«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ԴԵԿՏԵՄԲԵՐԻ 29-Ի N 2329-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԻԾ

ՀԻՄՆԱՎՈՐՈՒՄ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ԴԵԿՏԵՄԲԵՐԻ 29-Ի N 2329-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1․ Ընթացիկ իրավիճակը և իրավական ակտի ընդունման անհրաժեշտությունը․

ՀՀ կառավարության 2005 թվականի դեկտեմբերի 29-ի N 2329-Ն որոշմամբ (այսուհետ՝ Որոշում) հաստատված հավելվածով սահմանվում է այն տրանսպորտային միջոցների ցանկը, որոնք ենթակա են կահավորման կապույտ առկայծող փարոսիկներով կամ կապույտ կամ կապույտ և կարմիր առկայծող փարոսիկներով։

Այդ ցանկից դուրս է մնացել ՀՀ հակակոռուպցիոն կոմիտեի, Պետական եկամուտների կոմիտեի տրանսպորտային միջոցները։

ՀՀ քրեկան դատավարության օրենսգրքի, «Հակակոռուպցիոն կոմիտեի մասին» և «Օպերատիվ-հետախուզական գործունեության մասին» օրենքների կարգավորումներով ՀՀ հակակոռուպցիոն կոմիտեն օժտվել է քրեադատավարական և օպերատիվ գործունեություն իրակացելու լիազորություններով։

Միաժամանակ Որոշման հավելվածի 10-րդ պարբերությամբ փարոսիկով կահավորելու իրավասություն է տրվել նաև ՀՀ բնապահպանության և ընդերքի տեսչական մարմնի տրանսպորտային միջոցներին, որոնք սակայն չեն հանդիսանում օպերատիվ բնույթի գործառույթ իրականացնող տրանսպորտային միջոցներ։

Նախագծի ընդունումը պայմանավորված է իրավական բացը լրացնելու, իրավական անորոշությունը վերացնելու և փոփոխված անվանումներով որոշ պետական մարմինների անվանումները հստակեցնելու անհրաժեշտությամբ։

2․ Առաջարկվող կարգավորման բնույթը․

Առաջարկվում է Որոշմամբ հաստատված հավելվածով նախատեսել ՀՀ հակակոռուպցիոն կոմիտեի տրանսպորտային միջոցների կապույտ առկայծող փարոսիկներով կահավորելու իրավասություն, քանի որ «Անվավոր տրանսպորտային միջոցների անվտանգության մասին» (ՄՄ ՏԿ 018/2011) կանոնակարգի (այսուհետ՝ Կանոնակարգ) 6-րդ հավելվածի 2.4.1-ին կետի (387-րդ էջ) համաձայն՝ շտապ օգնության, հրդեհային, զինվորական, փրկարար ծառայությունների և իրավակարգի ու անվտանգության ապահովման մարմինների տրանսպորտային միջոցները համարվում են օպերատիծ ծառայությունների տրանսպորտային միջոցներ, իսկ Կանոնակարգի 2.4.3.2.1-ին կետի (390-րդ էջ) համաձայն՝ բոլոր տեսակի օպերատիվ ծառայությունների տրանսպորտային միջոցների առկայծող փարոսիկները պետք է լինեն կապույտ գույնի։

3․ Կապը ռազմավարական փաստաթղթերի հետ.

Նախագիծը չի բխում ռազմավարական փաստաթղթերից:

4․ Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները․

Նախագծերի ընդունումը լրացուցիչ ֆինանսական միջոցների հատկացման, ինչպես նաև պետական բյուջեի եկամուտներում և ծախսերում փոփոխություններ կատարելու անհրաժեշտություն չի առաջացնելու:

5․ Նախագծի մշակման գործընթացում ներգրավված ինստիտուտները և անձինք

Նախագիծը մշակվել է ՀՀ ներքին գործերի նախարարության կողմից կողմից:

6․ Ակնկալվող արդյունքը․

Որոշման նախագծի ընդունմամբ կապահովվի ՀՀ հակակոռուպցիոն կոմիտեի գործառույթների և լիազորությունների առավել արդյունավետ իրականացումը, քանի որ տրանսպորտային միջոցների փարոսիկներով կահավորելու և դրանք կիրառելու դեպքում ՀՀ հակակոռուպցիոն կոմիտեի աշխատակիցները հնարավորություն կստանան օգտվել ՀՀ կառավարության 2007 թվականի հունիսի 28-ի թիվ 955‑Ն որոշմամբ հաստատված հավելվածով սահմանված երթևեկության առավելություններից՝ դրանով իսկ օպերատիվ, ինչպես նաև իրենց  և երթևեկության այլ մասնակիցների համար անվտանգ կերպով իրականացնելով ՀՀ օրենսդրությամբ իրենց վերապահված լիազորությունները և գործառույթները։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ