«Հայաստանի Հանրապետության 2018 թվականի պետական բյուջեի մասին» Հայաստանի Հանրապետության օրենքում վերաբաշխում և Հայաստանի Հանրապետության կառավարության 2017 թվականի դեկտեմբերի 28-ի N 1717-Ն որոշման մեջ փոփոխություններ կատարելու մասին» Հայաստանի Հանրապետության կառավարության որոշման նախագիծ

1.

Անհրաժեշտությունը

2014թ․ հունիսի 21-ին ՀՀ Ազգային Ժողովի կողմից ընդունված «Հանրային հատվածի կազմակերպությունների հաշվապահական հաշվառման մասին» ՀՀ օրենքի (ուժի մեջ է մտել 2015թ․ հունվարի 1-ից) 6-րդ հոդվածի համաձայն կազմակերպությունները պարտավոր են հաշվապահական հաշվառումը վարել հաշվապահական հաշվառման ոլորտը կարգավորող օրենսդրության պահանջներին համապատասխան հաշվապահական հաշվառում վարելու հնարավորություն ընձեռող համակարգչային ծրագրերով։ Օրենքի 24-րդ հոդվածի 5-րդ մասի համաձայն արձակվել է ՀՀ ֆինանսների նախարարի 23․07․2014թ․ «Հանրային հատվածի կազմակերպությունների կողմից հաշվապահական հաշվառման նոր համակարգին անցման ժամանակացույցը հաստատելու մասին» թիվ 463-Ն հրամանը, որով հաշվապահական հաշվառման նոր համակարգին անցման ժամանակաշրջանի սկիզբ ՀՀ գյուղատնտեսության նախարարության համար սահմանվել է 2017թ․հունվարի 1-ը։ ՀՀ ֆինանսների նախարարի 24․10․2014թ․ թիվ 725-Ն հրամանով հաստատվել է Հայաստանի Հանրապետության հանրային հատվածի հաշվապահական հաշվառման ստանդարտը, ՀՀ ֆինանսների նախարարի 09․04․2015թ․ 207-Ն հրամանով էլ հաստատվել է հանրային հատվածի կազմակերպությունների հաշվապահական հաշվառման հաշվային պլանը և դրա կիրառման հրահանգը։ Օրենքի 6-րդ հոդվածի համաձայն ՀՀ կառավարության 26․03․2015թ․թիվ 313-Ն որոշմամբ սահմանվել է հանրային հատվածի կազմակերպություններում հաշվապահական հաշվառում վարելու հնարավորություն ընձեռող համակարգչային ծրագրերի՝ ոլորտը կարգավորող օրենսդրության պահանջներին համապատասխանության կարգը և դրանց ավտոմատացված համակարգերի նկատմամբ պահանջները։

2.

Ընթացիկ իրավիճակը և խնդիրներ

ՀՀ գյուղատնտեսության նախարարությունում հաշվապահական հաշվառումը՝ սկսած 2012 թվականից, վարվում է համակարգչային 1C ծրագրով՝ 26․12․2002թ․ «Հաշվապահական հաշվառման մասին» ՀՀ օրենքի և ՀՀ կառավարության 02․05․1996թ․թիվ 147 որոշմամբ հաստատված կարգի պահանջներին համապատասխան՝ գործող հաշվային պլանով։ Հաշվապահական նոր համակարգին անցման աշխատանքներ նախարարությունում չեն իրականացվել՝ պայմանավորված մի շարք հանգամանքներով, այդ թվում, եռամսյակային և տարեկան ֆինանսատնտեսական գործունեության մասին հաշվետվությունների ներկայացման ժամկետների և պահանջների վերաբերյալ ՀՀ ֆինանսների նախարարության կողմից ներկայացված գրություններով շարունակվել է պահանջվել ՀՀ ֆինանսների նախարարի 2015թ․ ապրիլի 1-ի թիվ 176-Ն և ՀՀ ֆինանսների և էկոնոմիկայի նախարարի 2007 թվականի մարտի 28-ի թիվ 324-Ն հրամաններով նախատեսված ձևաչափերով, մինչդեռ ՀՀ ֆինանսների նախարարի 2017 թվականի հունվարի 30-ի թիվ 27-Ն հրամանով արդեն իսկ հաստատվել է հանրային հատվածի կազմակերպությունների ֆինանսական հաշվետվությունների փաթեթը, որը ենթադրում է նոր համակարգով հաշվառման տեղեկատվության ներկայացում։ Ըստ էության, ֆինանսների նախարարությունն ակնկալել է հին և նոր համակարգերով միաժամանակյա հաշվառման իրականացում տեղերում։

ՀՀ ֆինանսների նախարարի 2018թ մարտի 13-ի գրությամբ պահանջվել է ներկայացնել նախարարության 2017 թվականի տարեկան ֆինանսական հաշվետվությունների փաթեթը՝ 2017թ հունվարի 30-ի թիվ 27-Ն հրամանով հաստատված ձևաչափով, որը չի ներկայացվել նախարարության կողմից՝ նման հաշվառման բացակայության պատճառով։ Նշվածից հետևում է, որ հաշվապահական հաշվառման նոր համակարգին անցումը հանդիսանում է հրատապ խնդիր։

Այսպիսով, անհրաժեշտ է  ձեռք բերել «ՀԾ Ձեռնարկություն» փաթեթը, և 2018 թվականի հունվարի 1-ի դրությամբ առկա մնացորդները մուտքագրել, կազմակերպել տնտեսական գործառնությունների հաշվապահական ձևակերպումների համապատասխան գրանցումները, կազմակերպել հաշվապահական հաշվառման վարումը և ֆինանսական հաշվետվությունների ձևավորումը հետագա ամիսների ընթացքում: Համակարգն ունի լայն հնարավորություններ հետագա կատարելագործման՝ պայմանավորված պատվիրատուի պահանջներով։ 5 միաժամանակյա օգտագործողների համար նույն խնդիրների իրականացման դեպքում համակարգի արժեքն է շուրջ 3000000 դրամ, ներդրման արժեքը պայմանագրային է, որը կազմում է շուրջ 4000000 դրամ, սպասարկման տարեկան արժեքն է շուրջ 2000000դրամ։ Համակարգն ամբոջությամբ ներդնելու համար կպահանջվի 9000000 դրամ:

 Հաշվառման անընդհատությունն ու համապատասխան բազայի պահպանման անվտանգությունն ապահովելու նպատակով 2018 թվականի մնացած ամբողջ ժամանակաշրջանում շարունակել հաշվապահական հաշվառման համատեղ, միաժամանակյա վարումը նաև «1C» ծրագրով, հաշվի առնելով նաև, որ կազմակերպության հետ կնքվել է 2018 թվականի համար սպասարկման ծառայությունների գնման պայմանագիր (տարեկան սպասարկման գումարը կազմում է 1500000 դրամ)։  

3.

Տվյալ բնագավառում իրականացվող քաղաքականությունը

«ՀԾ Ձեռնարկություն» փաթեթից օգտվում  են 7 մեծ պետական մարմիններ, այդ թվում ՀՀ ֆինանսների նախարարությունը, որտեղ առաջիկայում նախատեսվում է հանրային հատվածի կազմակերպությունների առանձին ֆինանսական հաշվետվությունների հիման վրա համախմբված ֆինանսական հաշվետվությունների պատրաստում, հետևաբար համակարգերի համակցման խնդիրը կարգավորվում է։

4.

Կարգավորման նպատակը և բնույթը

«ՀԾ Ձեռնարկություն» փաթեթը լիովին բավարարում է հանրային հատվածի կազմակերպությունների հաշվապահական հաշվառման կազմակերպման պայմաններին և ավտոմատացված համակարգերին ներկայացվող պահանջներին, հնարավորություն է տալիս նոր խնդիրների առաջադրման դեպքում լրացուցիչ կատարելագործումների և զարգացումների, ունի այլ համակարգերին համակցման լայն հնարավորություններ՝ գանձապետական համակարգերի՝ էլեկտրոնային վճարումներին, գնումների էլեկտրոնային համակարգին, բյուջեների պլանավորման գործընթացներին և այլն։

5.

Նախագծի մշակման գործընթացում ներգրավված ինստիտուտները և անձինք

Որոշման նախագիծը մշակվել է ՀՀ գյուղատնտեսության նախարարության կողմից:

6.

Ակնկալվող արդյունքը

Նախարարության հաշվապահական հաշվառման աշխատանքների ավտոմատացման առավել արդյունավետ կազմակերպում:

7.

Միջազգային պայմանագրերով ստանձնած պարտավորությունների հետ համապատասխանությունը

Որոշման նախագիծը  միջազգային պայմանագրերով ստանձնած պարտավորություններ չի նախատեսում: