն է (հեռավորություը 7 կմ) և ուսումնական հաստատության շենքային պայմանները: 

2.Ընթացիկ իրավիճակը և խնդիրները. 

Հանրակրթական ծրագրեր իրականացնող ուսումնական հաստատությունների հզորության, սովորողների և լիցենզիայով սահմանված տեղերի քանակի համամասնության վերաբերյալ ուսումնասիրության արդյունքում պարզ է դարձել, որ « ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպությանը ՀՀ կրթության, գիտության, մշակույթի և սպորտի նախարարության կողմից լիզենզիայով հատկացվել է 190 տեղ, ներկայումս դպրոցում սովորում է 2 աշակերտ: Դպրոցի աշխատողների ընդհանուր թիվը 18-ն է: Դպրոցում սովորողների թվի նվազման միտումն արձանագրվել է տարիների ընթացքում (2017-2018 ուս.տարում դպրոցն ունեցել է 22, 2018-2019-ին՝ 18 և 2019-2020 ուստարում՝ 14 աշակերտ, 2020-2021 ուստարում՝ 7, 2021-2022-ին՝ 9, 2022-2023 ուստարում՝ 4, 2023-2024-ի սեպտեմբերին՝ 3, 2024-2025 ուստարում 2): Բացի այդ, քիմիա, կենսաբանություն, աշխարհագրություն, անգլերեն լեզու, պատմություն, ռազմագիտություն առարկաների դասավանդումն «ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպությունում իրականացվում է այլ բնակավայրերից ուսուցիչների ներգրավմամբ, որի համար 2024 թվականի տարեկան տրնսպորտային ծախսը կազմել է 367.600 ՀՀ դրամ, իսկ 2023 թվականին այն կազմել է 369.600 ՀՀ դրամ:

«ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպության 2024 թվականի հունվարի 1-ից մինչև դեկտեմբերի 31-ը փաստացի ծախսը կազմել  է՝ 28.477.700 ՀՀ դրամ: 2025 թվականի օգոստոսի մեկի  դրությամբ  միացման արդյունքում կտնտեսվի մոտավորապես 20 մլն ՀՀ դրամի չափով գումար, իսկ հետագա տարինների համար տնտեսումը կկազմի ավելի քան 25 մլն ՀՀ դրամ։

«ՀՀ Վայոց ձորի մարզի Հերհերի միջնակարգ դպրոց» պետական ոչ առևտրային կազմակերպության հզորությունը նախատեսված է 320 սովորողի համար, սովորում է 62 աշակերտ (տարրական դպրոց սահմանային 100 տեղ, սովորում է՝ 27-ը, միջին դպրոց՝ 125 տեղ, սովորում է՝ 22-ը, ավագ դպրոց՝ 75 տեղ, սովորում է՝ 10–ը, նախակրթարանում սովորում է 3 երեխա): Դպրոցի աշխատողների ընդհանուր թիվը 32 է:

«ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպության սովորողների քանակի նվազեցումը եղել է կարևորագույն հիմնախնդիրը, որը հիմք է հանդիսացել քննարկելու երկու ուսումնական հաստատությունների միավորման հարցը:

«ՀՀ Վայոց ձորի մարզի Հերհերի միջնակարգ դպրոց» պետական ոչ առևտրային կազմակերպությունում դիտարկումների արդյունքում մարզպետի աշխատակազմը դրական արձագանքի է արժանացրել հաստատության աշխատանքային գործունեությունը, մասնավորապես փաստաթղթաշրջանառությունը, անցկացրած միջոցառումները, դպրոցի առողջ բարոյահոգեբանական մթնոլորտը, ՀՀ պետական բյուջեի միջոցներով հիմնանորոգված դպրոցի խնամքով պահպանված շենքային և սանիտարահիգիենիկ պայմանները, անհրաժեշտ գույքը, կենտրոնացված ջեռուցման համակարգը, տեխնիկական միջոցներով ապահովվածությունն ու կահավորանքը: 

3.Կարգավորման նպատակը և բնույթը․ 

« ՀՀ Վայոց ձորի մարզի Կարմրաշենի միջնակարգ դպրոց»  և «ՀՀ Վայոց ձորի մարզի Հերհերի միջնակարգ դպրոց» պետական ոչ առևտրային կազմակերպությունների միավորման նպատակն է.

• ապահովել Վայք համայնքի Կարմրաշեն բնակավայրի բնակչության հնարավոր սովորողների հանրակրթության 3 աստիճանի կրթություն ստանալու հնարավորությունը,
• ուսումնադաստիարակչական աշխատանքներներն ու սովորողների կրթության ապահովման գործընթացն իրականացնել առավել բարենպաստ պայմաններում: 

4. Ակնկալվող արդյունքը 

Ակնկալվում է, որ « ՀՀ Վայոց ձորի մարզի Կարմրաշենի միջնակարգ դպրոց» պետական ոչ առևտրային կազմակերպությունում հնարավոր սովորողները կունենան  համապատասխան տարածք և աշակերտների ուսուցումը կկազմակերպվի ավելի արդյունավետ՝ էապես  բարելավելով կրթության որակը: 

5.Նախագծի մշակման գործընթացում ներգրավված ինստիտուտները և անձինք․ 

Նախագիծը մշակվել է ՀՀ Վայոց ձորի մարզպետի աշխատակազմի կողմից։

6. «Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ». 

Նախագծի կապը ռազմավարական փաստաթղթերի հետ բացակայում է: 

7․ Լրացուցիչ ֆինանսական միջոցների անհրաժեշտության և պետական բյուջեի եկամուտներում և ծախսերում սպասվելիք փոփոխությունների մասին. 

Նախագծի ընդունման կապակցությամբ պետական բյուջեի ծախսերի տեսքով լրացուցիչ ֆինանսական միջոցների անհրաժեշտություն չի առաջանա: 

8․ Նախագծի ընդունման առնչությամբ այլ նորմատիվ իրավական ակտերի ընդունման անհրաժեշտությունը. 

Նախագծի ընդունման կապակցությամբ այլ իրավական ակտերում փոփոխություններ կատարելու անհրաժեշտություն չի առաջանում: