ԳԵՈԴԵԶԻԱԿԱՆ ԵՎ ՄԱՐԿՇԵՅԴԵՐԱԿԱՆ, ԻՆՉՊԵՍ ՆԱԵՎ ՔԱՐՏԵԶԱԳՐԱԿԱՆ, ՀՈՂԱՇԻՆԱՐԱՐԱԿԱՆ, ՉԱՓԱԳՐԱԿԱՆ ԵՎ ՀԱՇՎԱՌՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՄԱՆԸ ՆԵՐԿԱՅԱՑՎՈՂ ՊԱՐՏԱԴԻՐ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

2025 թվականի_________N  __–Ն

ԳԵՈԴԵԶԻԱԿԱՆ ԵՎ ՄԱՐԿՇԵՅԴԵՐԱԿԱՆ, ԻՆՉՊԵՍ ՆԱԵՎ ՔԱՐՏԵԶԱԳՐԱԿԱՆ, ՀՈՂԱՇԻՆԱՐԱՐԱԿԱՆ, ՉԱՓԱԳՐԱԿԱՆ ԵՎ ՀԱՇՎԱՌՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՄԱՆԸ ՆԵՐԿԱՅԱՑՎՈՂ ՊԱՐՏԱԴԻՐ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ

   Ղեկավարվելով «Գեոդեզիական և քարտեզագրական գործունեության մասին» օրենքի 16․1-ին հոդվածի 2-րդ մասի և և «Նորմատիվ իրավական ակտերի մասին» օրենքի 37-րդ հոդվածի պահանջներով՝ Հայաստանի Հանրապետության կառավարությունը որոշում է․

1. Սահմանել Գեոդեզիական և մարկշեյդերական, ինչպես նաև քարտեզագրական, հողաշինարարական, չափագրական և հաշվառման աշխատանքների իրականացմանը ներկայացվող պարտադիր պահանջները՝ համաձայն հավելվածի:
2. Ուժը կորցրած ճանաչել Հայաստանի Հանրապետության կառավարության 2011 թվականի սեպտեմբերի 29-ի «Հայաստանի Հանրապետության տարածքում քարտեզագրության, գեոդեզիայի, չափագրման (հաշվառման) և հողաշինարարության աշխատանքների իրականացմանը ներկայացվող պարտադիր պահանջները սահմանելու մասին» N 1441-Ն որոշումը։
3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

                        Հայաստանի Հանրապետության                                                            Ն. Փաշինյան

                                      վարչապետ

                                         Երևան

Հավելված

ՀՀ կառավարության

2025 թվականի _______-ի

N     -Ն որոշման

ԳԵՈԴԵԶԻԱԿԱՆ ԵՎ ՄԱՐԿՇԵՅԴԵՐԱԿԱՆ, ԻՆՉՊԵՍ ՆԱԵՎ ՔԱՐՏԵԶԱԳՐԱԿԱՆ, ՀՈՂԱՇԻՆԱՐԱՐԱԿԱՆ, ՉԱՓԱԳՐԱԿԱՆ ԵՎ ՀԱՇՎԱՌՄԱՆ ԱՇԽԱՏԱՆՔՆԵՐԻ ԻՐԱԿԱՆԱՑՄԱՆԸ ՆԵՐԿԱՅԱՑՎՈՂ ՊԱՐՏԱԴԻՐ ՊԱՀԱՆՋՆԵՐԸ

1. Գեոդեզիական և մարկշեյդերական, ինչպես նաև քարտեզագրական, հողաշինարարական, չափագրական և հաշվառման գործունեության մեջ ներառվում են հետևյալ աշխատանքները՝

        1) գեոդեզիական աշխատանքներ՝ պետական և տեղական նշանակության գեոդեզիական աշխատանքների իրականացում, երկրի մակերևույթի և տարածական օբյեկտների կոորդինատների ու բարձունքային նիշերի որոշում, շենքերի և շինությունների, ենթակառուցվածքների հետազոտության, նախագծման, կառուցման և շահագործման ժամանակ գեոդեզիական աշխատանքների ապահովվում, հանութագրում և նշահարում․

         2) մարկշեյդերական աշխատանքներ՝ լեռնահանքային արդյունաբերության ոլորտում գեոդեզիական և քարտեզագրական աշխատանքների իրականացում․

         3) քարտեզագրական աշխատանքներ՝ պետական և տեղական նշանակության քարտեզագրական աշխատանքների իրականացում, տեղագրական, կադաստրային և թեմատիկ քարտեզների ու հատակագծերի, ինչպես նաև աշխարհագրական տեղեկատվական համակարգերի ստեղծում․

         4) հողաշինարարական աշխատանքներ՝ հողահատկացման համար սահմանված կարգով փաստաթղթերի փաթեթի կազմում, հողաշինարարական նախագծերի կազմում, այդ թվում` համայնքների հողերի գոտևորման և օգտագործման սխեմաների մշակում, ներհամայնքային և առանձին հողամասերի հողաշինարարական նախագծերի կազմում (տարածքի կազմակերպման և ցանքաշրջանառության նախագծերի կազմում), հողերի օգտագործման և պահպանման նախագծերի կազմում, նոր հողերի իրացման, բարելավման նախագծերի կազմում, խախտված հողերի ռեկուլտիվացիայի նախագծերի կազմում, նշված նախագծերի տեղափոխում բնության մեջ, հողամասերի և վարչատարածքային միավորների սահմանների սահմանակետերի ամրացման և նկարագրման, վերականգման աշխատանքներ․

         5) չափագրական աշխատանքներ՝ հողամասերի, շենքերի, շինությունների, ենթակառուցվածքների չափագրման աշխատանքների իրականացում․

         6) հաշվառման աշխատանքներ՝ հողամասերի, շենքերի, շինությունների, ենթակառուցվածքների վերաբերյալ քանակական և որակական տվյալների հավաքագրում:

2. Սույն հավելվածի 1-ին կետով սահմանված գործունեության տեսակներով կարող են զբաղվել «Գեոդեզիական և քարտեզագրական գործունեության մասին» օրենքի (այսուհետ՝ Օրենք) 16․1-ին հոդվածի 1-ին մասով սահմանված անձինք:

      3․ Օրենքի 16․1-ին հոդվածի 5-րդ մասի 1-ին կետով սահմանված գեոդեզիական և մարկշեյդերական գործունեության որակավորման վկայական ստացած անձինք կարող են իրականացնել սույն հավելվածի 1-ին կետով սահմանված բոլոր աշխատանքները։

      4․ Օրենքի 16․1-ին հոդվածի 5-րդ մասի 2-րդ կետով սահմանված քարտեզագրական, հողաշինարարական, չափագրական և հաշվառման գործունեության որակավորման վկայական ստացած անձինք կարող են իրականացնել սույն հավելվածի 1-ին կետի 3-6-րդ ենթակետերով սահմանված աշխատանքները, ինչպես նաև իրավունքների պետական գրանցման համար անհրաժեշտ՝ հողամասերի հատակագծերի կազմման նպատակով գեոդեզիական աշխատանքներ։

      5․ Սույն հավելվածի դրույթները չեն տարածվում Հայաստանի Հանրապետության պաշտպանության նախարարության կողմից իրականացվող գեոդեզիական և մարկշեյդերական, ինչպես նաև քարտեզագրական, հողաշինարարական, չափագրական և հաշվառման աշխատանքների վրա:

6. Գեոդեզիական և մարկշեյդերական, ինչպես նաև քարտեզագրական, հողաշինարարական, չափագրական և հաշվառման գործունեություն իրականացնող անձինք իրավունք ունեն պատվիրատուից պահանջելու կատարվող աշխատանքներին վերաբերող անհրաժեշտ նյութերը, գործունեությունն իրականացնելու նպատակով՝ Հայաստանի Հանրապետության օրենսդրությամբ սահմանված կարգով Կադաստրի կոմիտեի (այսուհետ՝ Կոմիտե) համակարգից ստանալու անհրաժեշտ տեղեկատվություն:
7. Գեոդեզիական և մարկշեյդերական, ինչպես նաև քարտեզագրական, հողաշինարարական, չափագրական և հաշվառման գործունեություն իրականացնելու իրավունք ունեցող անձինք պարտավոր են՝

        1) իրենց գործունեության ընթացքում ղեկավարվել Հայաստանի Հանրապետության քաղաքացիական օրենսգրքով, Հայաստանի Հանրապետության հողային օրենսգրքով, Հայաստանի Հանրապետության ընդերքի մասին օրենսգրքով, «Գույքի նկատմամբ իրավունքների պետական գրանցման մասին», «Գեոդեզիաական և քարտեզագրական գործունեության մասին», «Տարածական տվյալների մասին», «Քաղաքաշինության մասին» և «Աշխարհագրական անվանումների մասին» օրենքներով․

        2) աշխատանքներն իրականացնել սույն պարտադիր պահանջներին և Հայաստանի Հանրապետության այլ իրավական ակտերին համապատասխան.

        3) աշխատանքներն իրականացնել բարձր ճշտություն ապահովող գործիքներով (էլեկտրոնային տախեոմետր, արբանյակային դիրքորոշման կայան, լազերային սկաներ, հեռաչափ և այլն) և սարքածրագրային միջոցներով․

        4) պատվիրված յուրաքանչյուր միավոր անշարժ գույքի նկատմամբ (բացառությամբ բազմաբնակարան բնակելի շենքերի ծավալում տեղակայված անշարժ գույքերի միավորների) իրականացվող աշխատանքների համար կոմիտեի համակարգից ձեռք բերել անհրաժեշտ ելակետային տվյալներ գեոդեզիական ցանցի կետերի մասին կամ տվյալ համայնքի կադաստրային քարտեզից հատված.

        5) պատվիրատուի պահանջի դեպքում կատարված աշխատանքների արդյունքները և ելակետային նյութերը պատվիրատուին տրամադրել թղթային և թվային (էլեկտրոնային) տարբերակներով․

        6) պատվիրատուի պահանջի դեպքում ներկայացնել որակավորման վկայականի բնօրինակը:

                         Հայաստանի Հանրապետության                                                            Ա. Հարությունյան

                          վարչապետի աշխատակազմի

                                            ղեկավար