ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՅՈՒՆԻՔԻ ՄԱՐԶԻ ԿԱՊԱՆ ՔԱՂԱՔՈՒՄ ՏՆԱՅԻՆ ԿԵՆԴԱՆԻՆԵՐ ՊԱՀԵԼՈՒ ԿԱՐԳ ՍԱՀՄԱՆԵԼՈՒ ՄԱՍԻՆ

«Կապան քաղաքում տնային կենդանիներ պահելու կարգ սահմանելու մասին» Կապան համայնքի ավագանու որոշման նախագծի ընդունումը պայմանավորված է «Տեղական տուրքերի և վճարների մասին» Հայաստանի Հանրապետության օրենքի 9-րդ հոդվածի 1-ին մասի 13-րդ կետի և նույն օրենքի 12-րդ հոդվածի 1-ին մասի 13-րդ կետի պահանջներով, համաձայն որի, այդ մասով տեղական տուրքի դրույքաչափերը և թույլտվությունները սահմանվում և տրամադրվում են ավագանու կողմից նախապես սահմանված կարգի համաձայն:
Սույն որոշման նախագծի ընդունման անհրաժեշտությունը պայմանավորված է նաև հետևյալով.
Վարչական իրավախախտումների վերաբերյալ Հայաստանի Հանրապետության օրենսգրքի 113-րդ հոդվածը քաղաքացիների և իրավաբանական անձանց համար նախատեսում է վարչական պատասխանատվություն՝ քաղաքային համայնքների տարածքում ընտանի կենդանիներ պահելու կանոնները խախտելու, ինչպես նաև նույն խախտումների համար, որոնց հետևանքով վնաս է պատճառվել քաղաքացիների առողջությանը կամ գույքին: Նույն օրենսգրքի 114-րդ հոդվածով վարչական պատասխանատվություն է նախատեսվում արգելված տեղերում անասուններ պահելու համար:
Իրավակիրառական պրակտիկան ցույց է տալիս, որ Կապան քաղաքում՝ համայնքի ղեկավարի կողմից երբևիցե չի իրականացվել ֆիզիկական և իրավաբանական անձանց տիրապետման ներքո գտնվող տնային կենդանիների հաշվառում, չեն սահմանվել դրանց պահելու համապատասխան կանոնները, զբոսանքի, ինչպես նաև կենդանիների դիերի թաղման և թափոնման իրականացման հատուկ առանձնացված վայրերը և այլ:
Արդյունքում՝ վերը նշված գործող իրավական ակտերի դրույթները չեն իրացվել համայնքային մակարդակում՝ կանոնները սահմանող ենթաօրենսդրական ակտի բացակայությամբ պայմանավորված:
Ֆիզիկական և իրավաբանական անձանց տիրապետման ներքո գտնվող տնային կենդանիների, մասնավորոպես՝ մարտական, պարեկային, ծառայողական և այլ ցեղատեսակների շների զբոսանքն առանց դնչկալի և կապի կարող է իրական վտանգ ներկայացնել Կապան քաղաքի բնակչության համար: Շների կողմից եղել են հարձակման և (կամ) ագրեսիվ պահվածքի դեպքեր, որոնց հետևանքով մարդկանց և կենդանիներին մարմնական վնասվածքներ և (կամ) հոգեբանական տրավմա է հասցրել:
Սույն կանոնների ընդունմամբ ակնկալվում է կարգավորել վերը նշված խնդիրները, այդ թվում՝ մարդկանց և կենդանիների առողջությանը սպառնացող (առավելապես՝ շների կողմից) վտանգը հասցնել նվազագույնի, ինչպես նաև որոշման նախագծի ընդունումը կարող է ապահովել Կապան համայնքի բյուջեի մուտքերի որոշակի աճ: Նախագծի ընդունման արդյունքում, տեղական մակարդակում կիրացվեն օրենսդրությամբ համայնքի ավագանու և համայնքի ղեկավարի համար սահմանված լիազորությունները, միաժամանակ կկարգավորվեն այդ լիազորությունների իրականացումից բխող իրավահարաբերությունները: