ԱՌԱՆՑ ՄԱՐԴՈՒ ԿԱՄ ՆՐԱ ՕՐԻՆԱԿԱՆ ՆԵՐԿԱՅԱՑՈՒՑՉԻ ՀԱՄԱՁԱՅՆՈՒԹՅԱՆ ՄԱՐԴՈՒ ԿՅԱՆՔԻՆ ՍՊԱՌՆԱՑՈՂ ՎՏԱՆԳԻ ԴԵՊՔՈՒՄ ԲԺՇԿԱԿԱՆ ՕԳՆՈՒԹՅՈՒՆ ԵՎ ՍՊԱՍԱՐԿՈՒՄ ԻՐԱԿԱՆԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

ՀԻՄՆԱՎՈՐՈՒՄ

«ԱՌԱՆՑ ՄԱՐԴՈՒ ԿԱՄ ՆՐԱ ՕՐԻՆԱԿԱՆ ՆԵՐԿԱՅԱՑՈՒՑՉԻ ՀԱՄԱՁԱՅՆՈՒԹՅԱՆ ՄԱՐԴՈՒ ԿՅԱՆՔԻՆ ՍՊԱՌՆԱՑՈՂ ՎՏԱՆԳԻ ԴԵՊՔՈՒՄ ԲԺՇԿԱԿԱՆ ՕԳՆՈՒԹՅՈՒՆ ԵՎ ՍՊԱՍԱՐԿՈՒՄ ԻՐԱԿԱՆԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ» ԿԱՌԱՎԱՐՈՒԹՅԱՆ ՈՐՈՇՄԱՆ ՆԱԽԱԳԾԻ

1. Ընթացիկ իրավիճակը և իրավական ակտի ընդունման անհրաժեշտությունը

«Առանց մարդու կամ նրա օրինական ներկայացուցչի համաձայնության մարդու կյանքին սպառնացող վտանգի դեպքում բժշկական օգնություն և սպասարկում իրականացնելու կարգը սահմանելու մասին» Կառավարության որոշման նախագծի ընդունումը բխում է «Բնակչության բժշկական օգնության և սպասարկման մասին» օրենքի 24-րդ հոդվածի 1-ին մասի 1-ին կետի պահանջներից։

Ներկայացվող նախագծով առաջարկվում է սահմանել առանց մարդու կամ նրա օրինական ներկայացուցչի համաձայնության մարդու կյանքին սպառնացող վտանգի դեպքում բժշկական օգնություն և սպասարկում իրականացնելու ընթացակարգը, ներառյալ կյանքին սպառնացող վտանգի դեպքերի ցանկը, բժշկական օգնության և սպասարկման վայրը, եղանակները, բժշկական օգնություն և սպասարկում տրամադրելուց հետո բուժաշխատողի կողմից պարտադիր կատարվելիք գործողությունները։

2. Առաջարկվող կարգավորումների բնույթը

«Բնակչության բժշկական օգնության և սպասարկման մասին» օրենքի 16-րդ հոդվածը, որպես ընդհանուր կանոն, սահմանում է բժշկական միջամտության համար մարդու գրավոր համաձայնության անհրաժեշտությունը։ Ընդհանուր կանոնից բացառություն սահմանում է նույն օրենքի 24-րդ հոդվածի 1-ին մասի 1-ին կետը, ըստ որի առանց մարդու կամ նրա օրինական ներկայացուցչի համաձայնության բժշկական օգնություն և սպասարկում կարող է տրամադրվել կյանքին սպառնացող վտանգի դեպքերում։ Այդուհանդերձ, գործող օրենքը չի սահմանում «կյանքին սպառնացող վտանգ» հասկացության իրավական բովանդակությունը և նման դեպքերի ցանկը։ Միևնույն ժամանակ, օրենքի 24-րդ հոդվածի 1-ին մասի 1-ին կետը ՀՀ կառավարությանը լիազորություն է վերապահել սահմանելու առանց մարդու կամ նրա օրինական ներկայացուցչի համաձայնության մարդու կյանքին սպառնացող վտանգի դեպքում բժշկական օգնություն և սպասարկում իրականացնելու կարգը։

Ըստ այդմ, ներկայացված նախագծով սահմանվում են կյանքին սպառնացող վտանգի դեպքում բժշկական օգնության և սպասարկման իրականացման կարգը, մասնավորապես` վերջինիս իրականացման վայրը, կարգը, բուժաշխատողների այդ մասով իրավունքների և պարտականությունների շրջանակը։

Նախագիծը մշակվելիս ուսումնասիրվել է Կանադայի, Լիտվայի, ՌԴ ոլորտային օրենսդրությունը։

3. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է Առողջապահության նախարարության և ՀՀ ԱՆ «Ակադեմիկոս Ս.Ավդալբեկյանի անվան առողջապահության ազգային ինստիտուտ» ՓԲԸ-ի աշխատակիցների կողմից:

4. Ակնկալվող արդյունքը

Նախագծի ընդունմամբ ակնկալվում է հստակ իրավակարգավորման ենթարկել առանց մարդու կամ նրա օրինական ներկայացուցչի համաձայնության մարդու կյանքին սպառնացող վտանգի դեպքում բժշկական օգնություն և սպասարկում իրականացնելու ընթացակարգը` սահմանելով նման դեպքերում տրամադրվող բժշկական օգնության և սպասարկման պայմանները, բուժաշխատողների իրավունքների և պարտականությունների շրջանակը։