«Հայաստանի Հանրապետության ներքին գործերի նախարարի 2024 թվականի փետրվարի 1-ի թիվ 1-Ն հրամանում փոփոխություններ կատարելու մասին» Հայաստանի Հանրապետության ներքին գործերի նախարարի հրամանի նախագիծ

ՀԻՄՆԱՎՈՐՈՒՄ

«Հայաստանի Հանրապետության ներքին գործերի նախարարի 2024 թվականի փետրվարի 1-ի թիվ 1-Ն հրամանում փոփոխություններ կատարելու մասին» ՀՀ ներքին գործերի նախարարի հրամանի նախագծի

    1․ Ընթացիկ իրավիճակը և իրավական ակտի ընդունման անհրաժեշտությունը

    «Ճանապարհային երթևեկության անվտանգության ապահովման մասին» օրենքի 9.1-ին հոդվածի 1-ին մասի «գ» կետի և 13.3-րդ հոդվածի 6‑րդ մասի համաձայն՝ ՀՀ ներքին գործերի նախարարին վերապահվել է սահմանել տրանսպորտային միջոցների հաշվառման առանձնահատուկ պահանջարկ ունեցող համարանիշների աճուրդային մեկնարկային գները` ըստ չափորոշիչների և տրանսպորտային միջոցների հաշվառման առանձնահատուկ պահանջարկ ունեցող համարանիշների էլեկտրոնային աճուրդի կանոնակարգը և աճուրդի հրապարակային ծանուցման և մասնակիցների գրանցման կարգը։ 2024 թվականի փետրվարի 1-ին ընդունվել է ՀՀ ներքին գործերի նախարարի «Տրանսպորտային միջոցների հաշվառման առանձնահատուկ պահանջարկ ունեցող համարանիշների էլեկտրոնային աճուրդի կանոնակարգը, աճուրդի հրապարակային ծանուցման և մասնակիցների գրանցման կարգը, ինչպես նաև հաշվառման առանձնահատուկ պահանջարկ ունեցող համարանիշների աճուրդային մեկնարկային գները` ըստ չափորոշիչների սահմանելու մասին» թիվ 1-Ն հրամանը (այսուհետ՝ Հրաման)։ Հրամանի 1-ին հավելվածի 9-րդ կետի համաձայն՝ աճուրդում ընդգրվում են լոտի ընտրության ժամանակ առավել շատ ընտրված՝ սույն հրամանի 3-րդ հավելվածով հաստատված գնային յուրաքանչյուր խմբից չորսական համարանիշները, իսկ նույն հավելվածի 10-րդ կետի համաձայն՝ Հրամանի 3-րդ հավելվածով հաստատված գնային յուրաքանչյուր խմբից չորսական համարանիշ օգտատերերի կողմից չընտրվելու դեպքում համակարգն ինքնաշխատ եղանակով լրացնում է աճուրդի լոտերը, իսկ նույն գնային խմբի տարբեր համարանիշների դեպքում քվեարկությամբ հավասար միավորներ ստացած համարանիշների դեպքում համակարգն աճուրդի լոտերն ընտրում է քվեարկությամբ հավասար միավորներ ստացած այդ համարանիշներից՝ ինքաշխատ եղանակով։ 

    Նշված կարգավորումը խոչընդոտում է աճուրդին այն անձանց մասնակցությունը, որոնց կողմից լոտի ընտրության արդյունքում համարանիշը չի հավաքում անհրաժեշտ քանակի քվեարկություն և չի ներառվում աճուրդի համարանիշների ցանկում, արդյունքում այդ համարանիշը ձեռք բերելու իրական ցանկություն ունեցող անձը զրկվում է այն ձեռք բերելու հնարավորությունից, առնվազն մինչև հաջորդ խաղարկություն։

    2․ Առաջարկվող կարգավորման բնույթը

    Նախագծով իրական հնարավորություն է ստեղծվում յուրաքանչյուրի համար, անկախ լոտի համար քվեարկության արդյունքներից, աճուրդային կարգով խաղարկելու և ձեռք բերելու իր նախընտրած համարանիշը։

    3․ Նախագծի մշակման գործընթացում ներգրավված ինստիտուտները, անձինք և նրանց դիրքորոշումը

    Նախագիծը մշակվել է ՀՀ ներքին գործերի նախարարության կողմից:

    4․ Ակնկալվող արդյունքը․

    Նախագծի ընդունման արդյունքում ակնկալվում է նախատեսել՝ հաշվառման առանձնահատուկ պահանջարկ ունեցող համարանիշերի էլեկտրոնային հարթակի միջոցով օտարելու հնարավորություն ցանկացած լոտի համար։ Բացի այդ տրանսպորտային միջոցների հաշվառման առանձնահատուկ պահանջարկ ունեցող համարանիշների էլեկտրոնային աճուրդի անցկացումը դարձնել առավել մատչելի, պահանջված և գրավիչ:

    5․ Լրացուցիչ ֆինանսական միջոցների անհրաժեշտությունը և պետական բյուջեի եկամուտներում և ծախսերում սպասվելիք փոփոխությունները

    Նախագծի ընդունմամբ պետական բյուջեում ակնկալվում է եկամուտների ավելացում։

    6․ Իրավական ակտի ընդունման կապակցությամբ այլ նորմատիվ իրավական ակտերի ընդունման անհրաժեշտություն

    Նախագծի ընդունման արդյունքում այլ իրավական ակտերում փոփոխություններ և լրացումներ կատարելու անհրաժեշտություն չի առաջանա:

    7․ Կապը ռազմավարական փաստաթղթերի հետ

    Նախագիծը չի բխում ռազմավարական փաստաթղթերից։

ՀՀ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ