«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2020 ԹՎԱԿԱՆԻ ՀՈՒԼԻՍԻ 16-Ի N 1218-Լ ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ» ՀՀ ԿԱՌԱՎԱՐՈՒԹՅԱՆ ՈՐՈՇՈՒՄ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2020 ԹՎԱԿԱՆԻ ՀՈՒԼԻՍԻ 16-Ի N 1218-Լ ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ»  ՈՐՈՇՄԱՆ  ՆԱԽԱԳԾԻ

1.Ընթացիկ իրավիճակը, իրավական ակտի ընդունման անհրաժեշտությունը

Հայաստանի Հանրապետության կառավարության 2020 թվականի հուլիսի 16-ի ««Ինժեներական քաղաք» ներդրումային ծրագրին հավանություն տալու, ծրագրի շրջանակում իրականացման տարածք սահմանելու, հողակտորների նվիրաբերության, ծրագրի իրականացման գլխավոր օպերատոր ճանաչելու, ինժեներական կենտրոնի կառուցման, մասնակցության չափորոշիչներ սահմանելու, հավաստագրման հանձնաժողով ստեղծելու, հողի նվիրաբերության և գրավով պարտավորությունների ապահովման պայմանագրի ձևը հաստատելու մասին» N 1218-Լ որոշման (այսուհետ՝ Որոշում) իրականացման ընթացքում, որոշման կարգավորումներում ի հայտ են եկել իրավական բնույթի խնդիրներ, որոնք խոչընդոտում են Որոշմամբ նախատեսված գործընթացների արդյունավետ իրականացմանը.

Այսպես, Որոշման 12-րդ կետի, հավելված N 2-ի 2-րդ կետերի, հավելված N3-ի 22-րդ, 28-րդ կետերի, հավելված N4-ի 5․3․-րդ կետի կարգավորումներում լրացվել են ձևակերպումներ, որոնք հնարավորություն են տալիս հստակեցնել և վերացնել իրավական անորոշությունը հետևյալ իրավիճակներում.

1. Ռեզիդենտին տրամադրված հողակտորը, նույն Որոշմամբ սահմանված չափանիշներին բավարարող և ռեզիդենտի կարգավիճակ ստացած մեկ այլ կազմակերպության օտարելու դեպք,
2. Օտարման դեպքում նոր ռեզիդենտի կողմից Որոշման կատարման պահանջները (որոշակի ժամկետներում շինարարության իրականացման, մասնավորապես հողակտորի նպատակային օգտագործման, ընդհանուր ենթակառուցվածքների պահպանմանը մասնակցելու պարտավորության և այլն) ստանձնելու դեպք,
3. Որոշման պահանաջները կատարելու հնարավորությունից զրկված (օրինակ ֆինանսական դժվարություններ ունեցող) ռեզիդենտների համաձայնությամբ նվիրաբերության դադարեցման դեպք։
4. Առաջարկվող կարգավորման բնույթը.

Ներկայացված նախագծում վերոնշյալ կարգավորումներում համապատասխան փոփոխություններ, լրացումներ կատարելու միջոցով առաջարկվում է կարգավորել ներկայացված խնդիրները։

Մասնավորապես, Որոշման 12-րդ կետում առաջարկվող լրացման նպատակն է ներդաշնակեցնել փոփոխվող կետը Որոշման այլ կարգավորումների հետ, քանի որ Որոշմամբ առկա կարգավորումների (առավել ևս այս նախագծի ընդունման դեպքում) գործարկումը ամեն դեպքում ենթադրում է, որ Նախարարությունը պետք է հնարավորություն ունենա ստորագրել հիմնական Նվիրաբերության պայմանագրից բացի այլ պայմանագրեր կամ համաձայնագրեր։

Որոշման հավելված N 2-ի 2-րդ կետում առաջարկվող փոփոխության նպատակն է հստակեցնել կարգավորման կիրառումը այն իրավիճակներում երբ կիրառվելու է ռեզիդենտին տրամադրված հողակտորը, նույն Որոշմամբ սահմանված չափանիշներին բավարարող և ռեզիդենտի կարգավիճակ ստացած մեկ այլ կազմակերպության օտարելու ընթացակարգը։

Որոշման հավելված N3-ի 22-րդ կետում առաջարկվում է լրացնել «ինչպես նաև սույն որոշման հիման վրա այլ ռեզիդենտից հողակտորի և դրա սահմաններում առկա շինության ձեռքբերման (նվիրաբերության պայմանագրով նախատեսված նվիրառուի պարտավորությունների փոխանցմամբ և գրավի պարտավորության պահպանմամբ)» ձևակերպումը, հակառակ դեպքում առկա ձևակերպումը կարելի է մեկնաբանել, այնպես որ ռեզեդենտի կարգավիճակի տրամադրմանը պետք է պարտադիր կարգով հաջորդի հողի նվիրաբերությունը, քանի որ որպես միակ բացառությունը ներկայումս սահմանվում է վարձակալությամբ տարածքի վարձումը։ Առաջարկվող փոփոխությամբ փաստորեն բացառությունը լրացվում է նաև օտարման ընթացակարգը կիրառելու հնարավորությամբ, ինչը ի սկզբանե եղել է Որոշման կիրառման կարևոր տարր։

Որոշման հավելված N3-ի 28-րդ կետում առաջարկվող փոփոխության նպատակն է հստակեցնել արտադատական եղանակով նվիրաբերված հողակտորը վերադարձնելու հնարավորությունը։ Նույն տրամաբանությամ առաջարկվում  է փոփոխել է նաև հավելված N4-ի 5․3․-րդ կետը։

3. Ակնկալվող արդյունքը

Առաջարկվող փոփոխություններով  կհստակեցվեն Որոշման մի շարք դրույթներ, կկարգավորվի իրավական բնույթի մի շարք խնդիրներ, որոնք ի հայտ են եկել իրավակիրառ պրակտիկայում, որոնք խոչընդոտ են հանդիսանում Որոշմամբ նախատեսված գործընթացների արդյունավետ իրականացմանը.

4․         Նախագծի մշակման գործընթացում ներգրավված ինստիտուտները և անձինք

Նախագիծը մշակվել  է Հայաստանի Հանրապետության բարձր տեխնոլոգիական արդյունաբերության նախարարության կողմից:

5․ Պետական կամ տեղական ինքնակառավարման մարմնի բյուջեում եկամուտների և ծախսերի էական ավելացման կամ նվազեցման վերաբերյալ

Նախագծի ընդունման կապակցությամբ պետական կամ տեղական ինքնակառավարման մարմինների բյուջեներում եկամուտների և ծախսերի էական ավելացում կամ նվազեցում չի նախատեսվում:

6. Կապը ռազմավարական փաստաթղթերի հետ.

Ներկայացված նախագիծը բխում է  ՀՀ կառավարության  2021 թվականի օգոստոսի 18-ի N 1363-Ա որոշմամբ հաստատված ՀՀ կառավարության 2021-2026թթ ծրագրի «2.3 Բարձր տեխնոլոգիաներ» մասի դրույթներից: