«ԴԵՂԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀՀ ՕՐԵՆՔԻ ՆԱԽԱԳԻԾ

ՀԻՄՆԱՎՈՐՈՒՄ

«ԴԵՂԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

ՕՐԵՆՔԻ ՆԱԽԱԳԾԻ  ՎԵՐԱԲԵՐՅԱԼ

1. Ընթացիկ իրավիճակը և իրավական ակտի ընդունման անհրաժեշտությունը 

«Դեղերի մասին» օրենքի (այսուհետ` Օրենք) 21-րդ հոդվածի 16-րդ մասի համաձայն դեղերի մեծածախ իրացման լիցենզիա ունեցող անձը լիցենզիայի գործողության ժամանակահատվածում (այդ թվում` լիցենզիայի գործողության կասեցման ժամանակահատվածում) չի կարող իրականացնել օրենքով նախատեսված դեղատնային գործունեություն, բացառությամբ այն դեպքերի, երբ ստեղծվում է առանձին իրավաբանական անձ, որն ունի համապատասխան մանրածախ իրացման լիցենզիա:

2019 թվականի օգոստոսի 1-ին ընդունվել է Կառավարության «Հայաստանի Հանրապետության կառավարության 2018 թվականի փետրվարի 8-Ի N 105-Ն որոշման մեջ փոփոխություններ կատարելու մասին» N 956-Ն որոշումը, համաձայն որի դեղերի մեծածախ իրացման լիցենզավորման կարգի ուժի մեջ մտնելու ժամկետ է սահմանվել 2019 թվականի նոյեմբերի 15-ը:

Օրենքի 31-րդ հոդվածի 3-րդ մասի համաձայն սույն օրենքով սահմանված կարգով դեղերի մեծածախ իրացման լիցենզիա ստացած անձինք պարտավոր են սույն օրենքն ուժի մեջ մտնելուց հետո՝ երեք տարվա ընթացքում, սույն օրենքով սահմանված կարգով ստանալ դեղերի պատշաճ բաշխման գործունեության հավաստագիր:

Ելնելով այն հանգամանքից, որ դեղերի մեծածախ իրացման լիցենզավորման կարգը ուժի մեջ է մտնում 2019 թվականի նոյեմբերի 15-ից` տնտեսվարող սուբյեկտներին դեղերի մեծածախ իրացման լիցենզավորման համար ժամկետային հնարավորություն ընձեռելու անհրաժեշտություն է առաջանում: Բացի այն Օրենքն ուժի մեջ է մտել 2016 թվականի դեկտեմբերի 15-ին, ինչով պայմանավորված 2019 թվականի դեկտեմբերի 15-ից պարտադիր է դառնում նաև դեղերի պատշաճ բաշխման գործունեության հավաստագիր ունենալու պահանջը, ինչը փոխկապված է համապատասխան լիցենզիա ունենալու հանգամանքի հետ և առաջացնում է դեղերի պատշաճ բաշխման գործունեության հավաստագիր ստանալու ժամկետի երկարաձգման անհրաժեշտություն:

Օրենքի 27-րդ հոդվածի 5-րդ մասի համաձայն դեղատոմսով իրացվող դեղերի մասին տեղեկատվության տարածումը զանգվածային լրատվամիջոցներով արգելվում է: Սակայն գործնականում առաջանում է իրավիճակ, երբ դեղատոմսով բացթողնվող դեղը ձեռք է բերվում առողջապահական պետական նպատակային ծրագրերի շրջանակներում բնակչությանը տրամադրելու նպատակով և այդ մասին Լիազոր մարմնի կամ նրա կողմից լիազորված անձի կողմից զանգվածային լրատվության միջոցներով հանրությանը իրազեկելու անհրաժեշտություն է առաջանում:

Անհրաժեշտ է նաև Օրենքով կարգավորել առողջապահության բնագավառում պետական կառավարման լիազոր մարմնի կողմից դեղերի շրջանառության պետական կարգավորման ոլորտում փորձաքննությունների կազմակերպման և իրականացման համար լիազոր մարմին սահմանելու հարցը: 

Վերոգրյալը վկայում է «Դեղերի մասին» օրենքում փոփոխություն և լրացումներ կատարելու անհրաժեշտության մասին:

2. Առաջարկվող կարգավորումների բնույթը 

«Դեղերի մասին» օրենքում փոփոխություն և լրացումներ կատարելու մասին» օրենքի նախագծով`

1) սահմանվում է դեղերի մեծածախ իրացման լիցենզավորման ժամկետը,

2) նախատեսվում են առողջապահական պետական նպատակային ծրագրերի շրջանակներում բնակչության համար ձեռք բերված դեղատոմսով բացթողնվող դեղերի մասին զանգվածային լրատվամիջոցներում հանրային իրազեկում իրականացնելու կարգավորումներ,

3) երկարաձգվում է դեղերի պատշաճ բաշխման գործունեության հավաստագիր ստանալու ժամկետը,

4) կարգավորվում է առողջապահության բնագավառում պետական կառավարման լիազոր մարմնի կողմից դեղերի շրջանառության պետական կարգավորման ոլորտում փորձաքննությունների կազմակերպման և իրականացման համար լիազոր մարմին սահմանելու հարցը: 

3. Նախագծի մշակման գործընթացում ներգրավված ինստիտուտները և անձինք

Նախագիծը մշակվել է Առողջապահության նախարարության իրավաբանական վարչության կողմից: 

4. Ակնկալվող արդյունքը. 

Նախագծի ընդունմամբ  ակնկալվում է կարգավերել դեղերի մեծածախ իրացման լիցենզավորման, պետական նպատակային ծրագրերի շրջանակներում բնակչության համար ձեռք բերված դեղատոմսով բացթողնվող դեղերի մասին զանգվածային լրատվամիջոցներում հանրային իրազեկում իրականացնելու դեղերի պատշաճ բաշխման գործունեության հավաստագիր ստանալու ժամկետի երկարաձգման, դեղերի շրջանառության պետական կարգավորման ոլորտում փորձաքննությունների կազմակերպման և իրականացման համար լիազոր մարմին սահմանելու հետ կապված հարցերը: