«Երևան քաղաքի զարգացման 2025 թվականի ծրագրի իրականացման հաշվետվությունը հաստատելու մասին» Երևան քաղաքի ավագանու որոշման նախագիծ

ՏԵՂԵԿԱՆՔ-ՀԻՄՆԱՎՈՐՈՒՄ

«ԵՐԵՎԱՆԻ ԶԱՐԳԱՑՄԱՆ 2025 ԹՎԱԿԱՆԻ ԾՐԱԳՐԻ ԻՐԱԿԱՆԱՑՄԱՆ ՀԱՇՎԵՏՎՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ» ԵՐԵՎԱՆ ՔԱՂԱՔԻ ԱՎԱԳԱՆՈՒ ՈՐՈՇՄԱՆ ՆԱԽԱԳԾԻ ԸՆԴՈՒՆՄԱՆ ԱՆՀՐԱԺԵՇՏՈՒԹՅԱՆ ՎԵՐԱԲԵՐՅԱԼ

          Համաձայն «Երևան քաղաքում տեղական ինքնակառավարման մասին» օրենքի 83-րդ հոդվածի 3-րդ մասի՝ Երևանի զարգացման ծրագրի իրականացման վերաբերյալ քաղաքապետը հաշվետվություն է ներկայացնում Երևան քաղաքի ավագանուն:

            Նախագիծը նպատակ ունի համակողմանիորեն ներկայացնել 2025 թվականի ընթացքում իրականացված հիմնական ծրագրերն ու միջոցառումները, դրանց արդյունքները, ինչպես նաև հիմնավորել շարունակականության և 2026 թվականին նախատեսվող հետագա քայլերի անհրաժեշտությունը։

            2025 թվականի ընթացքում քաղաքաշինության և ենթակառուցվածքների ոլորտում իրականացվել են մեծածավալ աշխատանքներ։ Շարունակական է եղել նախադպրոցական, արտադպրոցական և մշակութային հաստատությունների վերանորոգման և հիմնանորոգման գործընթացը։ Զուգահեռաբար իրականացվել են մանկապարտեզների բակերի բարեկարգման աշխատանքներ, ինչը նպաստել է երեխաների համար անվտանգ և բարենպաստ միջավայրի ստեղծմանը։ Վարչական շրջաններում իրականացվել են բակերի, հանրային տարածքների բարեկարգման, ինչպես նաև սպորտային ենթակառուցվածքների կառուցման աշխատանքներ։ Այս միջոցառումները էականորեն նպաստել են համայնքային կյանքի ակտիվացմանը և բնակիչների սոցիալական ներառմանը։

            Քաղաքի էկոլոգիական կայունության բարձրացման նպատակով իրականացվել են լայնածավալ բնապահպանական միջոցառումներ։ Մասնավորապես, մեկնարկել է Նուբարաշենի խճուղու հարևանությամբ անտառպաշտպանիչ բուֆերային գոտու ստեղծման ծրագիրը, որը ներառում է ոռոգման ենթակառուցվածքների կառուցում և շուրջ 10 650 ծառի տնկում։ Քաղաքի տարբեր հատվածներում իրականացվել են կանաչապատման աշխատանքներ՝ տնկվել են հազարավոր ծառեր, թփեր և ծաղիկներ, հիմնվել են նոր ծաղկանոցներ և ուրբան անտառային գոտիներ։ Այս աշխատանքներն ուղղված են օդի որակի բարելավմանը, քաղաքային միկրոկլիմայի կայունացմանը և բնակչության առողջ կենսակերպի խթանմանը։

            Էական առաջընթաց է արձանագրվել կենցաղային թափոնների կառավարման ոլորտում։ Մշակվել և հաստատվել է խառը կենցաղային թափոնների վերամշակման գործարանի կառուցման և շահագործման ներդրողի ընտրության մրցութային գործընթացը, որի մրցույթը նախատեսված է ավարտել 2026 թվականին։

Միաժամանակ իրականացվել են կոյուղատար և հեղեղատար համակարգերի կառուցման և վերակառուցման աշխատանքներ, ձեռք են բերվել նոր աղբատար և կոմունալ մեքենաներ, ինչպես նաև տեղադրվել են ժամանակակից աղբամաններ տարբեր վարչական շրջաններում։ Իրականացված աշխատանքները նպաստել են սանիտարական վիճակի բարելավմանը և քաղաքային ծառայությունների արդյունավետության բարձրացմանը։

            Հաշվի առնելով բնակչության կարծիքը և առաջնահերթ խնդիրները՝ 2025 թվականին հատուկ ուշադրություն է դարձվել հասարակական տրանսպորտի զարգացմանը։ Մեկնարկել է նոր, ժամանակակից տրոլեյբուսների ձեռքբերման գործընթացը, որոնք նախատեսվում է շահագործման հանձնել 2026 թվականին։ Իրականացվել են կլիմայական փոփոխություններին հարմարվողականության ծրագրեր, այդ թվում՝ անձրևաջրերի հավաքման և օգտագործման բնապահպանական ծրագիրը, որը կկիրառվի հաջորդ տարի։

            Վերը ներկայացված միջոցառումները վկայում են, որ Երևանի զարգացման 2025 թվականի ծրագիրը իրականացվել է համակարգված և նպատակային կերպով՝ ապահովելով շոշափելի արդյունքներ մի շարք ռազմավարական ոլորտներում։ Միևնույն ժամանակ, իրականացված ծրագրերը ստեղծում են անհրաժեշտ հիմք դրանց շարունակականության և ընդլայնման համար 2026 թվականին։

            Հաշվի առնելով վերոգրյալը՝ Երևան քաղաքի ավագանու քննարկմանն է ներկայացվում «Երևանի զարգացման 2025 թվականի ծրագրի իրականացման հաշվետվությունը հաստատելու մասին» Երևան քաղաքի ավագանու որոշման նախագիծը։

ԵՐԵՎԱՆԻ ՔԱՂԱՔԱՊԵՏ՝                                      ՏԻԳՐԱՆ ԱՎԻՆՅԱՆ