«ՍԵՅՍՄԻԿ ՊԱՇՏՊԱՆՈՒԹՅԱՆ ՄԱՍԻՆ» ՀՀ ՕՐԵՆՔՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ԿԻՐԱՐԿՈՒՄՆ ԱՊԱՀՈՎՈՂ ՄԻՋՈՑԱՌՈՒՄՆԵՐԸ ՀԱՍՏԱՏԵԼՈՒ ՄԱՍԻՆ

1.

Անհրաժեշտությունը

        Իրավական ակտի նախագծի ընդունման անհրաժեշտությունը պայմանավորված է Հայաստանի Հանրապետության կառավարության 2004 թվականի ապրիլի 8-ի
N 541-Ն որոշման 1-ին կետի պահանջով՝ «Սեյսմիկ պաշտպանության մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության 2017 թվականի մարտի 1-ի ՀՕ-53-Ն օրենքի կիրարկումն ապահովող միջոցառումների իրականացմամբ:

2.

Ընթացիկ իրավիճակը և խնդիրները

Ոլորտը ներառում է ընթացիկ իրավիճակի ստորև բերված նկարագրությունը և խնդիրները, որոնք կարող են լուծվել նախագծի ընդունմամբ.

1) հստակ սահմանազատված չեն սեյսմիկ անվտանգության ապահովման հարցերով  պետական կառավարման հանրապետական, տարածքային և տեղական ինքնակառավարման մարմին­ների լիազորությունները, ինչպես նաև նրանց համագործակցության հարցերը,

2) լիովին ձևավորված չէ բարձր սեյսմիկ ռիսկի շրջաններում հողօգտագործման, նախագծման, ավարտված շենքերի ընդունման և հետագա շահագործման կարգը որոշող ենթաօրենսդրական դաշտը,

3) ՀՀ օրենսդրությամբ սահմանված չեն սեյսմակայունության գնահատման հստակ պայմանները և պահանջները, որոնց կատարումը կվերահսկվի սեյսմիկ անվտանգության ապահովման գործառույթներ իրականացնող մարմինների կողմից, սեյսմիկ ռիսկերի ու սեյսմախոցելիության գնահատականի հետ կապված հետազոտությունների անցկացման մեխանիզմները,

4) քաղաքաշինական փաստաթղթերի ցանկում լիարժեքորեն չեն արտացոլվում և հաշվի չեն առնվում տարածքների սեյսմիկ ռիսկի գործոնները,

5) թերի է նախկինում կառուցապատված տարածքների օգտագործման իրավական կարգավորման հարցը` սեյսմիկ անվտանգության տեսանկյունից,

6) կանոնակարգած չեն շենքերի և շինությունների կառուցման ու շահագործման հետ կապված սեյսմիկ անվտանգության պահանջների ապահովման հարցերը:

3.

Տվյալ բնագավառում իրականացվող քաղաքականություն

Սեյսմիկ պաշտպանության ոլորտում քաղաքականությունը ձևավորվում է՝ հիմք ընդունելով երկրի սեյսմիկ անվտանգության ապահովման խնդիրները և դրանց լուծման ուղիները:

Տվյալ բնագավառում քաղաքականությունն իրականացվում է.

     «Սեյսմիկ պաշտպանության մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության 2017 թվականի մարտի 1-ի ՀՕ-53-Ն օրենքով, ՀՀ կառավարության 1999 թվականի հունիսի 10-ի «Հայաստանի Հանրա­պե­տության տարածքում սեյսմիկ ռիսկի նվազեցման համալիր ծրագրի մասին» N 429 որոշման մեջ փոփոխություններ և լրացումներ կատարելու մասին» և ՀՀ կառավարության 1999 թվականի հունիսի 7-ի «Երևանի տարածքում սեյսմիկ ռիսկի նվազեցման համալիր ծրագրի մասին» N 392 որոշման մեջ փոփոխություններ և լրացումներ կատարելու մասին» որոշումներով, ՀՀ նախագահի 2010 թ. օգոստոսի 28-ի «Հայաստանի Հանրապետության սեյսմիկ անվտանգության համակարգի զարգացման հայեցակարգը հաստատելու մասին» ՆԿ-140-Ն կարգադրությամբ, այլ ՀՀ կառավարության որոշումներով և ՀՀ ԱԻ նախարարի հրամաններով:

4.

Կարգավորման նպատակը և բնույթը

    Նախատեսվող նախագիծը նպատակ ունի հստակեցնելու «Սեյսմիկ պաշտպանության մասին» Հայաստանի Հանրապետության օրենքի մի շարք հասկացություններ և դրույթներ. միջոցառումների իրականացմամբ լրացնել սեյսմիկ անվտանգության ապահովմանն առնչվող վերահսկման եղանակների և սկզբունքների կիրառումը, հստակեցնել և տարանջատել լիազորությունները` ամրագրելով սեյսմիկ անվտանգության ապահովման ոլորտում տեղա­կան ինքնակառավարման մարմինների լիազորությունները՝ որպես պարտա­դիր լիազորություններ, կատարելագործել բնագավառը կարգավորող իրավական դաշտը:

5.

Նախագծի մշակման գործընթացում ներգրավված ինստիտուտները

     Իրավական ակտի նախագիծը մշակվել է Հայաստանի Հանրապետության արտակարգ իրավիճակների նախարարությունում:

6.

Ակնկալվող արդյունքը

     Իրավական ակտի նախագծի ընդունումը հնարավորություն կտա ապահովել պաշտպանվածությունը հնարավոր ուժեղ երկրաշարժերից: